Samir Əliyev: “Düşünmürəm ki, uçot dərəcəsinin 15 faizdən 13 faizə enməsi kredit faizlərinə təsir göstərsin”
Məlum olduğu kimi, Mərkəzi Bank uçot dərəcəsini 15 faizdən 13 faizədək endirib. Mərkəzi Bankın sədri Elman Rüstəmov media nümayəndələrinə açıqlamasında qeyd edib ki, uçot dərəcəsinə il ərzində yenə baxılacaq.
Uçot dərəcəsinin azaldılmasi istisna deyil: “Faiz dəhlizinin yuxarı həddinin 18 faizdən 16 faizə, aşağı həddinin isə 10 faizdən 8 faizə endirilməsi barədə qərar qəbul edilib. Faiz dəhlizinin parametrlərinin dəyişdirilməsi haqqında qərar qəbul edilərkən Mərkəzi Bankın İdarə Heyəti xarici və daxili mühitdə baş verən prosesləri nəzərə alıb”.
Güman olunur ki, uçot stavkasının azaldılması depozit və kredir faizlərinin də aşağı düşməsinə səbəb olacaq.
İqtisadçı-ekspert Samir Əliyev “Bakı-Xəbər”ə açıqlamasında qeyd etdi ki, bu günə kimi uçot dərəcəsi salınan və ya qaldırılan zaman hər hansı bir dəyişiklik müşahidə olunmayıb: “Zamanla uçot dərəcəsi 2 faizdən 15 faizə qaldırılıb. Belə olan halda, kredit faizləri qalxmalı idi və ya salınan ərəfədə də kredit faizində hər hansı bir dəyişiklik baş vermədi. Dəyişikliyi biz müşahidə edə bilmirik. Bunun da səbəbi kredit faizlərinin real sektora bağlı olması ilə bağlıdır. Uçot dərəcəsi o zaman kredit faizinə təsir göstərə bilər ki, bankların kredit portfelində Mərkəzi Bank tərəfindən alınan kreditlərin payı əhəmiyyətli dərəcədə üstünlük təşkil etsin. Bizdə bu pay azdır və banklar üçün əlçatan deyil. Bu səbəbdən də Mərkəzi Bank uçot dərəcəsini salarkən və ya qaldırarkən kredit faizlərində fərq hiss olunmur. Düşünmürəm ki, uçot dərəcəsinin 15 faizdən 13 faizə enməsi kredit faizlərinə təsir göstərsin”.
S.Əliyev onu da bildirdi ki, kredit faizlərində dəyişikliyin olmaması iqtisadiyyatın real sektorunda risqlərin olması ilə bağlıdır. Həmin risqlərdən biri banklar tərəfindən verilən kreditlərin geri qaytarılmaması ilə bağlıdır. Bu risqlər aradan qaldırılarsa, kredit faizlərində azalma qeydə alına bilər.
Günel CƏLİLOVA
