Nahid Bağırov: “Rusiyadan ölkəmizə yetərincə turist gəlir” Könül Nuriyeva: “Rusların ölkəmizə maraq göstərməsi səbəblərindən biri də sərhəd-keçid məntəqələrində maneələrin aradan qaldırılmasıdır”
Azərbaycanla Rusiya Federasiyasının əlaqələri yüksək səviyyədə inkişaf etməkdədir. Ölkələr arasında inkişaf siyasi, iqtisadi, maliyyə, mədəniyyət və digər sahələrdə də qeydə alınır. Son zamanlar Azərbaycan-Rusiya turizm münasibətləri də inkişaf edir. Rusiyadan Azərbaycana, eynilə Azərbaycandan Rusiyaya səfər edən turistlərin sayı ildən-ilə artır. Bunu statistik rəqəmlər də təsdiqləyə bilər.
Bu günlərdə Bakıda keçirilən IX Azərbaycan-Rusiya Regionlararası Forumunun açılış mərasimində iştirak edən Prezident İlham Əliyev çıxışı zamanı turizm sahəsinə də toxunub. O qeyd edib ki, turizm sahəsində də biz Rusiya vətəndaşları tərəfindən Azərbaycanı ziyarətin çox əhəmiyyətli dərəcədə artdığını görürük: “Hələ başa çatmamış 9 ay ərzində 700 minədək rusiyalı Azərbaycanı ziyarət edib. Əminəm ki, bu rəqəm də gələcəkdə artacaq”.
Mərasimdə, həmçinin, turizm sahəsində ikitərəfli əlaqələrin intensiv inkişaf etdiyi də vurğulanıb. Qeyd olunub ki, Azərbaycan sahibkarları tərəfindən Yessentukidə sanator-kurort mərkəzi inşa edilib. Jeleznovodskda mehmanxana kompleksi ucaldılır. Həmçinin, Xəzərdə birgə dəniz kruiz səyahətlərinin inkişaf etdirilməsi də vurğulanıb.
Azərbaycan-Rusiya turizm əlaqələrinin inkişafı haqqında Azərbaycan Turizm Assosiasiyasının prezidenti Nahid Bağırovla söhbət etdik. O qeyd etdi ki, yaxın zamanlarda Rusiyada Azərbaycan Dövlət Turizm Agentliyinin nümayəndəliyi fəaliyyət göstərəcək: “Rusiyadan ölkəmizə yetərincə turist gəlir. Qeyd olunan ölkədən ölkəmizə daha çox turist gələ bilər. Bunun üçün müəyyən işlər görmək lazımdır. Onu da deyim ki, bu gün Rusiyada minlərlə həmvətənimiz yaşayır. Onlar il ərzində 4 dəfə Azərbaycana gəlirlər. Belə olan halda, onlar da turist sayılır”.
Həmsöhbətimiz onu da bildirdi ki, Azərbaycan-Rusiya turizm münasibətlərinin inkişafı sevindiricidir: “Nəzərə almaq lazımdır ki, Rusiya tək Moskvadan ibarət deyil. Əhalinin sayına görə Rusiyanın böyük şəhərləri var. Həmin ərazilərə də təyyarə uçuşları olarsa, turist sayı daha artar. Bu sahədə turoperatorlar da maraqlı olmalıdır”.
İqtisadçı-ekspert Könül Nuriyeva bizimlə söhbətində qeyd etdi ki, Azərbaycan-Rusiya turizm münasibətləri artıq inkişaf dövrünü yaşayır: “Məlumdur ki, ölkəmizə gələn turistlər arasında ruslar hər zaman üstünlük təşkil edib. Bu, illər öncə də belə idi, indi də. Eynilə yerli vətəndaşlar Rusiyaya səyahət etməkdə hər zaman maraqlı olublar. Rusiya vətəndaşlarının ölkəmizə maraq göstərməsi səbəblərindən biri Azərbaycanın təbiəti və buradakı sabitlikdir”.
Həmsöhbətimizin sözlərinə görə, rusların ölkəmizə maraq göstərməsi səbəblərindən biri də sərhəd-keçid məntəqələrində maneələrin aradan qaldırılmasıdır.
Günel CƏLİLOVA
