"Azərbaycan Gömrüyü: bu gün və sabahın çağırışları" mövzusunda jurnalistlər üçün keçirilən seminarın ikinci günündə bir sıra məsələlərə toxunulub. Seminarda ilk çıxış edən Dövlət Gömrük Komitəsinin Fəaliyyətin Qiymətləndirilməsi və İnkişaf Proqramları Baş İdarəsi rəisinin birinci müavini Anar Süleymanov bildirdi ki, hazırda elektron hökumət portalı üzərindən 14 elektron gömrük xidməti göstərilir.
Onun sözlərinə görə, 2016-cı ildən bu istiqamətdə görülən işlərin nəticəsi olaraq ölkədə bu gün elektron gömrük xidmətləri yüksək səviyyədədir: “ Transsərhəd kağızsız ticarətin həlli prosesi isə nisbətən daha az tətbiq edilir. Artıq Özbəkistan, Rusiya, Gürcüstan və İran İslam Respublikası ilə məlumatların mübadiləsi xidməti göstərilir. Hazırda elektron TİR xidməti də tamamlanmaqdadır. Bu xidmət tətbiq ediləndən sonra kağız üzərindən xidmətlər tam yığışdırılacaq”.
Komitə əməkdaşı onu da vurğuladı ki, Dövlət Gömrük Komitəsi sürətli poçt göndərişləri ilə bağlı layihəyə başlayır: “Layihə ilə bağlı poçt şirkətləri ilə əməkdaşlıq edib, məlumat mübadiləsi aparılır. Belə ki, göndərilən poçtla bağlı ilkin olaraq gömrük orqanlarına məlumat daxil olacaq, bu məlumat əsasında risq təhlilləri aparılaraq göndərilən poçtun yubandırılmadan sürətli keçidinin təmin olunmasına nail olunacaq”
A.Süleymanovun sözlərinə görə, Azərbaycan BMT-nin ticarətin asanlaşdırılması istiqamətində keçirdiyi sorğuda 3-cü yeri tutub: “120 ölkə arasında ticarətin asanlaşdırılması istiqamətində keçirilən sorğu əsasında 47 tədbir keçirilib. Ümumdünya Ticarət Təşkilatının sazişi əsasında 47 tədbirin keçirilməsi qərarlaşdırılıb. Azərbaycan bu sorğuda 3-cü yer tutub. Açıq dənizə çıxışı olmayan ölkələr arasında isə 75 faiz göstəricilə Azərbaycan birinci yerdədir”.
Seminarda çıxış edən Dövlət Gömrük Komitəsinin Gömrük Nəzarətinin Təşkili Baş İdarəsinin rəis müavini Səməd Qaralov bildirdi ki, Azərbaycan Gürcüstanla sərhəddə yeni sərhəd-keçid məntəqəsi inşa edəcək: “Yeni sərhəd-keçid məntəqəsi Ağstafa rayonunun Sadıxlı kəndinin ərazisində yerləşəcək və Asiya İnkişaf Bankının dəstəyi ilə inşa ediləcək. Yeni sərhəd-keçid məntəqəsi bütün xidmətləri əhatə edəcək. Buradan həm piyada, həm də minik və yük avtomobilləri istifadə edəcəklər. Buna yeni iqtisadi səbəblər mövcuddur: “Bütün dövlət qurumları bu məsələ ilə bağlı artıq razılıq veriblər. Yeni sərhəd-keçid məntəqəsinin inşa edilməsi Azərbaycanla Gürcüstan arasında yerləşən “Sınıq körpü” sərhəd-keçid məntəqəsindəki sıxlığı 40 faiz aradan qaldıracaq”.
Daha sonra çıxış edən Dövlət Gömrük Komitəsinin Gömrük Risqlərinin təhlili və Audit İdarəsi rəisinin müavini Razim Zamanov qeyd etdi ki, bu ilin 5 ayı ərzində yük nəqliyyat vasitələrinin 1026 marşrutdan çıxma faktının qarşısı alınıb: “Marşrutdan çıxma faktı ilə bağlı 33 halda İnzibati Xətalar Məcəlləsinə əsasən cərimə tətbiq olunub. Məlumat üçün bildirim ki, yük nəqliyyat vasitələrinin marşrutdan çıxma hallarında İnzibati Xətalar Məcəlləsinə uyğun olaraq fiziki şəxslər 50 manat, hüquqi şəxslər 100 manat cərimələnir”.
Günel CƏLİLOVA
