Pərviz Heydərov: “… qonşu ölkələrlə elektrik enerjisi sisteminin pararel çalışmasının… ”
Məlum olduğu kimi, sentyabrın 27-də Heydər Əliyev Mərkəzində IX Azərbaycan-Rusiya Regionlararası Forumunun rəsmi açılış mərasimi olub. Mərasimdə Azərbaycan Respublikasının Prezidenti İlham Əliyev və Rusiya Federasiyasının Prezidenti Vladimir Putin iştirak ediblər.
Prezident İlham Əliyev forumda çıxışı zamanı bir sıra məsələlərə toxunub. O qeyd edib ki, iki ölkə arasında qarşılıqlı investisiyalarla əlaqədar layihələr həyata keçirilir: "Biz burada da müsbət dinamikanı görürük. Energetika, neft-qaz sahələrində çox möhkəm əlaqələr mövcuddur. Biz mənim Rusiya Federasiyasına rəsmi səfərim çərçivəsində “Rossneft” ilə SOCAR şirkətləri arasında əməkdaşlıq barədə mühüm sənəd - müqavilə imzaladıq. Eləcə də 20 ildən artıqdır ki, Azərbaycanda “LUKoil” şirkəti uğurla işləyir, bizim üçün mühüm investordur. Elektroenergetika sahəsində bizim enerji sistemləri paralel rejimdə işləyir. Biz mənim sentyabr səfərim çərçivəsində yüksək gərginlikli elektrikötürücü xəttin ikinci növbəsinin tikintisi ilə bağlı məsələləri müzakirə etdik. Bu xəttin tikintisi elektrik mübadiləsini daha çox nizama salmağa və bu sahədə üçüncü ölkələrlə əlaqələri genişləndirməyə imkan verəcək”.
Azərbaycan və Rusiyanın elektroenergetika sahəsində enerji sistemlərinin paralel rejimdə işləməsinin ölkələrə nə verdiyini öyrənmək məqsədilə ekspertə müraciət etdik.
İqtisadçı-ekspert Pərviz Heydərov “Bakı-Xəbər”ə açıqlamasında qeyd etdi ki, keçmiş SSRİ dönəmində respublikaların bütün elektroenergetika sistemi birgə olub: “Elektrik enerjisində problem yarandıqda, elektrik enerjisi ilə təminatda çatışmazlıq halı baş verdikdə, bu, istehlakçılar tərəfindən hiss olunmurdu. Çünki ümumi elektroenergetika sistemi vahid sistem xarakteri daşıdığından, bu, digər respublikaların hesabına ödənilirdi”.
Həmsöhbətimizin sözlərinə görə, son illər ərzində Azərbaycanda elektrik enerjisi istehsalı sahəsində xeyli irəliləyiş əldə olunub: “Yaxın dövrə qədər kənar ölkələrdən elektrik enerjisi idxal etmişik. Bir neçə ay öncə baş verən məlum hadisə göstərdi ki, ölkənin elektroenergetika sistemində ciddi problemlər mövcuddur. Bu vəziyyətin özü bir çox detalları üzə çıxarmaqla yanaşı, qonşu ölkələrlə elektrik enerjisi sisteminin pararel çalışmasının qənaətbəxş sayıldığını göstərdi”.
P.Heydərov onu da qeyd etdi ki, qonşu ölkələrlə müqayisədə ən böyük iqtisadi potensiala malik, o cümlədən elektroenergetika sahəsində inkişaf etmiş ölkə məhz Rusiyadır: “Bu səbəbdən də Rusiya ilə bizim elektroenergetika sistemimizin paralel çalışması mühümdür. Bu, Rusiya ilə yanaşı, Azərbaycanın elektrik enerjisi sahəsinə müsbət təsir edəcək”.
Günel CƏLİLOV
