Mustafa Abbasbəyli: “Güzəştlər tək sığorta bazarı üçün yox, ümumi sahibkarlıq mühiti üçün önəmlidir və bu güzəştlər əmək münasibətlərinə müəyyən şəffaflıq gətirir, rəsmi müqavilələrin bağlanmasını, əməkhaqlarının rəsmi göstərilməsini təşviq edir”
Xəbər verildiyi kimi, Azərbaycan sığortaçıları Dövlər Sosial Müdafiə Fonduna müraciət etməyə hazırlaşırlar. Bu barədə “Azərbaycan Sığortaçılar Assosiasiyası” (ASA) İctimai Birliyində həyatın yaşam sığortası üzrə işçi qrupunun növbəti görüşü zamanı qərar verilib.
Qurumun sədri Mustafa Abbasbəyli media nümayəndələrinə açıqlamasında qeyd edib ki, sığortaçıların “Sosial sığortalar haqqında” Qanuna nəzərdə tutulmuş dəyişikliklə əlaqədar DSMF-yə müraciəti ünvanlanacaq. Müraciətdə qeyd olunması zəruri hesab olunan hallar vurğulanıb, mövcud durumun sığortaçıları qane etməsi ilə yanaşı, bunun sığorta sektoruna verdiyi töhfələrdən bəhs edilməsinin məqsədəmüvafiq olduğu bildirilib. Bununla yanaşı, məsələ ilə bağlı Maliyyə Bazarlarına Nəzarət Palatası və tələb olunduğu halda Milli Məclisə müraciət edilməsinə dair fikirlər səsləndirilib.
Xatırladaq ki, “Sosial sığortalar haqqında” Qanuna əsasən, 3 ildən az olmayan müddətdə həyatın yığım sığortasına qoşulmuş vətəndaşlar məcburi dövlət sosial sığortasından azaddırlar. DSMF həmin maddəyə düzəliş edilməsi üçün müvafiq addımlar atmaq niyyətindədir. Bu məsələ ilə bağlı ASA-nın nəzdində işçi qrupu formalaşdırılıb.
Məsələ ilə bağlı fikir bildirən Azərbaycan Sığortaçılar Assosiasiyasının (ASA) sədri Mustafa Abbasbəylinin sözlərinə görə, məhdudiyyətlər tətbiq edilərsə, həyat sığortası sahəsində müəyyən geriləmələr ola bilər: “Güzəştlər tək sığorta bazarı üçün yox, ümumi sahibkarlıq mühiti üçün önəmlidir. Bu güzəştlər əmək münasibətlərinə müəyyən şəffaflıq gətirir, rəsmi müqavilələrin bağlanmasını, əməkhaqlarının rəsmi göstərilməsini təşviq edir. Bu baxımdan güzəştlər önəmlidir. Biz imtiyazların olduğu kimi saxlanmasının tərəfdarıyıq. DSMF mövcud güzəştlərin gəlirlərini azaltdığından narahat ola bilər. Sığortaçıların hesablamalarına görə, DSMF-nin və Vergilər Nazirliyinin əldə edə bilmədiyi gəlirlər cüzidir. Biz son 3 ili təhlil etmişik. İmtiyazlar nəticəsində həm Dövlət Sosial Müdafiə Fondu, həm də Vergilər Nazirliyi ildə cəmi 35 milyon manat vergi və məcburi sosial sığorta haqlarını itirir. Bu məbləğin təxminən yarısı Vergilər Nazirliyinə, yarısı da DSMF-yə düşür. DSMF-yə düşən məbləğ büdcəsinin 0,8 faizini təşkil edir. Kifayət qədər kiçik məbləğdir. Buna görə biz düşünürük ki, mövcud imtiyazların olduğu kimi saxlanmasının sığorta bazarından daha çox sahibkarlığa töhfəsi var”.
Günel CƏLİLOVA
