Qida Təhlükəsizliyi Agentliyi Azərbaycanda istehsal olunan ət məhsullarının halal və ya haram olması ilə bağlı heç bir rəy verə bilməz. Trend-in məlumatına görə, bunu bu gün keçirdiyi mətbuat konfransında qurumun sədri Qoşqar Təhməzli deyib.
O bildirib ki, Agentlik ət məhsullarının tərkibində donuz ətinin olub-olmaması ilə bağlı məlumat verə bilər: "Məhsulun içərisində donuz ətinə aid hər hansı komponentin olub-olmamasını təsdiqləmək üçün ekspertiza keçirə bilərik. Qida Təhlükəsizliyi Agentliyi yalnız məhsulun mənşəyini təyin edir və onun içərisində olan komponentlər haqqında rəy verir".
Q.Təhməzlinin sözlərinə görə, halallıq anlayışı könüllü qərar veriləcək məsələdir: "Bütün müsəlman ölkələrində dini qurumlar müəssisələrdə ətlərin dini ayinlərə uyğun şəkildə kəsilməyinə nəzarəti həyata keçirə bilir".
“Azərbaycan Qida Təhlükəsizliyi Agentliyində yaradılan mobil dəstək proqramı vasitəsilə vətəndaşlar quruma qida sahəsində olan pozuntuları çatdıra biləcəklər” deyən Qoşqar Təhməzli bildirib ki, bu proqram ictimai nəzarəti artırmaq məqsədilə istifadəyə verilir: "Artıq may ayında keçirilən tədbirdə biz onu nümayiş etdirdik. 7 il müddətinə qida təhlükəsizliyinə dövlət nəzarəti istiqamətində layihə hazırlanıb. Dünyada elə bir ölkə yoxdur ki, orada 100 faiz təhlükəsiz qida olsun".
Q.Təhməzli qeyd edib ki, mobil dəstək proqramı ilə vətəndaşlar istirahət zonalarında, yaşadıqları ərazilərdə, eləcə də ölkə daxilində istənilən ərazidə qida təhlükəsizliyinin pozuntusu halı ilə rastlaşarsa, bu barədə Agentliyə dərhal məlumat verə biləcəklər:"Video və ya foto çəkib göndərdikləri zaman biz məsələni araşdırdıqdan sonra müvafiq tədbirlər görüləcək".
Qoşqar Təhməzli deyib ki, qida istehsalı sahələrində sahibkarlıq subyektlərində işləyənlər tibbi müayinədən keçəcəklər. Onun sözlərinə görə, həmin əməkdaşların hansı formada tibbi müayinədən keçməsi bilavasitə sahibkarlıq subyektlərinin rəhbərlərinin üzərinə düşür: "Bu iş Səhiyyə Nazirliyi ilə birgə həyata keçiriləcək. Biz sadəcə dövlət nəzarətini icra edəcəyik. Həmin işçilər Səhiyyə Nazirliyinin müvafiq tibbi mərkəzlərində tibbi müayinələrə cəlb olunacaq. Onlar tibbi kartlarla təmin olunacaqlar".
Azərbaycanda ət kəsimi yerlərində ətləri mənfi 4 dərəcədən kənarda saxlayan şəxslər cəzalandırılacaq. Bunu da Q.Təhməzli deyib.
Qurumun sədri isti havalarda ət kəsimi standartlarına nəzarətin artırılacağını bildirib: "İsti hava şəraiti ilə əlaqədar ətlərin soyuducudan kənar daşınması yolverilməzdir. Bu istiqamətdə dələduzluq edən şəxs ən sərt şəkildə cəzalandırılmalıdır. İsti hava şəraitində saxlanılan ət məhsullarının üzərində sağlamlığa zərərli proseslərin getməsinə münbit şərait yarana bilir. Bunun qarşısını almaq üçün tədbirləri artırırıq".
Q.Təhməzli qeyd edib ki, yeni ət kəsimi yerlərində qiymət artımı gözlənilmir: "Bəziləri bunun qiymət artımına səbəb olacağını deyir. Amma bu tədbirlərin qiymətə heç bir aidiyyəti yoxdur".
