Rüfət Quliyev: “Valyuta mübadilə məntəqələrinin olmaması ciddi bir problemdir və insanlarda narazılıq yaradır” Əkrəm Həsənov: “Valyuta tənzimi haqqında” Qanuna dəyişiklik olunub, dəyişikliyə əsasən, istənilən şəxs valyutadəyişmə məntəqəsi aça bilər, ancaq…`”
Son illər ölkəmizə gələn turistlərin sayı günü-gündən artır. Turist sayının çox olması isə ölkəyə daxil olan xarici valyutanın artmasına səbəb olur. Açıqlanan statistik rəqəmlərə əsasən, ötən illə müqayisədə bu il ölkəyə gələn turistlərin sayında 29 faiz artım müşahidə edilib. Bu isə onu deməyə əsas verir ki, ölkəyə gələn hər bir turist özü ilə bərabər xarici valyuta da gətirir.
Ancaq ölkəmizə gələn turistlər valyuta mübadiləsi zamanı problemlə qarşılaşır. Bəllidir ki, şəhərdə valyutadəyişmə məntəqələri olmadığı üçün, turistlər ya hava limanında, ya da banklarda valyutalarını dəyişmək məcburiyyətində qalırlar. Onu da nəzərə almaq lazımdır ki, şənbə-bazar günləri və ya axşam saatlarında banklar işləmədiyi üçün, turistlər əllərində olan pulu mübadilə edə bilmirlər. Bu hal həm onların işini çətinləşdirir, həm də turistlərin ölkəmiz haqqında düşüncəsinə təsir edir.
Məlumat üçün bildirək ki, Azərbaycanda valyutadəyişmə məntəqələrinin lizenziyası 2016-ci ildən etibarən ləğv edilib.
Ancaq ekspertlər valyuta mübadilə məntəqələrinin yenidən açılmasının vacib olduğunu düşünürlər.
Millət vəkili Rüfət Quliyev bizimlə söhbətində qeyd etdi ki, valyuta mübadilə məntəqələrinin olmaması ciddi bir problemdir və insanlarda narazılıq yaradır. Onun fikrincə, valyuta mübadilə məntəqələrinin açılmasına ehtiyac var: “Açılacaq valyuta mübadilə mərkəzləri paytaxtla bərabər bölgələrdə də fəaliyyətə başlamalıdır. Nəzərə almaq lazımdır ki, turistlər bölgələrdə də istirahət edirlər. Xüsusən də şənbə və bazar günləri bankların işləməməsi ölkəmizdə istirahət edən turistlərin işini çətinləşdirir. Biz qarşımıza turizmi inkişaf etdirməyi məqsəd qoymuşuq. Şəhərdə gəzən zaman görürük ki, turistlər bir-birindən soruşur ki, burada valyutadəyişmə məntəqəsi harada var? Onlar əlində olan pulu xırdalamaq üçün əziyyət çəkirlər. Niyə görə bir dənə də valyutadəyişmə məntəqəsi yoxdur?”
Millət vəkili hesab edir ki, valyuta mübadilə məntəqələrinin açılması üçün heç bir problem yoxdur. Bunun üçün maksimum bir ay vaxt lazımdır: “Xatırladım ki, valyuta mübadilə məntəqlərinin açılması ilə bağlı Milli Məclisdə qanun da qəbul edilib. Bu proses tez bir zamanda həyata keçirilərsə, o zaman yeni iş yerlərinin açılmasında zəmin yaradacaq”.
Bank sahəsi üzrə mütəxəssis Əkrəm Həsənov qəzetimizə açıqlamasında qeyd etdi ki, valyutadəyişmə məntəqələrinin açılması ilə bağlı ötən il “Valyuta tənzimi haqqında” Qanuna dəyişiklik olunub. İstənilən şəxs valyutadəyişmə məntəqəsi aça bilər: “Vətəndaşların valyutadəyişmə məntəqəsi açmamasının səbəbi isə banka 50 min manat məbləğində depozit qoyulması tələbinin olmasıdır. Qeyd olunan məbləğdə depozitin qoyulması sahibkarlara sərf etmir. Sahibkarların bu işə maraq göstərməməsinin səbəbi valyuta mübadiləsinə tələbatın azalması ilə bağlıdır. Çünki bankların bəzi filialları qeyri-iş günləri də fəaliyyət göstərirlər. Onu da deyim ki, ölkəmizdə olan xarici turistlərin əksəriyyəti bank kartları ilə istənilən ödənişi edir”.
Günel CƏLİLOVA
