“Ernst & Young” şirkəti SOCAR-ı korporativ idarəetmə sistemi üzrə “Güclü” şirkət kimi qiymətləndirib. Trend-in xəbərinə görə, bu barədə SOCAR məlumat yayıb. Bildirilir ki, mötəbər beynəlxalq şirkətin hesabatına əsasən SOCAR birja listinqindən keçməmiş dövlət müəssisələri arasında dünya üzrə ön sıralardadır.
“Son illərdə aparılan müşahidələr göstərir ki, effektiv korporativ idarəetmə sistemi olmadan müəssisələrin fəaliyyət göstəricilərini yaxşılaşdırmaq mümkün deyil. 2016-cı ildə Azərbaycanda dövlət müəssisələrinin korporativ idarəetmə sisteminin gücləndirilməsi məqsədilə Azərbaycan Respublikası Prezidenti tərəfindən iki normativ akt imzalanıb. Bu məqsədlə elə həmin il dünyanın tanınmış audit şirkətlərindən olan “Ernst & Young” şirkəti “SOCAR-da korporativ idarəetmə sisteminin yetkinlik dərəcəsinin qiymətləndirilməsi üzrə Hesabat”ın hazırlanması prosesinə cəlb edilib, bu məqsədlə SOCAR-ın daxili sənədləri araşdırılıb, müvafiq sorğular keçirilib. Layihə SOCAR-da korporativ idarəetmə sisteminin yetkinlik dərəcəsinin hazırkı səviyyəsinin qiymətləndirilməsi, arzu olunan göstəricilərin nəzərə çatdırılması, həmçinin korporativ idarəetmənin hər bir komponenti üzrə güclü tərəflərinin və inkişaf potensialı olan sahələrinin müəyyən edilməsi məqsədi ilə həyata keçirilib.
Aparılmış müsahibələr və daxili sənədlərin araşdırılması nəticəsində belə qənaətə gəlinib ki, SOCAR-da korporativ idarəetmə prinsiplərinə xüsusi önəm verilir və ümumi olaraq şirkətin korporativ idarəetməsi maksimal nəticənin 81 faizi nisbətində “Güclü” kateqoriyasına aid edilib, yüksək dəyərləndirilib. Bu da SOCAR-ın birja listinqindən keçməmiş müəssisələr arasında ön sıralarda, yerli dövlət müəssisələri ilə müqayisədə isə qabaqcıl mövqedə yer aldığını göstərir. SOCAR-da korporativ idarəetmə sisteminin komponentləri üzrə yalnız sənədlər deyil, həm də işlək prosedurlar yaradılıb. Şirkətdə mütəmadi olaraq qabaqcıl təcrübələr öyrənilir, maliyyə hesabatları beynəlxalq standartlara uyğun hazırlanır və müstəqil kənar auditor tərəfindən yoxlanılır.
SOCAR-ın rəhbərliyinin iştirakı ilə keçirilən hesabatın təqdimat yığıncağında təkmilləşdiriləcək sahələrlə bağlı məqamlara diqqət çəkilib, bildirilib ki, şirkətdə əsas səmərəlilik göstəricilərinin hazırlanması istiqamətində mühüm işlər görülüb, mindən artıq göstərici müəyyən edilərək təsdiq olunub. Növbəti mərhələdə bu göstəricilərin strateji hədəflərlə, müvafiq qiymətləndirmə və motivasiya sistemi ilə əlaqələndirilməsi, hesablama metodikasının təsdiq edilməsi istiqamətində bir sıra işlər görülməkdədir. Risklərin idarə olunması prosesinin avtomatlaşdırılması, korporativ idarəetmə sahəsində təlimlər və sertifikatlaşdırma proqramlarının daha çox tətbiqi, həmçinin daxili audit və daxili nəzarət sistemlərinin səmərəliliyinin kənar ekspertlər tərəfindən qiymətləndirilməsi tövsiyə olunub”, - deyə SOCAR-ın məlumatında bildirilir.
Qeyd edək ki, məsləhətçi şirkət tərəfindən təqdim edilən tövsiyələrin böyük hissəsi artıq SOCAR tərəfindən həyata keçirilməkdədir. Belə ki, “IBM” və “SAP” şirkətləri ilə əməkdaşlıq çərçivəsində artıq bir müddətdir ki, istehsalat və idarəetmə proseslərinin avtomatlaşdırılması istiqamətində işlər aparılır. “Ernst & Young” şirkəti tərəfindən mütəmadi olaraq auditlər keçirilir, həmçinin şirkətin bütün hesabatları kənar müşahidəçilər tərəfindən yoxlanıldıqdan sonra dərc edilir. Gələcək illərdə bu və digər layihələr üzrə aparılan işlər SOCAR-ın korporativ idarəetmə göstəricilərinin daha da yüksəldilməsinə xidmət edəcək.
