Qadir Bayramlı: “Qarşıya qoyulan hədəflərdən biri də pambıq istehsalının daha da artırılmasıdır və sevindirici haldır ki, dövlətimiz buna nail olur”
“2015-ci il pambıqçılıq tarixində ən acınacaqlı il olub. Cəmi 18 min hektarda pambıq əkilmiş və cəmi 35 min ton pambıq tədarük edilmişdir. 2015-ci ilin sonlarından etibarən biz bu məsələ ilə ciddi məşğul olmağa başladıq”. Bu sözləri Prezident İlham Əliyev martın 26-da Bərdədə keçirilən pambıqçılığın inkişafı məsələlərinə dair respublika müşavirəsində deyib.
O qeyd edib ki, iki il ərzində Azərbaycanda pambığın tədarükü 35 min tondan 207 min tona çatdı: “Yəni biz iki il ərzində pambığın yığımını altı dəfə artıra bilmişik. Bu da son hədd deyil”.
Son iki il ərzində pambıq tədarükünün 35 min tondan 207 minə çatmasının səbəbləri nə ilə bağlıdır? Azərbaycan Dövlət İqtisad Universitetinin dosenti Qadir Bayramlı “Bakı-Xəbər”ə açıqlamasında qeyd etdi ki, kənd təsərrüfatının prioritet sahələrindən biri də pambıqçılıqdır: “Pambıq istehsalı ildən-ilə artır. 2017-ci ildə pambıq tədarükü 207 min tondan çox olub. Etiraf edək ki, bəzi aylarda havanın yağışlı olması pambıq istehsalına təsir göstərdi. Ancaq nəticə etibarilə pambıq tədarükünün 207 min tondan artıq olması Azərbaycan üçün önəmlidir”.
Həmsöhbətimizin sözlərinə görə, qarşıya qoyulan hədəflərdən biri də pambıq istehsalının daha da artırılmasıdır: “Azərbaycanın təbii şəraiti və torpağı imkan verir ki, pambıq tədarükü artsın. Ancaq buna baxmayaraq, bir sıra məsələlərin həll olunması vacibdir. Məsələn, suvarma sistemi yenidən qurulmalı, fermerlərin problemləri yerindəcə öyrənilib araşdırılmalıdır, həmçinin, onlar öz işini elə qurmalıdırlar ki, qeyd olunan məhsul sentyabr-oktyabr ayına qədər yetişə bilsin. Çünki həmin dövrdə yığılan pambıq daha keyfiyyətli olur. Məlumat üçün bildirim ki, pambığa su dəyəndən sonra onun keyfiyyəti xeyli aşağı düşür. Və bu hal fermerlərə zərər vurur”.
Q.Bayramlı onu da əlavə etdi ki, pambıqçılıq sahəsində elmi-tədqiqat işləri əvvəllər daha çox aparılırdı. Onun yenidən bərpa olunması lazımdır: “Həmçinin, pambıq emal müəssisələri artırılmalıdır. Aqrosığorta tətbiq olunmalıdır. Eyni zamanda, fermerlərə güzəştli kredit verilməlidir”.
Müsahibimiz qeyd etdi ki, pambıq sahəsində böyük inkişafın olması üçün intensiv təsərrüfat üsülüna keçmək lazımdır: “Belə olarsa, məhsuldarlıq yüksələr. Ölkəmiz 300-350 min ton pambıq tədarük edərsə, bu böyük inkişaf sayılacaq. Pambıq tədarükünün artması həm daxili tələbatı ödəyəcək, həm də ixracata öz töhfəsini verəcək”.
Günel CƏLİLOVA
