Azər Allahverənov: “Sevindirici haldır ki, Azərbaycan yoxsulluğun 5 faizdən aşağı endirilməsinə nail olub”
Məlum olduğu kimi, Azərbaycan yoxsulluğun 5 faizdən aşağı endirilməsinə nail olan 29 ölkə arasındadır. Bu sözləri Milli Məclisin Aqrar siyasət komitəsinin sədri Eldar İbrahimov bir neçə gün öncə "Azərbaycanda Dayanıqlı İnkişaf Məqsədlərinin (DİM) həyata keçirilməsində Milli Məclisin (MM) rolu” mövzusunda beynəlxalq konfransda deyib.
Deputat bildirib ki, qloballaşmanın intensivləşməsi dünyada yeni çağırışlar doğurur, yeni çağırışlara cavab vermək isə dövlətlər və hökumətlər qarşısında vacib tələblərdən biri kimi dayanır.
Komitə sədri vurğulayıb ki, ötən müddət ərzində ölkə Prezidenti tərəfindən bu yöndə, o cümlədən Dayanıqlı İnkişaf Məqsədləri (DİM) ilə bağlı Dövlət Proqramı və digər bu tipli dövlət proqramları qəbul olunub.
E.İbrahimov vurğulayıb ki, Azərbaycanın həyata keçirdiyi bu işlər BMT-nin Ərzaq və Kənd Təsərrüfatı Təşkilatı, eləcə də digər beynəlxalq qurumlar tərəfindən yüksək qiymətləndirilib.
Azərbaycanın yoxsulluğu 5 faizdən aşağı endirən 29 ölkədən biri olması ekspertlər tərəfindən də müsbət dəyərləndirilir.
Ekspert Azər Allahverənov “Bakı-Xəbər”ə açıqlamasında qeyd etdi ki, son illər ölkədə aparılan islahatlar nəticəsində əhalinin yaşayış səviyyəsi müsbətə doğru dəyişib. Bu fakt beynəlxalq soğrularda da əks olunur. Yoxsulluğun azalması istiqamətində aparılan işlər artıq müsbət nəticəsini verir. Sevindirici haldır ki, Azərbaycan yoxsulluğun 5 faizdən aşağı endirilməsinə nail olub.
Həmsöhbətimizin sözlərinə görə, ölkədə sosial rifahın yüksəlməsi yoxsulluğun səviyyəsinə təsir edir: “Səhiyyə, təhsil və məşğulluq üzrə qiymətləndirmə aparılır. Məlumdur ki, səhiyyə, təhsil və sahələr üzrə dövlət tərəfindən müəyyən proqramlar həyata keçirilir. Həmin proqramlar sayəsində əhalinin rifahının günü-gündən artdığının şahidi oluruq. Təbii ki, bu da ümumi qiymətləndirmədə özünü göstərir. Açıqlanan son məlumatlar görə, əhalinin yaşayış tərzinin inkişaf etməsi nəticəsində ölkəmizdə yoxsulluq səviyyəsi müsbətə doğru dəyişir”.
Müsahibimizin sözlərinə görə, sosial rifahın yüksəlməsi yoxsulluq dərəcəsinin dəyişməsinə səbəb olur.
Günel CƏLİLOVA
