Vüqar Bayramov: “... büdcə xərcləmələrindən faydalananların sayının artmasına səbəb olur”
Prezident İlham Əliyev Nazirlər Kabinetinin 2018-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunan iclasında çıxışı zamanı dövlət büdcəsinin icrası məsələsinə də toxunub.
Dövlət başçısının sözlərinə görə, bir neçə ay bundan əvvəl büdcəyə dəyişiklik edilib: “Çünki əlavə vəsait daxil edildi. Hesab etdik ki, bu il görülə biləcək işlərin icrası üçün əlavə vəsait ayıraq, o cümlədən sosial məsələlərin həlli üçün. Dürüstləşmə edildi və büdcəmizin həcmi artırıldı. Bu, özlüyündə bir göstəricidir, onu göstərir ki, bizim maliyyə vəziyyətimiz daha da yaxşılaşır. Elə imkanlar yaranıb ki, biz il ərzində büdcəyə dəyişiklik edərək büdcəmizin həcmini artıra bilərik. Dünya miqyasında belə hallara çox da tez-tez rast gəlinmir. Azərbaycan iqtisadiyyatı istənilən dövrdə öz dayanıqlığını nümayiş etdirir. Hətta bir neçə il bundan əvvəl dünyanı bürümüş maliyyə-iqtisadi böhranının ikinci dalğası dövründə də Azərbaycan iqtisadiyyatı dayanıqlığını təmin etmişdir”.
Prezidentin fikrincə, gələn ilin büdcəsi həm investisiyayönümlü, həm də sosialyönümlü olacaq: “Bütün sosial layihələr icra ediləcək. Eyni zamanda, dövlət kapital qoyuluşu üçün kifayət qədər vəsait də nəzərdə tutulur. Əsas məsələ ondan ibarətdir ki, biz bu vəsaitdən səmərəli şəkildə istifadə edək, ölkə qarşısında duran əsas məsələlərin həllini təmin edək, prioritetləri düzgün seçək”.
Həqiqətən də dünyada istənilən ölkə il ərzində büdcəyə dəyişiklik etmək imkanına malik deyil. Azərbaycan dövləti cəmiyyətin maraqlarından çıxış edərək bu addımı atır. Buna həm iqtisadi imkanı var, həm də digər imkanları. Bu baxımdan sözügedən məsələni ekspertlər necə dəyərləndirirlər?
Məsələyə münasibət bildirən iqtisadçı-ekspert Vüqar Bayramovun sözlərinə görə, belə vəziyyət Azərbaycanın üstün mövqeyə sahib olmasından xəbər verir: “Nəzərə almaq lazımdır ki, büdcəyə yenidən baxılması büdcə xərclərinin artmasına səbəb olur. O baxımdan büdcəyə dəyişikliklərin edilməsi həmin vəsaitdən daha çox xərclənməsinə imkan yaradır. Daha çox vəsaitin xərclənməsi isə indiki dövrdə daha məqsədəuyğundur. Ona görə ki, bu, nəticə etibarilə, həm sosial, həm də investisiya məqsədləri üçün daha çox vəsaitin ayrılmasına bir zəmin yaradır. Bunun sayəsində bir sıra layihələr həyata keçirilir. Sözsüz ki, büdcəyə edilən dəyişikliklər büdcədə neftin dünya bazar qiymətinin proqnozlaşdırıldığından yüksək olması ilə əlaqədardır. Nəticədə Azərbaycan neft qiymətini proqnozlaşdıran zaman daha ehtiyatlı və eyni zamanda, sığortalanmış qiymət prinsipinə üstünlük verir. Bu baxımdan da neftin qiymətində qeydə alınan artımlar büdcəyə yenidən baxılmasına şərait yaradır. Bu da dövlət büdcəsinin artmasına gətirib çıxarır. Bu baxımdan əlavə dəyişikliklər daha çox vəsait xərcləmə imkanı və iqtisadiyyata, eləcə də sosial sferaya daha çox pul ayırmaq imkanı verir. Belə vəziyyət büdcə xərcləmələrindən faydalananların sayının artmasına səbəb olur”.
Vidadi ORDAHALLI
