Fikrət Yusifov: “Cənub Qaz Dəhlizi” layihəsinin tam istifadəyə verilməsindən sonra SOCAR-ın maliyyə imkanları bir qədər də genişlənəcək və...”
Audit olunmuş maliyyə hesabatlarına əsasən, 2017-ci ildə SOCAR ümumi gəlirlərini 78 faiz artıraraq, 92,6 milyard manata çatdırıb. SOCAR-dan verilən məlumata görə, şirkətin xalis mənfəəti 2016-cı illə müqayisədə 6 dəfəyə yaxın artaraq, 2,09 milyard manata yüksəlib. SOCAR ümumi aktivlərini 16 faiz yüksəldərək , 61,3 milyard AZN-ə çatdırıb. Ümumilikdə, hesabat ilində şirkətin maliyyə nəticələri neft sənayesi böhranından əvvəlki səviyyəni üstələyib.
SOCAR-ın prezidenti Rövnəq Abdullayev 2017-ci ildə əldə edilən göstəriciləri qiymətləndirərək deyib ki, ötən ilin maliyyə nəticələrinə əsasən, SOCAR artıq qlobal neft sənayesində baş vermiş böhrandan əvvəlki nailiyyətlərini üstələyə bilib: “Bu yüksək göstəricilər Azərbaycan neftçilərinin peşəkarlığı, fədakarlığı və işə məsuliyyətli yanaşması sayəsində əldə olunub. SOCAR öz gəlirini artıq yalnız Azərbaycan neftinin satışından deyil, daha çox üçüncü tərəflərin neft-kimya məhsullarının satışından əldə edir. Bu da, SOCAR olaraq, həyata keçirdiyimiz davamlı inkişaf strategiyasının effektivliyinin bariz göstəricisidir”.
Son 10 ildə SOCAR-ın ümumi gəlirləri 20 dəfəyə yaxın, xalis mənfəəti isə 4 dəfədən çox artıb. Qeyd edilən dövrdə şirkətin ümumi aktivləri 5 dəfəyə yaxın yüksəlib, o cümlədən, cari aktivləri təqribən 8 dəfə, uzunmüddətli aktivləri isə 4 dəfə artıb.
O da məlumdur ki, SOCAR beynəlxalq miqyasda əlaqələrini get-gedə daha da genişləndirir. Bir sıra ölkələrdə investisiya layıhələri həyata keçirir. Təsadüfi deyil ki, ötən ilin noyabrında Prezident İlham Əliyev SOCAR-ın bu yöndə fəaliyyətini yüksək qiymətləndirib. Onun fikrincə, Dövlət Neft Şirkəti böyük beynəlxalq şirkətə çevrilib: “Yəni bir neçə il bundan əvvəl mənim tərəfimdən qarşıya məqsəd qoyulmuşdur ki, SOCAR böyük beynəlxalq neft şirkətinə çevrilməlidir. Biz bu məqsədlə SOCAR-ın fəaliyyətini genişləndirdik, bir çox müəssisələr SOCAR-a verildi. Bu gün həm ölkə daxilində, həm xaricdə Azərbaycan Dövlət Neft Şirkətinin çox böyük fəaliyyəti var. Digər ölkələrdə, Avropa ölkələrində, yaxın qonşuluqda SOCAR-ın çox böyük işləri, sərmayəsi var”.
Bütün bunlar və digər uğurlar SOCAR-ın uğurlu beynəlxalq şirkətə çevrilməsində necə rol oynayır?
Məsələyə münasibət bildirən iqtisad elmləri doktoru, professor Fikrət Yusifov buna bir neçə kontekstdən yanaşdı: “SOCAR bu gün dünyanın nüfuzlu neft şirkətlərindən birinə çevrilib. SOCAR Azərbaycan şirkəti olaraq bir sıra beynəlxalq layihələrdə iştirak edir. Neft kontraktlarında əsas podratçı təşkilatlardan biridir. SOCAR-ın uğurları o qədər böyükdür ki, adı BP və dünyada tanınan digər böyük şirkətlərlə yanaşı çəkilir. Neftin hasil olunması və emalında yüksək texnologiyalardan istifadə edir. Şirkətin fəaliyyət coğrafiyasının getdikcə genişlənməsi onu dünyanın bir çox ölkəsində daha yaxından tanıda bilib. Onun aktivlərinin və xalis mənfəətinin ildən-ilə daha da artması şirkətin fəaliyyətinin səmərəli təşkil edilməsinin məntiqi nəticəsi kimi dəyərləndirilməlidir. Azərbaycanda belə nüfuzlu bir şirkətin olması ölkəmizin iqtisadi qüdrətinin göstəricilərindən biridir. Bu gün ehtiyac olarsa, şirkət öz nüfuzuna söykənərək, hökumətin zəmanəti olmadan belə çox asanlıqla istənilən maliyyə institutundan kreditlər götürə bilər. “Cənub Qaz Dəhlizi” layihəsinin tam istifadəyə verilməsindən sonra SOCAR-n maliyyə imkanları bir qədər də genişlənəcək və beynəlxalq aləmdə onun nüfuzu daha da artacaq. Hesab edirəm ki, SOCAR-ın əldə etdiyi uğurlar davamlı olacaq”.
Vidadi ORDAHALLI
