İlham Şaban: “Gürcüstanda olduğu kimi, digər ölkələrdə də qazın paylanması layihələrində iştirak edəcəyik”
“Cənub Qaz Dəhlizi”nin uğurla başa çatması bizim üçün yeni imkanlar, yeni üfüqlər açacaq”. Bu fikirləri Prezident İlham Əliyev Nazirlər Kabinetinin 2018-ci ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunan iclasında çıxışı zamanı bildirib.
Dövlət başçısının sözlərinə görə, 2018-ci il ölkənin enerji siyasətinin inkişafı üçün önəmli il olub: “Bu ilin may ayında biz Bakıda “Cənub Qaz Dəhlizi”nin rəsmi açılışını qeyd etdik. Bu, tarixi hadisədir. Ondan bir ay sonra Türkiyədə TANAP layihəsinin açılışını etdik və “Cənub Qaz Dəhlizi” layihəsi uğurla icra edilir. Bütün bu dörd layihənin hamısında çox gözəl nəticələr var. Bu il biz qaz hasilatımızı artıracağıq, artıq “Şahdəniz-2”dən qaz gəlir. Gələn il, ondan sonrakı illərdə daha da artacaq”.
Prezidentin sözlərinə görə, tam hədəfə çatmaq üçün bütün işlər görülür: “Biz bir çox ölkələrin bazarlarına öz resurslarımızla çıxacağıq. Ondan sonra bunu nəzərə alaraq, biz o ölkələrdə yeni infrastruktur layihələri icra edə bilərik. Bu barədə danışıqlar gedir və əvvəlcədən bir şey demək istəmirəm. Amma hesab edirəm ki, biz, sadəcə olaraq, digər ölkələrə qazı təchiz edən ölkə kimi yox, ondan sonra qaz təsərrüfatının idarə edilməsi ilə bağlı da məşğul olmaq istəyirik. Bu, səmərəliliyi, gəlirimizi daha da artıracaq və çalışacağımız ölkələrdə də yeni infrastruktur yaradılmasına gətirib çıxaracaq”.
Maraqlıdır, Prezident CQD ölkələrində yeni infrastruktur layihələri icra edə bilərik deyərkən nəyi nəzərdə tutur?
Məsələyə münasibət bildirən Neft Araşdırmaları Mərkəzinin rəhbəri İlham Şaban buna bir neçə aspektdən yanaşdı. Onun sözlərinə görə, burada söhbət enerji infrastrukturunun həmin ölkələrdə idarə olunmasından gedir: “Məsələn, SOCAR Türkiyənin qaz bazarında 1 milyard kubmetrlik qazpaylayıcı stansiyanı almaq istəyir. Ondan sonra Dövlət Neft Şirkəti Bolqarıstanla artıq memorandum bağlayıb və qazpaylayıcı sistemin alınması ilə bağlı danışıqlar aparır. Yəni biz bütün bu görülən işlər sayəsində sadəcə qaz satışı ilə məşğul olmayacağıq. Həmçinin, Gürcüstanda olduğu kimi, digər ölkələrdə də qazın paylanması layihələrində iştirak edəcəyik. Bu o deməkdir ki, yerli bazarlarda da qazın satışında iştirak etmək niyyətimizi ortaya qoyub onu reallaşdırırıq. Bu minvalla daha çox gəlir əldə edəcəyik. Eyni zamanda, regional Avropa bazarında qaz seqmentinin bütün layihələrinin iştirakçısı kimi təqdim edək. Yəni təkcə hansısa ölkəyə qaz satmaqla iş bitməsin. Bu məsələ Azərbaycanın gələcək iqtisadi inkişafı ilə bağlı olduğu kimi, Avropanın enerji təhlükəsizliyi baxımından da mühüm hesab edilir. Ona görə də hesab edirəm ki, Azərbaycanın CQD ölkələrinin infrastruktur layihələrində iştirakı müsbət haldır və iqtisadi baxımdan sərfəlidir. Bunun sayəsində Azərbaycanın iqtisadi gəlirləri daha da artacaq və ölkəmiz bundan qazanacaq”.
Vidadi ORDAHALLI
