Günel Fərhadqızı: “Azərbaycanda İtaliya sərmayəsini cəlb etmək üçün çox əlverişli biznes mühiti var”
Azərbaycan və İtaliya arasında investisiyaların təşviqi və qorunması haqqında yeni saziş layihəsi, ölkələrimiz arasında energetika, infrastruktur, logistika, dəmir yolları, aqrar sənaye, neft-kimya və digər sahələrdə əməkdaşlığı nəzərdə tutan birgə Fəaliyyət Planı üzərində iş aparılır. Bu, iqtisadiyyat naziri Şahin Mustafayevin İtaliyanın ölkəmizdəki fövqəladə və səlahiyyətli səfiri Auqusto Massarini ilə görüşü zaman qeyd olunub.
Azərbaycan və İtaliyanın enerji sahəsində uğurla əməkdaşlıq etdiyini və bu sahədə birgə layihələr həyata keçirildiyini diqqətə çatdıran Şahin Mustafayev ölkəmizin qeyri-neft sektoru sahəsində İtaliya ilə əlaqələrin genişləndirilməsində maraqlı olduğunu, infrastruktur, energetika, turizm, kənd təsərrüfatı, nəqliyyat, humanitar və s. sahələrdə əməkdaşlığın genişləndirilməsi imkanlarını vurğulayıb.
Şahin Mustafayev ölkələrimiz arasında əməkdaşlığın uğurla davam etdiyini, Azərbaycan Respublikasının Prezidenti cənab İlham Əliyevin İtaliyaya səfərlərinin, bu ilin iyul ayında İtaliya Prezidenti Sercio Mattarellanın Azərbaycana, sentyabrda isə Azərbaycanın Birinci vitse-prezidenti Mehriban xanım Əliyevanın İtaliyaya səfərinin, bu səfərlər çərçivəsində keçirilən görüşlərin və aparılan danışıqların əlaqələrin genişləndirilməsində mühüm əhəmiyyətini vurğulayıb. Azərbaycan-İtaliya iqtisadi əlaqələrinə və əməkdaşlıq perspektivlərinə dair fikirlərini bildirən Ş.Mustafayev Azərbaycanda 95 İtaliya şirkətinin qeydiyyatdan keçdiyini, bu şirkətlərin dövlət əsaslı 41 podrat layihəsində iştirak etdiyini diqqətə çatdırıb. Vurğulanıb ki, İtaliya Azərbaycanın əsas ticarət tərəfdaşıdır və ixracda əsas yerlərdən birini tutur.
Göründüyü kimi, Azərbaycan-İtaliya iqtisadi münasibətlərinin çox yüksək səviyyədə olduğu nəzərə çarpır. Hətta Azərbaycan və İtaliya arasında investisiyaların təşviqi və qorunması haqqında yeni saziş layihəsinin hazırlandığı da bildirilir. Diqqətçəkən vacib məqamlardan biri də bundan ibarətdir ki, bu ilin iyul ayında İtaliya Prezidenti Sercio Mattarellanın Azərbaycana, sentyabrda isə Azərbaycanın Birinci vitse-prezidenti Mehriban xanım Əliyevanın İtaliyaya səfərindən sonra bu istiqamətdə işlər daha da sürətlənib. Bu iki ölkə arasındakı iqtisadi münasibətlərin perspektivini necə dəyərləndirmək olar?
İqtisadçı Günel Fərhadqızı qəzetimizə bildirdi ki, İtaliya Azərbaycan üçün çox vacib olan ticarət partnyorudur: “Azərbaycan Respublikası ilə İtaliya arasında iqtisadi əlaqələr sürətlə inkişaf edir. İki ölkə arasında ticarət dövriyyəsi gündən-günə artır. Azərbaycandan İtaliyaya əsasən neft və neft məhsulları, həmçinin, kimya sənayesi məhsulları ixrac edilir. İtaliyadan ölkəmizə isə texnika, yüngül və yeyinti sənayesi məhsulları gətirilir. Hazırda İtaliya iqtisadiyyatı ÜDM-nin 80-85%-i kiçik və orta sahibkarlıq subyektlərinin payına düşür. Odur ki, iki ölkənin özəl sektoru arasında təcrübə və məlumat mübadiləsinin artırılmasına, daha geniş müstəvidə birgə əməkdaşlığa ehtiyac var. Gələcəkdə iki ölkə arasında qeyri-neft sektorunun müxtəlif sahələrində əməkdaşlıq imkanlarının genişləndirilməsi nəzərdə tutulur. Yaxın müddətdə Azərbaycan və İtaliya iş adamları birgə kiçik və orta sahibkarlığın inkişafı istiqamətində layihələr icra edərsə, bu, ölkəmizdə özəl sektorun inkişafına müsbət təsir göstərər. Artıq belə meyllərin olduğu nəzərə çarpır. Xüsusilə də qarşılıqlı investisiyaların cəlbi ilə bağlı hər iki tərəfdən siyasi iradənin olduğu görünür ki, bu da ölkələrimiz arasında ticarət dövriyyəsinin daha da artmasına səbəb olacaq. Təbii ki, belə münasibətlərin qurulması və davam etdirilməsində ölkə rəhbərlərinin qarşılıqlı səfərləri mühüm əhəmiyyət kəsb edir. Biz bu dinamikanı Azərbaycan-İtaliya münasibətlərində aydın şəkildə hiss edirik. Azərbaycanda İtaliya sərmayəsini cəlb etmək üçün çox əlverişli biznes mühiti var. İtaliya şirkətləri Azərbaycana investisiya qoyaraq bazarda rəqabətqabiliyyətli və uğurlu biznes layihələr icra edə bilərlər. İtalyan iş adamlarının Azərbaycanda xüsusilə polad istehsalında iştiraka maraqlı olduqları bildirilir”.
Məhəmmədəli QƏRİBLİ
