Ruslan Atakişiyev: “O baxımdan bu yöndə səslənən çağırışlara müsbət yanaşıram”
“Dünya Bankı (DB) 2018-ci ildə Azərbaycanda maliyyə qanunvericiliyində dəyişikliklər edilməsinə ümid bəsləyir. Belə ki, bu, iqtisadiyyata yeni sərmayələr cəlb edilməsinə imkan yaradar”. Bunu mətbuata açıqlamasında Dünya Bankının Cənubi Qafqazda maliyyə və özəl sektor üzrə ölkə əlaqələndiricisi Anjela Priqojina bildirib.
Onun sözlərinə görə, hazırda Azərbaycanda “Maliyyə bazarlarının tənzimlənməsi haqqında” yeni qanunun qəbul edilməsi barədə iş aparılır. Eyni zamanda, bununla bağlı normotiv sənədlərdə dəyişikliklər hazırlanır. Həmçinin, bankların, sığorta şirkətlərinin hesabatlarının, ehtiyatlarının və fəaliyyətinin digər aspektlərinin tənzimlənməsi üzrə sənədlər üzərində iş aparılır. Açıqlamadan o da məlum olub ki, ödəniş xidmətləri üzrə yeni qanun üzərində iş gedir: “Belə ki, bu, problemli borcların və aktivlərin məhkəmədənkənar tənzimlənməsi mexanizmlərinin tətbiqinə imkan yaradacaq. Maliyyə bazarlarının tənzimlənməsi formatı 2007-2008-ci il böhranından sonra əsaslı şəkildə dəyişib. Bir çox ölkələrdə, həmçinin, Azərbaycanın yaxın qonşularında qanunvericiliyə, normativ-hüquqi bazaya bəzi dəyişikliklər edilib. Belə ki, bu dəyişikliklər maliyyə təsisatlarına risqli kapitalların idarə olunması üzrə məlumatların şəffaf şəkildə təqdim edilməsi yönündə tələblər qoyur”.
DB təmsilçisi onu da bildirib ki, Azərbaycan, həmçinin, maliyyə institutlarının etibarlılıq, rəqabət, səmərəliliyinin artırılması, iqtisadiyyata investisiyaların cəlb edilməsi, əmanətçilərin və investorların etibarını qzanmaq üçün bu istiqamətdə islahatları sürətləndirməlidir.
Maraqlıdır, ekspertlər maliyyə qanunvericiliyinə dəyişikliklərin edilməsi fonunda, iqtisadiyyata yeni sərmayələrin cəlb edilməsi imkanlarını necə dəyərləndirirlər?
Məsələyə münasibət bildirən İqtisadi Resursların Öyrənilməsi Mərkəzinin sədri Ruslan Atakişiyevin sözlərinə görə, maliyyə qanunvericiliyinə yeniliklərin edilməsi ölkəyə investisiyaların cəlb olunmasına müsbət təsir edə bilər: “Maliyyə bazarlarının inkişafı, investisiya mühiti ilə bağlı dünyada dəyişən vəziyyətlə bağlı olaraq, mütəmadi olaraq, hər zaman qanunvericilikdə təkmilləşməyə ehtiyac var. Çünki dünyada böyük rəqabət var. Rəqabətqabiliyyətli məhsul istehsalı üçün də sahibkarlıq mühiti inkişaf etməlidir. Sahibkarlığın inkişafında əsas mərhələlərdən biri də sahibkarın investisiya və maliyyə təminatıdır. İnvestisiya mühitinin inkişafı, birmənalı şəkildə, sözügedən amillərdən asılıdır. Yəni bütün bunlar bir-birilə əlaqəlidir. O cümlədən, maliyyə bazarlarının inkişafı diqqət mərkəzindədir. Azərbaycandakı bugünkü mövcud qanunvericilik də dünya təcrübəsi əsasında hazırlanıb və zaman-zaman yenilənir. Ancaq o da məlumdur ki, dünyada hər zaman yenilənmə baş verir və ölkələrdə sürətli rəqabət gedir. Sözügedən rəqabət zamanı mütəmadi olaraq beynəlxalq, regional və ölkənin özünün daxili iqtisadi inkişaf tələblərindən asılı olaraq, yenilənməyə hər zaman ehtiyac var. O baxımdan bu yöndə səslənən çağırışlara müsbət yanaşıram”.
Vidadi ORDAHALLI
