Fikrət Yusifov: “... olduqca əhəmiyyətli bir təklifdir”
Udmurtiya Azərbaycan biznesinin maraqlarını Rusiyada "Udmurtiyada istehsal olunub" Ticarət evi vasitəsilə təmsil etməyə hazırdır. Xəbər verildiyi kimi, bu barədə mətbuata açıqlamasında Udmurtiya Respublikasının hökumət sədrinin birinci müavini Aleksandr Svinin bildirib.
"Udmurtiyada istehsal olunub" Dövlət Ticarət evi yarım il bundan əvvəl açılıb. Svininin sözlərinə görə, bu dövr ərzində Ticarət evi yerli sahibkarlarla işləyib və onlara böyük vəsaitlər cəlb etməyə köməklik edib: "Biz Azərbaycan biznesinə Ticarət evimiz vasitəsilə yardım təklif etməyə hazırıq. Bu, eksklüziv təklifdir və biz onu bir neçə ölkəyə etmək istəyirik, Azərbaycan təklif etdiyimiz ilk ölkədir".
Sədr müavini, həmçinin, bildirib ki, Ticarət evi Azərbaycan sahibkarlarına marketinq araşdırmaları, bu və ya digər məhsula olan tələbatın öyrənilməsi ilə əlaqədar yardım edə bilər.
Bundan başqa, Svinin Ticarət evinin nümayəndəliyinin Azərbaycan və digər ölkələrdə açılmasını da istisna etməyib: "Bu haqda düşünmək hələlik tezdir, ancaq xarici ölkələrdə nümayəndəliklərin açılması bizim növbəti addımımız ola bilər. Bu gün əsas məqsədimiz ölkə daxilində mövcud mexanizm üzərində işləməkdir".
Rusiyanın Volqaboyu Gömrük İdarəsinin məlumatına əsasən, Udmurtiya və Azərbaycan arasında 2018-ci ilin yanvar-iyul dövrü ərzində əmtəə dövriyyəsi 4,17 milyon dollar təşkil edib, bundan 1,2 milyon dollar Azərbaycan məhsullarının ixracı payına düşür. İl ərzində əmtəə dövriyyəsi 3,2 dəfə artıb.
Görünən odur ki, son vaxtlar Rusiya və Azərbaycanın regionlararası əlaqələrinin genişlənməsi müşahidə olunur. Bu günlərdə Bakıda bununla bağlı 9-cu forum da keçirildi. Artıq iki ölkə arasında münasibətlər elə yüksək səviyyədədir ki, regionlar arasında qarşılıqlı iqtisadi əlaqələrin miqyası genişlənir. Sözügedən kontekstdə bunun əhəmiyyətini ekspertlər necə dəyərləndirirlər?
Məsələyə münasibət bildirən iqtisad elmləri doktoru, professor Fikrət Yusifovun sözlərinə görə, iki ölkə arasında iqtisadi əlaqələrin genişlənməsi regionlara da təsirsiz ötüşmür: “Son illər Rusiya-Azərbaycan iqtisadi əlaqələrinin daha da dərinləşməsi və onun qarşılıqlı investisiya qoyuluşları şəklində inkişaf etdirilməsi bu münasibətlərin yeni, daha maraqlı bir müstəviyə qədəm qoymasından xəbər verir. Bu gün azərbaycanlı iş adamları Rusiya iqtisadiyyatının ayrı-ayrı sahələrinə investisiyalar qoyur və istehsal sahələri yaradırlar. Eyni qaydada Rusiya iş adamları Azərbaycana getdikcə daha çox yatırımlar edirlər. Onlar əsasən aqrar sektorda meyvə-tərəvəz yetişdirilməsinə və bu məhsulların emalı ilə bağlı müəssisələrin açılmasına maraq göstərirlər. Bu da təbiidir. Azərbaycanda yetişdirilən meyvə-tərəvəz öz keyfiyyət göstəriciləri ilə artıq çoxdandır Rusiya bazarlarında öz yerini möhkəmləndirib. Elə buna görədir ki, son vaxtlar bizim Rusiya bazarlarına ixracımızın həcmi getdikcə artır. Rusiya bazarı həm Azərbaycan məhsullarının keyfiyyət göstəricilərinə verilən qiymət baxımından və həm də bizə daha yaxın bir bazar olduğundan ixracatçılarımız üçün daha əlverişlidir. Udmurtiya Respublikasının hökumət rəhbərliyinin Udmurtiyanın Azərbaycanın biznes maraqlarını Rusiyada təmsil etməyə hazır olması barədə bəyanatı isə bizim ölkəmizlə Rusiyanın ayrı-ayrı bölgələri arasında formalaşmış əlaqələrin yüksək səviyyəsindən xəbər verir. Bu çox yaxşı bir haldır. Azərbaycan Hökumətinin yeni investisiyalar cəlb etmək və ixrac məhsullarımız üçün yeni bazarlar axtarıb tapmaq istiqamətində intensiv işlər gördüyü bir dönəmdə bu təklif bizim üçün ikiqat maraqlıdır. Rusiya və Azərbaycanın regionlararası əlaqələrinin genişlənməsi kontekstində bu olduqca əhəmiyyətli bir təklifdir”.
Vidadi ORDAHALLI
