Vüqar Bayramov: “Cari ilin 8 ayında Azərbaycan 1 milyard 94 milyon dollar dəyərində qeyri-neft məhsulları ixrac edib, ixrac olunan məhsulların 375 milyon dolları Rusiyaya göndərilib”
Azərbaycan-Rusiya iqtisadi əlaqələri dinamik inkişafdadır. Bütün sahələrdə olduğu kimi, kənd təsərrüfatı sahəsində də əlaqələrimiz yüksək səviyyədədir. Bu əlaqələr günbəgün inkişaf edir. Rusiyalı istehlakçı Azərbaycanın kənd təsərrüfatı, xüsusilə tərəvəz məhsullarının keyfiyyətindən çox razıdır. Sirr deyil ki, Azərbaycanın aqrar məhsullarının Rusiya bazarında xüsusi yeri var.
Azərbaycan-Rusiya ticari-iqtisadi əlaqələrinin inkişafı ötən həftə Bakıda keçirilən Azərbaycan-Rusiya Regionlararası Forumunda da müzakirə olunub.
Azərbaycan Prezidenti cənab İlham Əliyev Azərbaycan-Rusiya Regionlararası Forumunun rəsmi açılış mərasimində iştirak edən zaman bildirmişdi ki, ticari-iqtisadi əlaqələrdə biz inkişaf dinamikasını görürük, bu olduqca güclü təəssürat oyadır, bu artmaqda olan dinamikadır: “Ötən il də, bu il də əmtəə dövriyyəsi artıb. Rusiya Azərbaycan üçün idxal üzrə bir nömrəli tərəfdaşdır və bizim qeyri-neft sektorunun məhsullarının ixracı üzrə də bir nömrəli tərəfdaşdır.
Azərbaycanlı fermerlər yetişdirdikləri kənd təsərrüfatı məhsullarını əsasən Rusiya bazarlarında satırlar. Ötən il bu ölkədə satılan məhsulların həcmi 12 faiz artmış, yarım milyard dollardan çox gəlir əldə edilmişdir”.
Azərbaycan kənd təsərrüfatı məhsullarının Rusiya bazarına daha çox ixrac olunmasının əhəmiyyəti barədə danışan iqtisadçı-ekspert Vüqar Bayramov “Bakı-Xəbər”ə açıqlamasında qeyd etdi ki, qeyri-neft məhsullarının daha çox ixrac olunması ölkəyə valyuta gətirilməsi baxımından əhəmiyyətlidir: “Aqrar və digər qeyri-neft məhsullarının ixracatının artması ölkə iqtisadiyyatının inkişafına səbəb olur. İxracatın artması iqtisadiyyatın diversifikasiyası və ixracatda neftdən asılılığın aradan qaldırılması baxımından vacibdir. Birmənalı şəkildə Azərbaycan üçün qeyri-neft mıəhsulları ixracatının artması vacibdir. Rusiya bu baxımdan olduqca vacib bazardır. Nəzərə almaq lazımdır ki, Azərbaycanın 1 nömrəli tərəfdaşı məhz Rusiyadır. Məlumat üçün bildirim ki, cari ilin 8 ayında Azərbaycan 1 milyard 94 milyon dollar dəyərində qeyri-neft məhsulları ixrac edib. Bu, ötən illə müqayisədə 14 faiz çoxdur. Həmin müddətdə ixrac olunan məhsulların 375 milyon dolları Rusiyaya göndərilib. Türkiyə bu siyahıda ikinci yerdədir. Rusiya aqrar məhsullarımızın ixracatında aparıcı mövqeyini qoruyub saxlayır”.
Həmsöhbətimizin sözlərinə görə, ixrac olunan məhsullar sırasında üstünlüyü pomidor təşkil edir: “Məlumat üçün bildirim ki, Rusiyaya 144,4 milyon dollar dəyərində pomidor ixrac olunub. Bu da onu göstərir ki, Azərbaycan üçün kənd təsərrüfatı məhsullarının ixracı vacibdir. Fermerlər çalışmalıdırlar ki, növbəti dövrdə öz məhsullarını Rusiya bazarı ilə yanaşı, digər bazarlara da çıxarsınlar. Aqrar məhsulların daha çox ixrac edilməsi ölkəyə daxil olacaq valyutanın həcminin artmasına səbəb olur”.
Günel CƏLİLOVA
