Müslüm İbrahimov: “Aqroparkların yaradılması nəticəsində kənd təsərrüfatı məhsullarının istehsalında artım baş verir”
Aqrar sektorun inkişafı istiqamətində görülən işlər artıq öz müsbət nəticəsini göstərir. Açıqlanan statistik rəqəmlərə əsasən, Azərbaycanda aqrar sektor 9 faiz böyüyüb. Belə ki, bu ilin yanvar-may aylarında Azərbaycanda kənd təsərrüfatının ümumi məhsulunun faktiki qiymətlərlə dəyəri 1 770,4 mln. manat təşkil edib ki, onun da 1462,7 mln. manatı heyvandarlıq, 307,7 mln. manatı isə bitkiçilik məhsullarının payına düşür.
Əvvəlki ilin müvafiq dövrü ilə müqayisədə kənd təsərrüfatının istehsalı 8,5%, o cümlədən bitkiçilik məhsulları üzrə 52%, heyvandarlıq məhsulları üzrə isə 2,5% artıb. Hazırda ölkədə tarla işləri aparılır və iyunun 1-nə kimi 439 min hektar sahədə yazlıq bitkilərin səpini aparılıb. Bu dövrdə 72,7 min hektar sahədə dənli və dənli paxlalı bitkilər (ondan 30,0 min hektarı dən üçün qarğıdalı), 59,1 min hektar sahədə kartof, 67,4 min hektar sahədə tərəvəz, 20,4 min hektar sahədə bostan bitkiləri, 130,1 min hektar sahədə pambıq, 10,8 min hektar sahədə dən üçün günəbaxan, 9 min hektar sahədə şəkər çuğunduru, 3,4 min hektar sahədə tütün, 59,1 min hektar sahədə çoxillik otlar, 1,7 min hektar sahədə birillik otlar və 5,3 min hektar sahədə sair yazlıq bitkilər əkilib.
Ekspertlər ötən ilin analoji dövrü ilə müqayisədə aqrar sahədə inkişafın qeydə alınmasının gözlənilən olduğunu bildirirlər.
İqtisad elmlər doktoru Müslüm İbrahimov "Bakı-Xəbər"ə açıqlamasında qeyd etdi ki, son iki il ərzində kənd təsərrüfatı sahəsində inkişaf qeydə alınır. İnkişafın baş verməsinin əsas səbəbi dövlətin dəstəyi ilə bağlıdır. Əsasən məhsulların istehsalında artım baş verdi.
Həmsöhbətimizin sözlərinə görə, aqrar sahənin inkişafı ilə bağlı aidiyyəti qurumların qarşısında 3 əsas prinsip qoyulub: “Onlardan biri kənd təsərrüfatı məhsullarının artımı, digəri ixrac potensialının artması və sonuncusu isə iş yerlərinin açılmasıdır. Bunlar istehsalın artmasına birbaşa təsir göstərdi.
Onu da nəzərə almaq lazımdır ki, ixrac coğrafiyamız böyüyür. Tək Rusiya bazarında mövqeyimiz genişlənməkdə davam edir. Bu da istehsalçıların sayının artmasına təsir göstərdi”.
M.İbrahimov onu da əlavə etdi ki, kənd təsərrüfat sahələrinin səmərəli istifadə olunması sayəsində bu sahədə inkişaf baş verir: “Məlumdur ki, dövlət tərəfindən müəyyən tədbirlərin görülməsi nəticəsində illərlə becərilməyən torpaqlar istehsal prosesinə qoşuldu. Torpaqların səmərəli istifadə olunmasının isə aqrar sahənin inkişafında xüsusi rolu var”.
Həmsöhbətimizin sözlərinə görə, 2018-ci ilin ilk üç ayında Azərbaycana əsasən qeyri-neft sektoruna aid avadanlıqlar idxal olundu. Bu da daha çox məhsulun emal olunmasına şərait yaratdı. Həmçinin, aqroparkların yaradılması nəticəsində kənd təsərrüfat məhsullarının istehsalında artım baş verir. “Şəmkir” aqroparkının fəaliyyəti nəticəsində satıcı, alıcı və emalçılar səmərəli əməklə məşğul olurlar.
Onu da bildirim ki, Kənd Təsərrüfatı Nazirliyində baş verən dəyişikliklər bu sektorun inkişafına müsbət təsir göstərir.
Günel CƏLİLOVA
