Əkbər Qoşalı: “Bu, qiymətlərin ucuzlaşmasına, dövriyyənin artmasına və iqtisadi, ticari baxımdan başqa müsbət göstəricilərə gətirib çıxara bilər”
Məlum olduğu kimi, Dövlət Gömrük Komitəsinin (DGK) sədri, gömrük xidməti general-leytenantı Səfər Mehdiyev Türkdilli Dövlətlərin Əməkdaşlıq Şurasının baş katibi Bağdad Amreyevin rəhbərlik etdiyi nümayəndə heyəti ilə görüşüb. Komitə sədri qardaş ölkələr olaraq təşkilat çərçivəsində həm ikitərəfli, həm də beynəlxaq səviyyədə faydalı əməkdaşlıq əlaqələrinin qurulduğunu, vahid mövqe nümayiş etdirildiyini diqqətə çatdırıb.
Görüşdə o da vurğulanıb ki, bütün sahələrdə olduğu kimi, gömrük sahəsində əlaqələr yüksək səviyyədədir və təşkilat üzvü olan dövlətlər arasında məlumat mübadiləsinin həyata keçirilməsi, müxtəlif sahələr üzrə saziş və protokolların imzalanması, məlumatların qabaqcadan ötürülməsi ilə bağlı pilot layihənin reallaşdırılması bunun bariz nümunəsidir.
S.Mehdiyev türkdilli dövlətlərin başçıları tərəfindən gömrük sahəsində əməkdaşlığın daha da gücləndirilməsi ilə bağlı konkret tapşırıqların verildiyini, bu tapşırıqlardan irəli gələn vəzifələrin icrası məqsədilə vahid logistika sisteminin formalaşdırlması üçün sənədin hazırlanmasının və həyata keçirilməsinin vacibliyini dilə gətirib.
Komitə sədri Azərbaycan Gömrük Xidməti ilə bir sıra region ölkələri arasında elektron məlumat mübadiləsinin həyata keçirildiyini, təşkilatın bütün üzvləri arasında da elektron məlumat mübadiləsinin tətbiq olunmasının ticarətin və gömrük nəzarətinin asanlaşdırılmasına, idxal-ixrac əməliyyatlarının sürətləndirilməsinə şərait yaradacağını bildirib.
Həqiqətən də türkdilli ölkələr arasında vahid logistika sisteminin formalaşdırlmasına böyük ehtiyac var. Çünki türkdilli dövlətlərin iqtisadiyyatı sürətlə inkişaf edir. Belə bir sistemin yaradılması inkişafa müsbət təkan verəcək.
Sözügedən məsələ ilə bağlı fikirlərini “Bakı-Xəbər”lə bölüşən Azərbaycanda Atatürk Mərkəzinin şöbə müdürü, Milli QHT Forumunun İdarə Heyətinin üzvü Əkbər Qoşalının sözlərinə görə, belə bir sistemin yaradılması son dərəcə vacibdir: “DGK sədri Səfər Mehdiyev türkdilli dövlətlərin vahid logistika sisteminin formalaşdırılması təklifini verməklə, Azərbaycan dövlətinin qardaş dövlətlərlə işbirliyi baxımından davamlı, məqsədyönlü iş apardığını bir daha göstərmiş oldu. Nəzərə almaq lazımdır ki, Prezident İlham Əliyev Türk Dövlət Başçıları Daimi Şurasının 6-cı sammitində qardaş ölkələrə çağırış etdi. Çağırış etdi ki, Azərbaycanın təşəbbüsçüsü və yatırımcısı olduğu iri layihələrə qoşulsunlar, yaranan yeni imkanlardan yararlansınlar. Prezident İlham Əliyev demişdi ki, biz qardaş ölkələrə sərmayələrin qoyuluşu ilə həm öz iqtisadi maraqlarımızı təmin edir, həm də qardaş ölkələrdə yeni imkanlar yaradırıq. Xüsusilə də qardaş ölkələri 2017-ci ilin oktyabrından fəaliyyətə başlayan Bakı-Tiflis-Qars dəmir yolunun imkanlarından istifadə etməyə çağırdı. Bütün bunlar iqtisadi əməkdaşlığı dərinləşdirməyi özündə ehtiva edir. Xüsusən də ticarət dövriyyəsinin artırılması üçün əlavə addımlar atmağa, qarşılıqlı yatırımları təşviq etməyə və bunun üçün yeni mexanizmlər hazırlamağa xidmət edən təkliflərdir. S.Mehdiyevin irəli sürdüyü təklifi də məhz bu baxımdan müsbət qiymətləndirə bilərik. Onu da qeyd edim ki, Qazaxıstanın Aktau limanında logistik mərkəz fəaliyyət göstərir. Belə bir mərkəz Ələt qəsəbəsində də qurulur. Bu baxımdan digər qardaş türkdilli ölkələrin də qarşılıqlı olaraq bu tip mərkəzlər tikməsi ümumi işin xeyrinədir. S.Mehdiyevin qardaş ölkələrin vahid logistika sistemi formalaşdırması təklifi həm mövcud infrastrukturdan daha səmərəli istifadəni, saxlama və daşıma həcminin artırılmasını, həm də təcrübə mübadiləsini özündə ehtiva edir. Bu isə, öz növbəsində, qiymətlərin ucuzlaşmasına, dövriyyənin artmasına və iqtisadi, ticari baxımdan başqa müsbət göstəricilərə gətirib çıxara bilər. Ona görə də bu təklifə müsbət yanaşıram”.
Vidadi ORDAHALLI
