Azərbaycan Mərkəzi Bankı (AMB) uçot dərəcəsini 11-dən 10 faizə endirib. “Trend”in məlumatına görə, bunu Mərkəzi Bankın sədri Elman Rüstəmov deyib.
O qeyd edib ki, AMB, həmçinin, faiz dəhlizinin yuxarı həddini 14-dən 12 faizədək azaldıb: "Faiz dəhlizinin aşağı həddi isə 8 faiz səviyyəsində saxlanıb".
E.Rüstəmov əlavə edib ki, Mərkəzi Bank uçot dərəcəsini azaltmağı davam etdirməyi planlaşdırır.
Qeyd edək ki, bundan əvvəl, aprelin 9-da AMB uçot dərəcəsini 13 faizdən 11 faizə endirib.
Ümumilikdə ilin əvvəlindən artıq üçüncü dəfədir ki uçot dərəcəsi azaldılır. Belə ki, Mərkəzi Bank fevralda uçot dərəcəsini 15-dən 13 faizə endirmişdi.
Azərbaycan Mərkəzi Bankı 2018-ci ildə orta illik inflyasiya üzrə proqnoza yenidən baxmağı planlaşdırır. Mərkəzi Bankın sədri Elman Rüstəmov belə deyib.
E.Rüstəmov bildirib ki, proqnoza 9 ayın yekunu üzrə yenidən baxmaq planlaşdırılır: "Bildiyiniz kimi, inflyasiya üzrə proqnozlar hökumətlə birgə hazırlanır. Hazırda biz ilin sonuna proqnoz göstəricilərini dəyişməməyi qərara almışıq. Artıq yay mövsümünə keçmişik və yayda inflyasiya göstəricilərinin daha da azalacağı istisna deyil".
Qeyd edək ki, 2017-ci ildə Azərbaycanda inflyasiya 12,9 faiz təşkil edib.
Azərbaycan Mərkəzi Bankının sədri Elman Rüstəmov deyib ki, ABŞ Federal Ehtiyat Sisteminin (FES) uçot dərəcəsini artırması Azərbaycan manatına birbaşa təsir göstərməyəcək.
E.Rüstəmov qeyd edib: "FES-in dərəcəni artırmasının bizə birbaşa təsiri yoxdur, lakin dünya iqtisadiyyatı üçün bu, mühüm göstəricidir. Azərbaycan maliyyə bazarı dünya bazarına hələ elə də güclü inteqrasiya olunmayıb, buna görə də FES-in qərarı ölkəmizdə yalnız psixoloji təsirə səbəb ola bilər".
Xatırladaq ki, ABŞ Federal Ehtiyat Sistemi iyunun 12-13-də keçirilən iclasın yekunu üzrə baza faiz dərəcəsini 0,25 faiz bəndi – illik 1,5-1,75 faizdən 1,75-2 faizədək artırıb.
Baş bankirin sözlərinə görə, hazırda Azərbaycan manatının devalvasiyası üçün heç bir əsaslı səbəb yoxdur. E.Rüstəmov bildirib ki, hazırda neftin orta illik qiyməti 70 dollardır, bu da ötən ilin analoji dövrünün göstəricisindən 30 faiz çoxdur: "Neftin yüksək qiyməti ölkənin strateji valyuta ehtiyatları və AMB-nin valyuta ehtiyatlarının artmasına səbəb olub. Belə ki, strateji valyuta ehtiyatları 2,1 milyard dollar artıb. Daxili bazarda strateji valyutaların artımı göstərir ki, bazarda təklif tələbi ötür. Bu balansa diqqət yetirmək lazımdır".
Baki-xeber.com
