Fikrət Yusifov: “Bu səbəbdən yaxın gələcəkdə qeyri-neft sektorunda ixracın həcminin əhəmiyyətli dərəcədə artacağı gözlənir”
Bu il Azərbaycanda Avropa şirkətlərinin sayı 300-dən 385-ə qədər artıb. Bunu Avropa İttifaqının (Aİ) Azərbaycandakı nümayəndəliyinin rəhbəri Kestutis Yankauskas Naxçıvan Muxtar Respublikasında Avropa İttifaqı Gününə həsr olunmuş mətbuat konfransında deyib.
O qeyd edib ki, Aİ ilk dəfə olaraq Naxçıvanda belə genişmiqyaslı tədbir təşkil edib. Bu tədbirdə Aİ-nin, 17 səfiri də daxil olmaqla, 60 nümayəndəsi iştirak edir.
K.Yankauskas əlavə edib ki, bəzi Avropa şirkətləri artıq Naxçıvan MR-də fəaliyyət göstərir və enerji, kənd təsərrüfatı kimi sahələrə sərmayələr yatırırlar.
Nümayəndəliyin rəhbəri daha sonra qeyd edib: “Aİ Azərbaycanın böyük tərəfdaşıdır. Aİ Azərbaycanın həm neft, həm də qeyri-neft sektorunda böyük sərmayəçidir. Biz Azərbaycanı etibarlı tərəfdaş kimi çox yüksək qiymətləndiririk”.
Bütövlükdə bu il Azərbaycanda Avropa şirkətlərinin sayının əhəmiyyətli dərəcədə artması təsadüfü deyil. Məsələ ondadır ki, Prezident İlham Əliyev Avropa ölkələri və Avropa İttifaqı ilə bağlı fəal siyasət aparır. Almaniya kansleri Angela Merkelin Bakıya səfəri, Prezident İlham Əliyevin Xorvatiyaya və digər Avropa ölkələrinə səfərləri, bu yay NATO-nun və AB-nin sammitləri çərçivəsində keçirilən bir sıra görüşlər, qəbul olunan qərarlar Avropa şirkətlərinin Azərbaycana yönəlik marağının artmasına öz təsirini göstərir. Bu baxımdan sözügedən faktorların əhəmiyyətini ekspertlər necə dəyərləndirir?
Məsələyə münasibət bildirən iqtisad elmləri doktoru, professor Fikrət Yusifovun sözlərinə görə, bütün bunlarda Prezident İlham Əliyevin rolu böyükdür: “Bu gün müasir Azərbaycan regionun sürətlə inkişaf edən dövləti kimi təkcə Avropanın deyil, dünyanın siyasi müstəvisində ciddi söz sahibinə çevrilib. İndi Azərbaycan özünün reallaşdırdığı enerji strategiyası ilə Avropanın enerji təhlükəsizliyini təmin edən ən etibarlı tərəfdaşa çevrilir. Bununla da Azərbaycan praktiki olaraq Qərblə tərəfdaşlığın yeni formatını müəyyənləşdirir. Bu, Azərbaycanı dünya siyasət meydanında daha güclü görünməyə, hər kəsi özü ilə daha çox hesablaşmağa vadar edən yeni bir formatdır. Avropa İttifaqı Azərbaycanla əməkdaşlığa həmişə böyük önəm verib. Çünki Azərbaycan Cənubi Qafqaz regionununun lider dövlətidir. Azərbaycan özünün enerji resursları, iqtisadi və hərbi potensialından dolayı coğrafi yerləşməsi ilə kifayət qədər əhəmiyyətli bir mövqeyə malikdir. Qərblə Şərq arasında ticarət əlaqələrinin Azərbaycan üzərindən aparılması iqtisadi cəhətdən hər iki tərəf üçün çox önəmlidir. Elə bu səbəbdəndir ki, Azərbaycan üzərindən qədim İpək Yolunun bərpasında Avropa ölkələri çox maraqlı idilər. Bundan heç də az əhəmiyyət kəsb etməyən daha mühüm bir məsələ isə Avropanın enerji təhlükəsizliyi məsələlərinin həllində Azərbaycanın iştirakıdır. İndi Aİ ölkələri ilə iqtisadi əlaqələrin hərtərəfli inkişafı üçün geniş bir meydan yaranır. Son illərAzərbaycan hökuməti qeyri-neft sektorunun sürətli inkişafını təmin edə biləcək çox ciddi addımlar atır. Bu səbəbdən yaxın gələcəkdə qeyri-neft sektorunda ixracın həcminin əhəmiyyətli dərəcədə artacağı gözlənir. Belə olan halda məhsullarımızın bizim üçün ən önəmli bazarlardan biri olan Avropa ölkələrinin bazarında daha geniş bir şəkildə təmsil edilməsi imkanları yaranacaq. İndi biz Avropaya ekoloji cəhətdən təmiz olan meyvə-tərəvəz məhsulları və digər ərzaq məhsulları çıxarmaqla bu bazarda öz yerimizi möhkəmləndirə bilərik. Bunun üçün bütün imkanlar mövcuddur. Bu yolla yaxın gələcəkdə Avropa bazarlarında Azərbaycan brendi öz nüfuzunu tam formalaşdıra bilər.
Azərbaycan hökumətinin və ilk növbədə Prezident İlham Əliyevin apardığı düşünülmüş daxili və xarici siyasət bu gün Avropa iş adamları üçün Azərbaycanı münbit bir biznes mühitinə çevirib. Yaxın gələcəkdə ölkəmizə Avropa ölkələrindən daha çox kapital axını baş verəcək. Çünki Azərbaycan bunun üçün Avropa ilə əlaqələri genişləndirməklə yanaşı, biznes mühitini də kifayət qədər münbitləşdirir”.
Vidadi ORDAHALLI
