Fikrət Yusifov: “Bütün bu göstəricilər Azərbaycan iqtisadiyyatının sürətli inkişaf yolunda olduğunu əyani olaraq ortaya qoyur”
“Azərbaycan iqtisadi baxımdan özünü tamamilə təmin edən və heç bir iqtisadi çətinliyi olmayan ölkədir”. Bunu Prezident İlham Əliyev Rusiyanın TASS informasiya agentliyinə müsahibəsində deyib. Dövlət başçısı bildirib ki, ötən illər ərzində Azərbaycan uğurlu inkişafını davam etdirib.
O bunu konkret tutarlı arqumentlərlə əsaslandırıb: “Ölkəmizin sosial-iqtisadi inkişafı ilə bağlı çoxsaylı proqramlar həyata keçirilib. Nəzərdə tutduqlarımızın hamısı yerinə yetirilib. Bizim nailiyyətlərimiz beynəlxalq strukturlar tərəfindən də qiymətləndirilir. Biz iqtisadiyyatın yüksək dərəcədə şaxələndirilməsinə nail olmuşuq, yüz minlərlə yeni iş yeri yaradılıb, Azərbaycanda işsizlik təxminən beş faiz səviyyəsindədir. Yoxsulluğu da xeyli azalda bilmişik. Bu gün yoxsulluq göstəricisi 5,4 faiz həddindədir. Bütün bunlar bizim son illərdə həyata keçirdiyimiz və sanballı səmərə vermiş sosial-iqtisadi siyasətin nəticəsidir”.
Prezident İlham Əliyev əlavə edib ki, bizim fəaliyyətimizin başlıca istiqamətlərindən biri iqtisadi müstəqilliyin tam təmin edilməsi olub, bu, siyasi müstəqilliyin əsasıdır: “Ona görə ki, əgər ölkə iqtisadi cəhətdən asılıdırsa, onda müstəqil siyasət həyata keçirməkdə böyük çətinliklərlə üzləşə bilər və çox vaxt üzləşir. Buna görə də bu, bizim fəaliyyətimizin başlıca istiqaməti olub və bu gün Azərbaycan iqtisadi baxımdan özünü tamamilə təmin edən və heç bir iqtisadi çətinliyi olmayan ölkədir”.
Həqiqətən də iqtisadi baxımdan Azərbaycan təminatlı və çətinliyi olmayan ölkədir. Ötən 15 ildə ölkənin dinamik inkişaf etməsi buna gətirib çıxarıb.
Maraqlıdır, bəs ekspertlərin bununla bağlı dəyərləndirmələri nədən ibarətdir?
Məsələyə münasibət bildirən “Ekonomiks” Beynəlxalq İqtisadi Araşdırmalar Birliyinin sədri, iqtisad elmləri doktoru, professor Fikrət Yusifovun sözlərinə görə, Prezidentin bununla bağlı səsləndirdiyi fikirlər tam əsaslıdır: “Məsələ ondadır ki, bir ölkənin iqtisadiyyatı son 15 il ərzində 3,2 dəfə arta bilibsə, onun valyuta ehtiyatları ölkənin ümumdaxili məhsuluna bərabər bir səviyyədədirsə, xarici borcları isə ÜDM-in 20 faizi ətrafındadırsa, bu halda həmin ölkənin dövlət başçısının bu sözləri söyləməyə tam haqqı var. İndi Azərbaycan hökumətinin apardığı iqtisadi islahatların ali məqsədi ölkə iqtisadiyyatının neftdən asılılığını ən qısa zaman kəsiyində minimuma endirməkdən ibarətdir. Ölkə rəhbərliyinin postneft dövrünə qədəm qoymaqla bağlı verdiyi bəyanatdan heç üç il keçməyib ki, iqtisadiyyatın qeyri-neft sektorunda rekord nəticələr əldə olunub. Elə bunun nəticəsidir ki, ötən ilin yekunları üzrə ölkə iqtisadiyyatının qeyri-neft sektorundan ixracın həcmi 36,1 faiz artıb, cari ilin iki ayı ərzində isə qeyri-neft sənayesində 8,4 faiz artım qeydə alınıb. Real sektorun bütün sahələrində belə uğurlu nəticələr əldə olunmaqdadır. Bunu aqrar sektor, turizm və tranzit yükdaşımalar haqqında da məmnuniyyətlə demək mümkündür. Bu gün Azərbaycanda pambıq, barama, tütün və başqa kənd təsərrüfatı məhsullarının istehsalı 2-3 il bundan öncəkindən dəfələrlə artıqdır. Bu artım, demək olar ki, kənd təsərrüfatında istehsal olunan bütün məhsullara aiddir. Azərbaycan bu gün regionun nəhəng tranzit yükdaşımalar məkanına çevrilib. “Şimal-Cənub” nəqliyyat dəhlizi, Qərblə Şərqi birləşdirən Bakı-Tiflis-Qars dəmir yolu Azərbaycanın bu sahədəki uğurlarının əsasını təşkil edən xətlərdir. Turizmin inkişaf sürətinə görə bu gün Azərbaycan dünya birincilərindən birinə çevrilib. Ən qısa zaman kəsiyində Azərbaycana gələn turistlərin sayı dəfələrlə arta bilib. Bütün bu göstəricilər Azərbaycan iqtisadiyyatının sürətli inkişaf yolunda olduğunu əyani olaraq ortaya qoyur. Ölkə Prezidentinin Azərbaycanın iqtisadi durumuna verdiyi qiymətin əsasında dayanan işlər bunlardır”.
Vidadi ORDAHALLI
