Rəsul Cahangirli: “Nəzərə almaq lazımdır ki, SOCAR dünya miqyasında qəbul olunan böyük beynəlxalq şirkətdir”
Məlum olduğu kimi, SOCAR və Çinin “BGP” şirkəti seysmik kəşfiyyat işləri üzrə birgə müəssisə təsis ediblər. Təsis edilmiş yeni birgə müəssisə Azərbaycanda və Xəzər dənizi hövzəsində birgə seysmik kəşfiyyat işlərini həyata keçirəcək, hər iki şirkətin mütəxəssisləri arasında təcrübə mübadiləsi üçün yeni imkanlar yaradacaq.
SOCAR-ın prezidenti Rövnəq Abdullayev müqavilənin imzalanması ilə bağlı bildirib ki, SOCAR bütün sahələrdə müasir texnologiyalardan istifadə etməklə yanaşı, həm də fərqli və alternativ üslubları sınamaqla yeni yataqların kəşf edilməsi və hasilat səviyyəsinin davamlı stabilləşməsi üçün çalışır: “Çinin “BGP” şirkəti ilə geoloji və geofiziki işlər üzrə birgə müəssisənin yaradılması bu sahəyə alternativ baxış gətirərək, hər iki ölkənin mütəxəssisləri arasında qarşılıqlı fayda kəsb edəcək təcrübə mübadiləsi üçün münbit zəmin yaradır”.
Qeyd edək ki, cari ilin iyun ayının 6-da SOCAR Çin Milli Neft Şirkətinin törəməsi “BGP” şirkəti ilə əməkdaşlığın qurulması, o cümlədən geofiziki xidmətlərin göstərilməsi üçün birgə müəssisənin yaradılması imkanlarının nəzərdən keçirilməsi məqsədilə Anlaşma Memorandumu imzalayıb. Bu Anlaşma Memorandumuna uyğun olaraq, tərəflər arasında danışıqlar aparılıb və yekun sənəd hazırlanıb.
“BGP” şirkəti Çin Xalq Respublikasının dövlət neft şirkəti olan “CNPC” şirkətinin 100 faizlik törəmə müəssisəsidir. “BGP”nin əsas fəaliyyət sahələrinə quruda, keçid zonasında və dənizdə kəşfiyyat işlərinin aparılması, o cümlədən mürəkkəb əməliyyatlar aparmaqla seysmik məlumatların əldə edilməsi, emalı və interpretasiyası, seysmik avadanlıqların istehsalı və əlaqədar informasiya-kommunikasiya texnologiyaları xidmətlərinin göstərilməsi daxildir.
Bütövlükdə, iki ölkənin şirkətləri arasında belə birgə müəssisənin yaradılmasının əhəmiyyətini ekspertlər necə dəyərləndirirlər? Həmçinin, sözügedən müəssisənin sanksiyaların təsirinə məruzqalma ehtimalı varmı? Məsələyə münasibət bildirən ekspert Rəsul Cahangirlinin sözlərinə görə, birgə müəssisə hər iki tərəf üçün faydalı olacaq: “Nəzərə almaq lazımdır ki, SOCAR dünya miqyasında qəbul olunan böyük beynəlxalq şirkətdir. Ötən illər ərzində SOCAR nəinki ölkə daxilində, o cümlədən ölkə xaricində bir sıra böyük layihələr həyata keçirib və indi də bu yöndə böyük işlər görür. Dünyadakı bir sıra şirkətlər neft və qazçıxarmada SOCAR-ın təcrübəsindən faydalanmağa üstünlük verirlər. Hesab edirəm ki, Çin şirkəti ilə yaradılan birgə müəssisə Xəzər dənizi hövzəsində birgə seysmik kəşfiyyat işlərinin həyata keçirilməsinə müsbət təsir göstərəcək. Ona görə ki, Çin nefti həm hasil edən, həm də emal edən ölkələrdən biridir. Düzdür, Çin neftə olan tələbatını tam yerli hasilat hesabına təmin edə bilmir. Ölkənin tələbatı idxal hesabına təmin olunur. Ancaq bu sahədə Çin şirkətlərinin böyük təcrübəsi var. Ona görə ki, Çin həm dənizdə, həm də quruda neft hasil edir. Hesab edirəm ki, seysmik sahədə birgə əməkdaşlıq, müxtəlif avadanlıqların istehsalı və xidmətin göstərilməsi faydalı nəticələrin əldə olunmasına müsbət təsir göstərəcək. Bu həm də neft hasilatı ilə bağlı yeni imkanlar açacaq. O baxımdan tərəflər arasında yaradılan birgə müəssisəni perspektivli hesab edirəm. Bundan gözləntilər böyükdür. Sanksiyalara gəldikdə isə, bununla bağlı hər hansı bir narahatlığa əsas yoxdur”.
Vidadi ORDAHALLI
