Əli Əlirzayev: “Turizm sferası, otelçilik və digər bu kimi xidməd sektoruna ərəb sahibkarlarının marağı böyükdür”
Ölkəyə daha çox investisiya cəlb olunması və onun hesabına qeyri-neft sektorunun inkişaf etdirilməsi vacib məsələlərdən biridir. Çünki xarici investisiya ölkədə qeyri-neft sektorunun inkişafı baxımından mühüm əhəmiyyət kəsb edir. Nəzərə almaq lazımdır ki, xarici investisiya birmənalı şəkildə Azərbaycan iqtisadiyyatının diversifikasiyasında hədəf rolunu oynaya bilər. Ərəb ölkələri bu baxımdan böyük investisiya imkanlarına malikdirlər. Bir sıra ölkələr bundan məharətlə istifadə edirlər.
Bu arada məlum olub ki, mayın 1-dən 3-dək Bakıda Birinci Azərbaycan-ərəb investisiya və biznes forumu keçiriləcək. Forum Azərbaycan və ərəb ölkələrinin əməkdaşlığı assosiasiyası tərəfindən təşkil edilir. Tədbirdə ərəb ölkələrindən təxminən 300 sahibkar və investorun iştirakı gözlənir.
Qeyd edək ki, 2016 və 2017-ci illərdə körfəz ölkələrindən Azərbaycana gələn turistlərin tək sayında yox, həm də xərclədikləri vəsaitlərdə artım qeydə alındı. Bu da Azərbaycan iqtisadiyyatına müsbət təsir edib. Ərəb sərmayəsinin gəlməsi imkan verəcək ki, Azərbaycanda qeyri-neft sektorunun inkişafı hesabına ölkəyə daxil olan valyutanın həcmini artırmaq mümkün osun. Necə deyərlər, bu, valyuta bolluğunun yaradılması baxımından vacibdir. Azərbaycan üçün ərəb ölkələrindən investisiyanın cəlb olunması əsas hədəflərdən biridir. Prezident İlham Əliyevin ərəb dövlətlərinə səfəri, eyni zamanda, ölkəmizlə ərəb dövlətləri arasında münasibətlərin son illər daha da yaxşılaşması həmin ölkələrdən kapital cəlbi baxımından yeni imkanlar yaradır. Belədə ərəb kapitalı daxil olmaqla, Azərbaycan iqtisadi inkişafında xarici investisiyalar aparıcı olacaq. Son illər ərəb ölkələrinin Azərbaycana marağının artdığı müşahidə olunur. Bütün bunlarla yanaşı, Bakıda keçiriləcək Birinci Azərbaycan-ərəb investisiya və biznes forumu ölkəyə körfəz dövlətlərindən sərmayə axınının artmasında necə rol oynayacaq? Ekspertlərin bununla bağlı gözləntiləri nədən ibarətdir?
Məsələyə münasibət bildirən iqtisadçı-alim Əli Əlirzayevin sözlərinə görə, sözügedən forum ərəb sərmayəsinin Azərbaycana gəlməsində mühüm rol oynayacaq: “Əvvəla istənilən xarici sərmayənin ölkəyə gəlməsinin faydası var. Bu zaman ölkənin potensialından istifadə olunur, yeni iş yerləri açılır, məşğulluğun səviyyəsi artır. Ona görə də ölkədə investisiya mühitinin yaranması vacib və zəruridir. Bunun üçün də ölkədə biznes forumlar keçirilməlidir. Müşahidələr göstərir ki, bu məqsədlə Azərbaycanda tez-tez belə forumlar keçirilir. Ərəb ölkələri ilə də belə bir tədbirin keçirilməsi təqdirəlayiqdir. Bu zaman Azərbaycanın turizm, kənd təsərrüfatı və digər ehtiyatları ərəb sərmayədarlarına təqdim olunacaq. Kapital axını üçün mövcud olan imkanlar müzakirə olunacaq. Bu da bir müddət sonra Azərbaycana ərəb ölkələrindən böyük sərmayənin gəlməsinə səbəb olacaq. Nəzərə almaq lazımdır ki, ərəb ölkələri ilə münasibətlər yaxşıdır. Ərəb ölkələri ilə Azərbaycan arasında iqtisadi əlaqələrin genişlənməsi təkcə əmtəə və mal dövriyyəsinin artması ilə yox, həm də xidmət sferasının inkişafı ilə əlaqədardır. Ərəblər dünyada bu və ya digər sahibkarlıq növü ilə məşhurlaşıblar. Turizm sferası, otelçilik və digər bu kimi xidməd sektoruna ərəb sahibkarlarının marağı böyükdür. Ona görə də sözügedən məsələlər mühüm əhəmiyyət kəsb edir. Hesab edirəm ki, bu istiqamətdə səylərimizi artırmalıyıq. Biz maksimum çalışmalıyıq ki, ərəb ölkələri Azərbaycana böyük həcmdə sərmayələr qoysunlar. Onların kapital imkanları böyükdür. Hesab edirəm ki, bu istiqamətdə görülən işlər iqtisadiyyatın bir sıra sahələrinin inkişafına öz müsbət təsirini göstərəcək”.
Vidadi ORDAHALLI
