Məhəmməd Əsədullazadə: “Hazırda ölkəmizlə hərbi-texniki əməkdaşlığı dərinləşdirən şimal qonşumuz Bakı ilə yaxınlaşmaq siyasi kursunu götürüb”
Rusiya və Azərbaycan Şimali Qafqaz regionunda SPA kompleksin tikintisi üzrə yeni birgə layihənin reallaşdırılması üzərində işləyirlər. Xəbər verildiyi kimi, bunu mətbuata açıqlamasında Rusiya Federasiyasının Şimali Qafqaz işləri üzrə nazir müavini Olqa Ruhullayeva deyib.
Nazir müavini qeyd edib ki, hazırda Kislovodsk və Jeleznovodsk kurort şəhərlərində birgə layihə hazırlanır: “Jeleznovodskda layihə fəal hazırlıq mərhələsinə keçib. İnşaat işləri üçün ərazi müəyyən edilib, 400 yerlik sanatoriyanın tikintisi ilə bağlı sənədlər hazırlanır. Obyektin 2020-ci ildə təhvil veriləcəyi müəyyənləşdirilib. Bununla yanaşı, Rusiya tərəfi ərazi təqdim edib ki, bu da ikitərəfli tərəfdaşlıq şəraitində biznesi inkişaf etdirməyə imkan verə bilər”.
O.Ruhullayeva onu da bildirib ki, Azərbaycan investoru, öz növbəsində, "İstoçnik" sanatoriyası investisiya layihəsinin reallaşdırılmasına hazır olduğunu ifadə edib.
Onun sözlərinə görə, müasir sanatoriya-kurort kompleksinin yaradılması üzrə daha bir layihəni Azərbaycan tərəfinin təşəbbüsü ilə Kislovodskda həyata keçirmək planlaşdırılır: "2017-ci ilin aprelində Azərbaycan tərəfi ilə dövlət mülkiyyətində olan "Akademiçeskiy" sanatoriyasının yenidən qurulması haqqında niyyət sazişi imzalanıb. Obyekt "Kislovodskiy" milli parkından piyada 2 dəqiqəlik məsafədə, 4,9 hektar sahədə yerləşir. Stavropol diyarı hökuməti tərəfindən investora bu layihənin reallaşdırılması üçün vergi güzəştləri təqdim etmək planlaşdırılır”.
Görünən odur ki, son illər Rusiya ilə Azərbaycan arasında münasibətlər bütün müstəvilərdə inkişaf edir. Həm siyasi, həm də iqtisadi, humanitar müstəvidə əlaqələrdə dinamik inkişaf var. İqtisadi sferada əlaqələrin genişlənməsi siyasi müstəvidə münasibətlərin daha da yaxınlaşmasına öz müsbət təsirini göstərir.
Maraqlıdır, bəs ekspertlər bunu necə şərh edirlər? Yəni bu kimi layihələr iki ölkə arasında əlaqələrin inkişafında ümumən necə rol oynaya bilər?
Sözügedən məsələ ilə bağlı fikirlərini “Bakı-Xəbər”lə bölüşən politoloq Məhəmməd Əsədullazadənin sözlərinə görə, Rusiya-Azərbaycan əlaqələri iki ölkənin qarşlıqlı maraqlarına uyğun olaraq dinamik inkişafdadır: “İl ərzində Azərbaycan və Rusiya prezidentlərinin bir neçə dəfə görüşü bunu sübut edir. Yəni iki ölkə strateji tərəfdaşlıq istiqamətində iqtisadiyyatın bütün sahələri üzrə əməkdaşlıq formatını inkişaf etdirmək əzmindədir. Rusiyaya qarşı tətbiq olunan sanksiyalara ölkəmizin qoşulmaması Moskvanın Bakı ilə strateji məsələlərdə uzlaşmasına zəmin yaratmalıdır. Ötən ay Soçidə hər iki ölkə başçısının iştirakı ilə 16 müqavilə imzalandı. İqtisadiyyatın və siyasətin müxtəlif istiqamətləri üzrə müqavilələrin imzalaması, 5 illik yol xəritəsinin qəbulu Cənubi Qafqazda Azərbaycanın Rusiyanın etibarlı tərəfdaşı olduğunun göstəricisidir. Prezident Putinin ölkəmizə səfəri və burada verdiyi mesajlar iki ölkənin regionları arasında iqtisadi inteqrasiyaya səbəb olacaq. Hazırda ölkəmizlə hərbi-texniki əməkdaşlığı dərinləşdirən şimal qonşumuz Bakı ilə yaxınlaşmaq siyasi kursunu götürüb. SPA-nın tikilməsi və digər birgə layihələrə imza atılması, Xəzərdə birgə əməkdaşlıq gələcək perspektivdə iki ölkə əlaqələrinin daha da inkişaf etməsinə səbəb olacaq. Hesab edirəm ki, Rusiya ilə Azərbaycan arasında əsas fikir ayrılığı Qarabağ konfliktidir. Rusiya praqmatik siyasət yürüdərsə, münaqişə ədalətli həll yolunu tapar. Rusiya Azərbaycanla kənd təsərrüfatı, bank sahəsi və digər iqtisadi sahələrdə birgə layihələr reallaşdırır. 5 milyard dollarlıq iqtisadi sərmayə ilə iki ölkə yeni iqtisadi əməkdaşlıq mərhələsinə keçir”.
Vidadi ORDAHALLI
