Fikrət Yusifov: “Aqrar sahədə yaşanan yüksəliş hesabına biz nəinki daxili bazarın tələbatını öz istehsalımız hesabına ödəyirik, eyni zamanda kartof da daxil olmaqla, bir çox tərəvəz məhsulunu ixrac edirik”
Qonşu ölkə Türkiyədə kartofun satış qiyməti yüksəlib. Hazırda qonşu ölkənin bazarlarında kartofun qiyməti 2,5-3,5 lirə təşkil edir. Mağazaların rəflərində isə 4,5-6 lirəyədir. Məlumat üçün bildirək ki, ötən ay kartofun qiyməti 1,8 lirə olub. Bir ay ərzində kartof 94 faiz bahalaşıb.
Türkiyənin iqtisadiyyat naziri Nihat Zeybekçinin açıqlamasına görə, kartofun qiymət yüksəlməsinin səbəbi təsərrüfatlara düşən xəstəlikdir. O, qiymətləri aşağı salmaq üçün kartof və soğan idxal edəcəklərini açıqlayıb: “Soğan və kartofun qiymətində artımla əlaqədər inflyasiya ilə mübarizədə çox güclü addımlarımız olacaq”.
Qeyd edək ki, Azərbaycana idxal olunan Türkiyə məhsulları arasında kartof da var. O ki, qaldı bahalaşmanın yerli bazara təsir edib-etməyəcəyinə, rəsmi statistikaya görə, mövsümdə 135,4 min ton (66,6 faiz çox) kartof yığılıb.
Ekspertlərin fikrincə, Türkiyədə kartofun qiymət qalxmasının ölkəmizdə təsiri baş verməyəcək. Çünki Azərbaycanın kartof sahəsində məhsuldarlığı bu il kifayət qədərdir. Qiymətlər də yüksək deyil. Onu da nəzərə almaq lazımdır ki, son zamanlar Azərbaycana daha çox İrandan kartof gətirilir və qiymətlər də kifayət qədər məqbuldur.
Türkiyədə kartofun bir kilosu təxminən 3 manatdır. Azərbaycanda isə 1 manatdan belə aşağıdır.
Türkiyədə kartofun satış qiymətinin yüksəlməsinin Azərbaycana təsir edib-etməyəcəyi barədə fikir bildirən professor, iqtisadçı Fikrət Yusifov “Bakı-Xəbər”ə açıqlamasında qeyd etdi ki, son illər ölkəmizdə kartof istehsalı getdikcə artır. Aqrar sahədə yaşanan yüksəliş hesabına biz nəinki daxili bazarın tələbatını öz istehsalımız hesabına ödəyirik, eyni zamanda kartof da daxil olmaqla, bir çox tərəvəz məhsulunı ixrac edirik: “Məlumat üçün bildirim ki, bu gün Azərbaycanda kartof istehsalının ümumi həcmi bir milyon tona yaxınlaşır. Ötən il 60 min tondan çox kartof ixrac etmişik. Bu isə o deməkdir ki, bu məhsulla bağlı heç bir problemimiz yoxdur. O üzdən, qiymətdə hər hansı dəyişikliyin baş verməsi gözlənilmir”.
Həmsöhbətimiz hesab edir ki, Türkiyədə kartofun satış qiymətinin yüksəlməsinin Azərbaycana heç bir təsiri olmayacaq. Çünki yerli istehsal daxili bazarı ödəməklə yanaşı, xarici bazarı da təmin edir. Azərbaycanda kartof sahəsində məhsuldarlıq müsbət səviyyədədir.
Günel CƏLİLOVA
