Azərbaycan Mərkəzi Bankı 2017-ci ilin yekunlarına əsasən ölkənin tədiyə balansının cari əməliyyatlar hesabının profisitini ümumi daxili məhsulun 5 faizi həcmində gözləyir. “Trend”-in məlumatına görə, bunu Mərkəzi Bankın sədri Elman Rüstəmov mətbuat konfransında deyib.
Bu müsbət trendin 2018-ci ildə də saxlanacağını bildirən E.Rüstəmov deyib ki, Manatın tam üzən məzənnə rejiminə keçidi mərhələli şəkildə baş verməlidir. O qeyd edib ki, bu proses müəyyən vaxt və bir sıra tənzimləyici qərarların qəbul olunmasını tələb edir. Sədrin fikrincə, antiinflyasiya pul siyasəti, pul kütləsinin optimal idarə olunması, eləcə də 2017-ci ilin ortalarından manatın məzənnəsinin sabitləşdirilməsi inflyasiyanın birrəqəmli göstəricidə qalmasında vacib rol oynayıb. Bank sədri qeyd edib ki, proqnozlara əsasən, inflyasiyanın azalması davam edəcək və 2018-ci ilin sonunadək inflyasiya planlaşdırılan həddə çatacaq.
Mərkəzi Bankın rəhbəri onu da vurğulayıb ki, fiziki şəxslər arasında və biznes sektorunda, məzənnənin sabitləşməsi və faktiki inflyasiyanın azalması dinamikası daha aşağı inflyasiya proqnozlaşdırmağa əsas verir.
“Azərbaycan əhalisi kriptovalyutalarla əməliyyatlar zamanı ayıq-sayıqlığı itirməməlidir” deyən E.Rüstəmov bildirib: “Bazardakı son hadisələr göstərdi ki, kriptovalyutalar çox volatil alətdir və bu volatillik gələcəkdə də saxlanacaq”. Mərkəzi Bank rəhbəri bildirib ki, kriptovalyutaya investisiyalar çox risqlidir. “Bu, nizamlanmayan vasitədir”.
Qeyd edək ki, bir müddət əvvəl E.Rüstəmov AMB-nin kriptovalyutalara mühafizəkar yanaşdığını vurğulamışdı. Sədr onu da deyib ki, Azərbaycan Mərkəzi Bankı yeni fiskal və monetar qaydalara keçəcək. Onun sözlərinə görə, belə olan şəraitdə AMB yaranmış status-kvonu saxlamağa çalışacaq. "Bizim bazara əhəmiyyətli dərəcədə müdaxiləmiz yoxdur. Biz valyuta hərraclarında nə valyuta alırıq, nə də valyuta satırıq. Əsas məsələ hazırda banklara verdiyimiz svopların qaytarılmasıdır. Yeni fiskal və monetar qaydalara keçid çox mütərəqqi addımdır. Bu yeni fiskal və monetar siyasət qaydalı siyasətdir. Bu qaydalı siyasət həm fiskal, həm də monetar siyasətin koordinasiyasını yüksək səviyyəyə qaldıracaq. Bununla da məzənnənin iqtisadi risqlərə təsirinin aradan qaldırılmasını təmin edəcəyik", - deyə E.Rüstəmov vurğulayıb.
Xəbər xidməti
