Zakir Əhmədov: “Azərbaycanda bununla bağlı yetərincə xammal bazası və işçi qüvvəsi var”
Son illər Azərbaycanda tikinti sektoru əhəmiyyətli dərəcədə inkişaf edib. Paytaxtdan başlayaraq ölkənin ucqarlarına qədər tikinti işləri geniş vüsət alıb, yeni məktəblər, uşaq bağçaları, idman və yaşayış kompleksləri, inzibati binalar inşa olunub. Sosial evlərin tikintisinə başlanması bu sektoru daha da cəlbedici edib.
Bütün bunlarla yanaşı, ölkə iqtisadiyyatında müşahidə olunan inkişaf tendensiyası bu sektoru daha perspektivli sahəyə çevirir. Ümumilikdə, bunun bir səbəbi dövlətin artan maliyyə imkanıdırsa, digər səbəbi azad biznes mühitinin olması ilə bağlıdır. Belə olan halda, tikinti sektoru nəinki yerli sahibkarlar üçün, o cümlədən xarici investorlar üçün də sərfəlidir.
Prezident İlham Əliyev Almaniya İqtisadiyyatının Şərq Komitəsinin sədri Volfqanq Büxelenin başçılıq etdiyi nümayəndə heyəti ilə görüşdə bildirib ki, tikinti sahəsinə investisiya qoymaq niyyətində olan xarici şirkətlər bundan yalnız faydalana bilərlər. Prezident Azərbaycanda tikinti materialları sektorunun fəaliyyətinə toxunaraq ölkəmizdə iri sement zavodlarının inşa edildiyini vurğulaıb. O, ölkənin son 8 ildə sement idxal edən ölkədən ixrac edən ölkəyə çevrildiyini bildirib. Bu sahəyə iri həcmdə investisiyaların cəlb edildiyini deyən dövlət başçısı Azərbaycanın artan iqtisadi potensialını, qəbul edilmiş regional inkişaf proqramlarının yerinə yetirilməsini nəzərə alaraq, növbəti beşillik proqramda da dövlət tərəfindən maliyyələşdirilən mühüm infrastruktur və inşaat layihələrinin əksini tapacağını, mənzil inşaatının genişlənməsinin, yeni zavodların tikilməsinin, əhali artımının gələcəkdə sementə böyük tələbat yaradacağını bildirib: “Bu baxımdan bu sahəyə investisiya qoymaq niyyətində olan xarici şirkətlər bundan yalnız faydalana bilərlər”.
Maraqlıdır, ekspertlər xarici investorların tikinti sektoruna sərmayə qoyub faydalanmaq imkanlarını necə dəyərləndirirlər?
Məsələyə münasibət bildirən ekspert Zakir Əhmədovun sözlərinə görə, həqiqətən də xarici investorlar tikinti sektoruna sərmayə qoysalar, bundan faydalanacaqlar. O bunu bir sıra arqumentlərlə əsaslandırdı: “Məsələ ondadır ki, bir sıra parametrlərə görə Azərbaycanın tikinti sektoru xarici sərmayədarlar üçün cəlbedici ola bilər. Başlıca məsələ ondan ibarətdir ki, tikinti sektoru ilə bağlı ölkədə böyük potensial var. Bir sıra tikinti materialları ölkədə istehsal olunur ki, bu da tikinti işində maya dəyərin aşağı düşməsinə təsir göstərir. Digər tərəfdən, Azərbaycanda bununla bağlı yetərincə işçi qüvvəsi və ixtisaslı mütəxəssislər də var. Xaricdən işçi qüvvəsinin gətirilməsinə ehtiyac yoxdur. Məlum məsələdir ki, işçilər xaricdən gətirilsəydi, o zaman bu, xərclərin artmasına öz təsirini göstərərdi. Belə olan halda, bu, son nəticədə qiymətlərin bahalaşmasına gətirib çıxaracaqdı ki, beləliklə alıcılıq qabiliyyəti aşağı düşəcəkdi. O zaman xarici sərmayədarların zərərlə üzləşmək təhlükəsi yaranardı. Sadalanan risqlərin heç biri Azərbaycanın tikinti sektorunda yoxdur. Ölkə əhalisinin ilbəil artdığını, şəhər əhalisinin çəkisinin yüksək olduğunu, sənaye sektorunun inkişaf etdiyini nəzərə alsaq görərik ki, buna böyük tələbat var. Ona görə də xarici sərmayədarlar tikinti sektoruna investisiya qoysalar, bundan qazanc əldə edəcəklər. Bunun üstünlüklərindən biri də ondan ibarətdir ki, bazarda rəqabət artacaq və nəticədə tikintinin keyfiyyəti yüksələcək. Bir məqamı da unutmaq olmaz ki, tikinti bazarında fəaliyyət göstərən şirkətlərin heç də hamısı tələblərə uyğun fəaliyyət göstərmir. Bu səbəbdən müştərilər bir sıra problemlərlə üzləşirlər. Bu baxımdan düşünürəm ki, xarici şirkətlərin bu sahəyə sərmayə qoyması sözügedən problemin həllinə də müsbət təsir göstərəcək”.
Cəmilə QARAYEVA
