Elşən Həsənov: “Azərbaycanda nümayəndəliyi olan şirkətin əməkdaşlarının ABŞ-dakı həbsi konkret cinayət hadisəsi ilə bağlıdır”
Beynəlxalq audit şirkəti olan KPMG-nin ("Klynveld Peat Marwick Goerdeler") keçmiş altı rəhbər şəxsi yanvarın 29-da ABŞ-da həbs olunublar. ABŞ mətbuatının verdiyi məlumata görə, keçmiş auditorlar məxfi audit məlumatlarından sui-istifadədə ittiham olunurlar.
Bildirilir ki, KPMG rəsmiləri İctimai Mühasibat Uçotu Heyətinin (İMUH) işçilərini işə götürərək onlardan İMUH-un şirkətin auditi ilə bağlı planlarını öyrənərək məxfi məlumatları əldə ediblər. KPMG-dən məsələyə münasibət öyrənmək mümkün olmayıb.
“WallStreetJournal” yazır ki, tənzimləyicinin şirkətdə aparmaq istədiyi audit haqqında məxfi məlumatları ələ keçirdiklərinə görə ötən il KPMG-nin altı əməkdaşı işdən kənarlaşdırılıb.
Qeyd edək ki, KPMG “Böyük Dördlük” adlanan dünyanın 4 nəhəng audit şirkətlərindən biri olaraq, peşəkar xidmət təşkilatıdır. Gəlirlərinə və əməkdaşlarının sayına görə isə bu dördlükdə "Deloitte" , "PWC" və “Ernst & Young”dan sonra dördüncü yerdədir. Dünyanın bir çox yerində nümayəndəliyi olan xidmət şəbəkəsinin mərkəzi Niderland-Amsterdamda yerləşir və şirkətlərə audit, vergi və məsləhət xidmətləri təklif edir. Xatırladaq ki, “KPMG Azərbaycan limited” şirkətin Azərbaycandakı nümayəndəliyidir və 1998-ci ildən etibarən respublikamızda fəaliyyət göstərir.
Bu həbslərin arxasında hansısa məqsədlər ola bilərmi?
Təhlükəsizlik məsələləri üzrə ekspert Elşən Həsənovun qəzetimizə verdiyi məlumata görə, söhbət dünya miqyasında kifayət qədər tanınan, maliyyə sahəsində audit həyata keçirən qurum ilə bağlı yaşananlardan gedir: “Bizim mediada bu məlumat fərqli rakurslardan təqdim edildi. Bəzi yazılarda həbs olunan altı əməkdaşın Azərbaycanda çalışdığı yer alırdı. Digərlərində isə Azərbaycanda nümayəndəliyi olan şirkətin əməkdaşlarının həbsindən söhbət gedirdi. Mən araşdırdım, beynəlxalq mətbuatda həbs edilənlərin əvvəl Azərbaycanda fəaliyyət göstərib-göstərmədiyinə dair nəsə qeyd edilmir. Sizin bu sualın da məhz əməkdaşların Azərbaycanda fəaliyyət göstərməsilə bağlı yayılan xəbərlərə görə ortaya çıxdığı qənaətindəyəm. Onların həbsilə bağlı verilən məlumat bundan ibarətdir ki, hansısa maliyyə cinayəti törədiblər. Bunun detalları bizə bəlli olmadığı üçün, konkret hansısa fərziyələri irəli sürə bilmərik. Ancaq mənim əldə etdiyim məlumata görə, KPMG Azərbaycandakı bir necə banka audit fəaliyyəti göstərib. Yəni bu şirkətin fəaliyyət göstərdiyi ölkələrin sayı həddən artıq çox olduğu üçün, baş verən həbsin bizimlə hər hansı bir əlaqəsinin olduğunu düşünmürəm. Ancaq son vaxtlar bu şirkətlə bağlı Britaniya mətbuatında da neqativ fikirlər səslənirdi. İddialardan başlıcası Böyük Britaniyada müflisləşən hökumət layihələri üzrə əsas podratçı tikinti şirkətinin də auditinin KPMG tərəfindən aparılması ilə bağlı idi. Həmin audit rəyində qeyd edilib ki, sözügedən tikinti şirkəti 2019-cu ilə qədər tam sağlam olacaq.
Bir faktı da qeyd edim ki, KPMG son dövrlərdə öz müştəriləri barədə heç bir məlumat vermirdi. Bu baxımdan da hesab edirəm ki, Azərbaycanda nümayəndəliyi olan şirkətin əməkdaşlarının ABŞ-dakı həbsi konkret cinayət hadisəsi ilə bağlıdır. Yəqin ki, proseslərin gedişində bu barədə ətraflı məlumat veriləcək”.
Məhəmmədəli QƏRİBLİ
