Könül Nuriyeva: “Xarici turistlər daha çox bank kartları ilə alış-veriş etməyə üstünlük verirlər”
Turizm sosial-mədəni fəaliyyət növü olmaqla yanaşı, həm də səyahət zamanı insanların zəruri tələbatını təmin edən iqtisadiyyatın mühüm sahəsidir və onun gələcək inkişafı, təkmilləşdirilməsi ölkənin gəlirlərinin artmasına imkan yarada bilər.
Son illər istirahət üçün ölkəmizi seçən əcnəbi turistlərin sayı artır. Dünyanın müxtəlif ölkələrinin vətəndaşları gəzmək, istirahət üçün vətənimizi seçirlər.
Açıqlanan statistik rəqəmlərə əsasən, Azərbaycanda turistlər tərəfindən bank kartları vasitəsilə aparılan əməliyyatlar artıb. Azərbaycana gələn xarici vətəndaşlar tərəfindən bank kartları vasitəsilə cari ilin yanvar ayında 99,798,809 manat, fevral ayında 91,128,890 manat, ümumilikdə isə 190,927,699 manat məbləğində əməliyyat aparılıb.
Mədəniyyət və Turizm Nazirliyinin yaydığı məlumatda bildirilir ki, ötən ilin müvafiq dövrü ilə müqayisədə cari ildə xarici vətəndaşlar tərəfindən bank kartları vasitəsilə 31,565,965 manat, yəni 20% daha çox vəsait xərclənib.
Xatırladaq ki, 2017-ci ildə xarici vətəndaşlar Azərbaycanda bank kartları vasitəsilə 1,022,036,752 manat məbləğində vəsait xərcləmişlər.
Onu da qeyd edək ki, Azərbaycan vətəndaşları tərəfindən isə xaricdə 2 ay ərzində 179,521,339 manat məbləğində əməliyyat aparılıb. Xarici vətəndaşların Azərbaycanda xərclədikləri vəsaitin həcmi Azərbaycan vətəndaşlarının xarici ölkələrdə xərclədikləri vəsaitdən 11,406,360 manat daha çoxdur.
Azərbaycanda turistlər tərəfindən bank kartları vasitəsilə aparılan əməliyyatların artmasına münasibət bildirən iqtisadçı-ekspert Könül Nuriyeva “Bakı-Xəbər”ə açıqlamasında qeyd etdi ki, Azərbaycanda nəinki turizm sektorunda, o cümlədən qeyri-turizm sahəsində də irəliləyişlər baş verir: “Qeydə alınan inkişaf göstərir ki, biz ölkəyə çoxlu sayda turist qəbul edə bilərik”.
Həmsöhbətimizin sözlərinə görə, turistlər tərəfindən bank kartları ilə aparılan əməliyyatların həcminin artması turizm sektorunun inkişaf etməsi ilə bağlıdır. Digər səbəb isə bank sektorunda əməliyyatların keyfiyyətinin yüksəlməsidir: “Bu gün yüksək keyfiyyətli əməliyyatlar baş verir ki, xarici turistlər daha çox bank kartları ilə alış-veriş etməyə üstünlük verirlər. Xidmətlərin avtomatlaşdırılması, POS-terminalların qurulması və digər əməliyyatların sadələşdirilməsi statistikaya təsir edir. Onu da qeyd etmək lazımdır ki, Azərbaycanda turistlərə göstərilən xidmət keyfiyyətinin inkişaf etməsi, onlara qayğının artması turist axınına səbəb olur”.
Günel CƏLİLOVA
