Rəşad Həsənov: “Vergi ödəyiciləri dedikdə vergi nizamına əməl edən və üzərinə düşən öhdəlikləri layiqincə yerinə yetirən, həmçinin, hesabatlarında şəffaflığı təmin edən subyektlər nəzərdə tutulur”
"Vergilər. Şəffaflıq. İnkişaf" adlı konfransda çıxışı zamanı vergilər naziri Mikayıl Cabbarov bir sıra məqamlara toxunub.
O qeyd edib ki, ən doğru yol vergitutma bazasının genişləndirilməsi və vergi orqanı ilə vergi ödəyicisi arasında qarşılıqlı inam atmosferinin təmin edilməsidir: “Vicdanlı və vicdanı olmayan vergi ödəyicisi arasında fərq qoyulmalıdır və qoyulacaq. Vicdanlı vergi ödəyicisinin səhv etməyə haqqı var. Vergi orqanının vəzifəsi bu səhvin baş verməsi anını gözləmək deyil, bütün vasitələrlə öncədən onun qarşısını almaqdır. Belə yanaşma vergi ödəyicisinə göstərilən xidmətlər anlayışına yenidən baxılmasını və genişləndirilməsini tələb edir. Bu xidmətlər biznesə dəstək göstərilməsini də əhatə etməlidir”.
M.Cabbarov onu da vurğulayıb ki, Vergilər Nazirliyi vergidən yayınmanı fərqləndirə, bu yayınmanın bilməyərəkdən və ya məqsədli olduğunu müəyyən edə bilir: “Birincini müsbət qarşılayırıqsa, ikincini cinayət sayırıq və onun cəzasını vermək üçün əlimizdən gələni edəcəyik”.
Vergi ödəyiciləri arasında fərqin necə qoyulacağını müəyyən etmək məqsədilə iqtisadçı-ekspert Rəşad Həsənova müraciət etdik. O bizimlə söhbətində qeyd etdi ki, vergi ödəyiciləri arasında fərqin qoyulması mexanizmi beynəlxalq təcrübədə var: “Vergi ödəyiciləri dedikdə vergi nizamına əməl edən və üzərinə düşən öhdəlikləri layiqincə yerinə yetirən, həmçinin, hesabatlarında şəffaflığı təmin edən subyektlər nəzərdə tutulur. Onlar üçün müəyyən təşviqedici mexanizmlər hazırlanır. Bu zaman ilin vergi ödəyicisi, vergilərdə müəyyən güzəştlərin tətbiq olunması, vergi subyektləri üçün nəzərdə tutulan yoxlamaların sayının azaldılması və ya yoxlamalararası müddətin artırılması kimi qaydalar tətbiq olunur. Bu yolla vergi subyektləri daha şəffaf fəaliyyət göstərməyə cəlb olunur. Hansısa vergi müştərisi öz öhdəliklərini vaxtında yerini yetirmir, fəaliyyətində nöqsanlar varsa, bu subyektlər üçün daha ciddi vergi rejimi tətbiq olunur. Yoxlamalar zamanı obyektlərin müəyyənləşdirilməsində əsas prioritetlər sırasına daxil olur. Həmçinin, onlar təşviq məqsədilə nəzərdə tutulmuş güzəştlərdən məhrum olurlar. Bu da son nəticədə iki qrup arasında fərqləndirmənin təmin edilməsinə kifayət edir”.
Günel CƏLİLOVA
