Əli Əlirzayev: “Rusiya həm siyasi, həm də iqtisadi baxımdan Azərbaycan üçün strateji müttəfiqlərdən biridir”
“Ticari əlaqələr Azərbaycan-Rusiya əməkdaşlığının vacib istiqamətlərindən biridir. Rusiya Azərbaycan idxalı üçün əsas tərəfdaşlardandır və Rusiya bizim qeyri-neft məhsullarının ixracında ilk yeri tutur”.
Bu fikirləri iqtisadiyyat naziri Şahin Mustafayev IX Azərbaycan-Rusiya Regionlararası Forumu və Rusiya-Azərbaycan İşguzar Şurasının iclasında deyib. Nazir bildirib ki, Azərbaycan ikitərəfli əlaqələrin gələcək inkişafında daha da maraqlıdır: “Belə formatda keçirilən tədbirlər işgüzar dairələr arasında birbaşa əlaqələrin qurulması və qarşılıqlı faydalı layihələrin həyata keçirilməsi üçün mümkün əməkdaşlıq sahələrinin müəyyənləşdirilməsi baxımından əlverişli platformadır".
Ş.Mustafayev onu da qeyd edib ki, Azərbaycan Rusiya iqtisadiyyatına 1 milyard dollardan çox, Rusiya isə Azərbaycan iqtisadiyyatına 4 milyard dollardan artıq investisiya qoyub. Onun sözlərinə görə, Azərbaycanda təqribən 700 Rusiya kapitallı şirkət fəaliyyət göstərir.
Qeyd edək ki, Rusiya ilə Azərbaycan arasında çox böyük tarixi, mədəni və iqtisadi əlaqələr var. Eyni zamanda, Rusiya qonşu dövlətlərdən biridir. Ekspertlərin bildirdiyinə görə, həm xarici ticarət dövriyyəsində, həm də qarşılıqlı investisiya qoyma baxımından Rusiya öncül yerlərdən birini tutur.
Azərbaycanın Rusiyaya, eynilə qeyd olunan ölkənin ölkəmizə investisiya yatırmasının nə kimi perspektivi var?
İqtisadçı-ekspert Əli Əlirzayev “Bakı-Xəbər”ə açıqlamasında qeyd etdi ki, hazırda Azərbaycan Rusiyada, Rusiya da Azərbaycanda böyük investisiya qoyuluşları həyata keçirir: “Bəllidir ki, Rusiyada iki milyon azərbaycanlı, Azərbaycanda isə 200 mindən çox rus yaşayır. Azərbaycan böyük logistik mərkəzə çevrilməkdədir. Rusiya da bu məsələdə önəmli ölkələrdən biridir. Qeyri-neft sektorunun inkişafında Rusiya Azərbaycan üçün önəmli bazardır. Bizim məhsullar üçün Rusiya bazarları vacib və çox əhəmiyyətlidir”.
Həmsöhbətimizin sözlərinə görə, Rusiya həm siyasi, həm də iqtisadi baxımdan Azərbaycan üçün strateji müttəfiqlərdən biridir: “Nəzərə almalıyıq ki, Rusiya Azərbaycanın qeyri-neft ixracında əsas tərəfdaşdır. Azərbaycanın 1,5 milyard dollardan çox qeyri-neft ixracının 34 faizi Rusiyanın payına düşür. Bu isə o deməkdir ki, Rusiya ilə Azərbaycan arasında qeyri-neft ixracı təxminən yarım milyard dollardır. Azərbaycanın ixrac etdiyi aqrar məhsulların 90 faizdən çoxu Rusiya bazarına göndərilir. Nəticədə Rusiya qeyri-neft, eləcə də aqrar məhsulların ixracında əsas tərəfdaş rolunu qoruyub saxlamaqdadır. Rusiya Azərbaycan üçün regionda iqtisadi layihələrin reallaşdırılması baxımından strateji müttəfiqlərdən biridir. Azərbaycanın Rusiyada sərmayəsi var”.
Günel CƏLİLOVA
