Rəşad Həsənov: “Daşınmaz əmlak bazarında sığortanın inkişaf etdirilməsi və icbari tibbi sığortanın ölkə üzrə əhatəliyinin genişləndirilməsi yolu ilə bir neçə il ərzində sığorta bazarının ümumdaxili məhsuldakı payı dəfələrlə artmış olar”
"Azərbaycanda sığorta sahəsinin aktivləri ümumi maliyyə aktivlərinin 2 faizini təşkil edir”. Bunu Bakıda keçirilən 6-cı Sığorta Konfransında Maliyyə Bazarlarına Nəzarət Palatasının baş icraçı direktoru İbrahim Alışov deyib. O qeyd edib ki, qarşıdakı illərdə qeyri-neft sektoru üzrə ÜDM-də sığortanın payının artırılması hədəflənib: "Maliyyə aktivlərində də sığortanın payının artırılması üçün müvafiq işlər görməliyik. Sığorta yığımlarının ÜDM-də payını 1,4 faizə çatdırmağı hədəfləyirik. Əlavə olaraq, 1600-ə qədər iş yerinin açılmasını hədəfləyirik”.
Qarşıdakı illərdə ÜDM-də sığorta payının 1,4 faizə çatdırılmasının mümkün olub-olmayacağı barədə fikir bildirən iqtisadçı-ekspert Rəşad Həsənov “Bakı-Xəbər”ə açıqlamasında bunları qeyd etdi: “Ümumdaxili məhsulda sığorta payının artması bəzi istiqamətlərdə atılacaq addımlardan asılıdır. Bəllidir ki, bu gün Azərbaycanda sığorta bazarı zəif inkişaf edib. 10 il əvvəllə müqayisə etsək, Azərbaycanda sığorta bazarının inkişaf etdiyini görərik. Amma hazırkı şərtlər daxilində digər ölkələrlə müqayisə aparsaq, geridə qaldığımızı müşahidə edərik. Bir sıra istiqamətlərdə sığorta bazarını inkişaf etdirmək üçün həm hüquqi bazanın təkmilləşməsinə, eyni zamanda, xarici investorların iştirakının təmin olunmasına ehtiyac var. Sığorta bazarının inkişaf etməməsi səbəblərindən biri məhz təşkilat və şirkətlərin nüfuzunun zəif olması, eyni zamanda, sığortaya inamın aşağı səviyyədə olması ilə bağlıdır. Şirkətlərin nüfuzunun inkişaf etməsi, etimadın qazanılması üçün xarici təcrübədən istifadəyə ehtiyac var. Bu səbəbdən də xarici investorların bu prosesdə iştirakını təmin etmək lazımdır”.
Həmsöhbətimizin sözlərinə görə, iqtisadiyyatın əhəmiyyətli sektorlarından biri kənd təsərrüfatıdır. Təəssüf ki, bu günə qədər aqrar sektorda sığortanı istənilən səviyyədə təşkil edə bilmirik: “Aqrar sığortada yalnız sığortalanma ümumi dövriyyənin 5 faizi həcmindədir. Bu isə olduqca kiçik göstəricidir. Həmçinin, səhiyyə sahəsində də vəziyyət istənilən səviyyədə deyil. Dünyada sığorta bazarında səhiyyə sahəsinin xüsusi rolu var. Demək olar ki, sığortada ən böyük payı məhz səhiyyə tutur. Ancaq ölkəmizdə səhiyyə sahəsində sığorta hələ də inkişaf etməyib. Məlumdur ki, icbari tibbi sığortanın ölkədə tam tətbiqi hələ də mümkün olmayıb. Eyni zamanda, könüllü səhiyyə sığortası da olduqca zəif inkişaf edib. Bir sıra hallarda şirkətlər öz əməkdaşlarının sığortalanmasında maraqlı deyillər. Hesab edirəm ki, bu sahədə icbariliyin təmin olunmasına ehtiyac var. Dövlət və özəl səhiyyə sığortası dünya standartlarına cavab vermir. Bu da sığorta bazarının kiçik olmasını şərtləndirən amillərdən biridir”.
R.Həsənov qeyd etdi ki, işsizliyin sığortası ilə bağlı icbari mexanizmlər formalaşdırılıb. 2018-ci il yanvarın 1-dən etibarən bu qanun qüvvəyə minib. Gözlənir ki, bu bazardan 85 milyon manata yaxın yığım olacaq.
Eyni zamanda, daşınmaz əmlak bazarında sığortanın inkişaf etdirilməsi bu sahənin inkişafına öz təsirini göstərər.
İqtisadçı onu da əlavə etdi ki, əmək bazarının leqallaşdırılması istiqamətində işlər dərinləşdirilərsə, icbari tibbi sığortanın ölkə ərazisində qısa müddətdə tətbiqi üçün görülən işlər intensivləşərsə, könüllü səhiyyə və daşınmaz əmlakın sığortası ilə bağlı fəaliyyətlər yüksək səviyyədə aparılarsa, sığorta yığımlarının payı artar: “Daşınmaz əmlak bazarında sığortanın inkişaf etdirilməsi və icbari tibbi sığortanın ölkə üzrə əhatəliyinin genişləndirilməsi yolu ilə bir neçə il ərzində sığorta bazarının ümumdaxili məhsuldakı payı dəfələrlə artmış olar. Xüsusilə səhiyyə, əmək bazarı, işsizlik, aqrar və daşınmaz əmlak sığortasında işlər ciddi şəkildə həyata keçirilərsə, sığorta bazarının qısa müddətdə böyüməsinin şahidi olarıq”.
Günel CƏLİLOVA
