Bahadur Bilalov: “Hesab edirəm ki, bu kimi layihələrin perspektivi var”
Rusiya və Azərbaycan turizm və nəqliyyat sahəsində ikitərəfli əməkdaşlıq çərçivəsində Xəzərdə dəniz turizminin inkişafı üzrə birgə layihə hazırlayırlar. Bunu mətbuata açıqlamasında Rusiya Federasiyasının Şimali Qafqaz işləri üzrə nazir müavini Olqa Ruhullayeva deyib.
Nazir müavini bildirib ki, bu, hələ analoqu olmayan unikal layihə olacaq: “Hesab edirik ki, bu layihənin reallaşması qarşılıqlı fayda verəcək və iki ölkə arasında davamlı və səmərəli əməkdaşlıq üçün yaxşı perspektivlər açacaq. Layihəyə iqtisadi baxımdan tələbat var, belə ki, bu, Xəzəryanı ölkələr arasında mədəni-regional əlaqələrin inkişafına xidmət edəcək. İlkin marşrutların coğrafiyası layihəyə cəlb olunmuş turoperatorlardan asılı olacaq. Həmin marşrutlar fərqli, yəni qısa, uzun ola bilər, idealda isə bütün Xəzəryanı ölkələri əhatə edəcək dəniz üzrə dairəvi marşrut ola bilər”.
Onun sözlərinə görə, Rusiyada artıq bu istiqamətdə istifadə oluna biləcək kruiz teploxodu inşa edilir.
O.Ruhullayeva onu da qeyd edib ki, bu yaxınlarda Bakıda keçirilmiş Azərbaycan-Rusiya Regionlararası Forumu çərçivəsində də həmin layihə üzrə müzakirələr aparılıb: “Rusiya Prezidenti Bakıdakı nitqi zamanı Xəzərdə dəniz turizminin inkişafı üzrə ciddi istiqaməti vurğuladı. Biz də azərbaycanlı həmkarlarımızla forum çərçivəsində “dəyirmi masa” arxasında bu layihənin yaradılması ideyasını müzakirə etdik. Görüşün yekunu üzrə Azərbaycandan olan həmkarlarımızla Xəzərdə birgə layihənin işlənməsi və sinxronlaşdırılması barədə razılıq əldə etdik".
Nazir müavini deyib ki, Rusiya İqtisadiyyat Nazirliyinin "Rosturizm"lə və Azərbaycan tərəfi ilə birgə vəzifəsi marşrutun yaxın gələcəkdə tam gücü ilə işləməsi üçün infrastrukturun hazırlanmasıdır.
Görünən odur ki, burada çox ciddi və böyük turizm layihəsindən söhbət gedir. Sözügedən birgə layihənin həyata keçirilməsi turistlərin sayının artmasına təkan verə bilər.
Maraqlıdır, bəs ekspertlərin sözügedən layihədən gözləntiləri nədən ibarətdir?
Məsələyə münasibət bildirən turizm sahəsi üzrə ekspert Bahadur Bilalovun sözlərinə görə, layihə digər sahilyanı ölkələrin də marağını cəlb etsə, o zaman daha səmərəli effekt verəcək: “Çox güman ki, burada söhbət Xəzərdə turist xidmətindən gedir. Bununla yanaşı, Xəzərdəki adalara turistlərin səyahətini təşkil etmək olar. Xüsusən yay aylarında adalarda çimərlik turizmini təşkil etmək olar. Çünki Xəzərin sahil zonaları çirklidir, amma bundan fərqli olaraq, adalar çox təmiz sahilə malikdir. Ona görə də bu imkanlardan yararlanmaq lazımdır. Hesab edirəm ki, bununla bağlı perspektiv imkanlar var. Eyni zamanda, Xəzərdə müxtəlif ekoturizm layihələri həyata keçirilə bilər. Buna bənzər digər layihələr də nəzərdən keçirilməlidir. Təbii ki, bütün bunlar istər iki, istərsə də 5 ölkənin layihəsi olsun, nəticədə digər ölkələr də buna diqqəti artıracaq. Bütün bunlar regionun turizm imkanlarının artmasına öz təsirini göstərəcək. Bu da, öz növbəsində, ora daha çox turistin gəlməsinə zəmin yaradar. Ona görə də Xəzərdə turizmin inkişafı ilə bağlı birgə layihələrin həyata keçirilməsinə müsbət yanaşıram. Hesab edirəm ki, bu kimi layihələrin perspektivi var”.
Vidadi ORDAHALLI
