Pərviz Heydərov: “Ölkə iqtisadiyyatının inkişafı istiqamətində görülən işlərin nəticəsi xarici agentliklər tərəfindən öz qiymətini alır”
Azərbaycan ABŞ-ın "The Heritage Foundation" Fondunun ənənəvi hazırladığı illik hesabatın iqtisadi azadlıq indeksində 1 pillə irəliləyərək 67-ci sıraya yüksəlib. Bu barədə fondun internet səhifəsində məlumat yayılıb.
Sənəd müəllifləri iqtisadi azadlığın təkcə gəlirlərə deyil, həm də insanların həyat tərzinə - rifahına, sağlamlığına, təhsilinə, yeniliklərə, sosial inkişafa, dövlət idarəçiliyinə, ətraf mühitə müsbət təsir göstərdiyini deyiblər.
Azərbaycan 100 ballıq qiymətləndirmə cədvəlində 64,3 bal toplayib. Bu da ötən illə müqayisədə 0,7 bal çoxdur. Müqayisə üçün deyək ki, Gürcüstan 16-cı (76,2 bal) , Türkiyə 58-ci (65,4 bal), Rusiya 107-ci (58,2 bal), İran 156-ci (50,9 bal) yeri tutub.
Azərbaycan iqtisadi azadlıq indeksində Asiya-Sakit okean regionundakı 43 ölkə arasında 14-cü sırada qərarlaşıb və İndoneziya, Hindistan kimi ölkələri qabaqlayıb. Qeyd edək ki, region ölkələri üzrə orta göstərici 61 baldan çoxdur.
Azərbaycanın iqtisadi azadlıq indeksində 1 pillə irəliləyərək 67-ci sıraya yüksəlməsinə münasibət bildirən İqtisadiyyat Nazirliyinin İqtisadi İslahatlar Elmi-Tədqiqat İnstitutunun aparıcı elmi işçisi Pərviz Heydərov “Bakı-Xəbər”ə açıqlamasında qeyd etdi ki, son zamanlar bir sıra beynəlxalq qurumlar tərəfindən Azərbaycanın mövcud iqtisadi vəziyyətinin qiymətləndirilməsi ilk hadisə deyil: “Əksər beynəlxalq reytinq agentlikləri tərəfindən ard-arda ölkə iqtisadiyyatının real vəziyyəti haqqında müsbət mövqe nümayiş etdirilir. Bütün hesabatlarda Azərbaycanın adının yüksəlməsini müşahidə edirik. Bu da təsadüfi deyil. Məlum olduğu kimi, 2014-cu ilin sonundan etibarən neftin qiyməti düşdükdən sonra ölkənin üzləşdiyi iqtisadi böhranla əlaqədar olaraq qeyri-neft sektorunun inkişafı istiqamətində hökumət tərəfindən tədbirlər həyata keçirilir. Bəllidir ki, qeyri-neft sektorunun inkişafı istiqamətində görülən işlər sürətlənib. 2016-cı ilin yanvar ayından etibarən bu hal daha intensiv xarakter alıb”.
Həmsöhbətimizin sözlərinə görə, görülən işlər sayəsində sahibkarlıq fəaliyyəti ilə məşğul olanların sayı da artıb. Bu kimi amillər göstərir ki, ölkədə investisiya şəraiti durmadan yaxşılaşdırılır. Sahibkarlıq fəaliyyəti ilə məşğul olanlar üçün müvafiq stimulverici tədbirlər həyata keçirilir. Bütün bunların nəticəsi beynəlxalq reytinq agentliyi tərəfindən öz qiymətini alır.
Günel CƏLİLOVA
