Elman Məmmədov: “Bütün bunlar bir daha onu sübut edir ki, ölkəmizdə bu təbəqənin problemləri daim diqqət mərkəzində saxlanır”
“Bu il 20 min məcburi köçkün yeni evlərlə təmin ediləcək”. Bunu Prezident İlham Əliyev “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının dördüncü ilinin yekunlarına həsr olunan konfransda yekun nitqində deyib.
Dövlət başçısının sözlərinə görə, məcburi köçkünlər üçün yeni binaların, evlərin tikintisi davam etdiriləcək: “Bu məsələyə çox böyük diqqət göstərilir. Bu günə qədər 265 min köçkün yeni evlərlə, mənzillərlə təmin edilib. Keçən il biz Cocuq Mərcanlı kəndinin bərpasını təmin etdik. Bu tarixi hadisədir. Eyni zamanda, Şıxarx qəsəbəsində böyük şəhərcik tikilib - 1170 ailəlik, Cocuq Mərcanlıda isə 150 ailəlik. Bu layihələrin xüsusi əhəmiyyəti var. Çünki bu layihələr vaxtilə işğal edilmiş və ordumuz tərəfindən işğaldan azad olunmuş torpaqlarda icra edilib”.
Prezident vurğulayıb ki, bu layihələrin icrası, eyni zamanda, onu göstərir ki, Azərbaycan öz ərazi bütövlüyünü bərpa edəcək və dağıdılmış bu ərazilərdə yeni şəhərlər, qəsəbələr, kəndlər, məktəblər, yaşayış binaları, bütün infrastruktur tikiləcək: “Bu il 20 min köçkün yeni evlərlə təmin ediləcək. Keçən il biz 12 min köçkünü yerləşdirdik. Bu il 4 min ailəyə - ən azı 20 min köçkünə yeni evlər veriləcək. Beləliklə, evlərlə, mənzillərlə, yaxşı şəraitlə təmin ediləcək köçkünlərin sayı təqribən 290 minə yaxın olacaqdır. Ancaq bu, minimum proqramdır, əgər il ərzində imkan olarsa, biz bu sayı artıracağıq”.
Görünən odur ki, dövlətin məcburi köçkünlərə qayğısa ilbəil daha da genişlənir. Proseslərin belə davam etməsi ondan xəbər verir ki, bir neçə ildən sonra bütün məcburi köçkünlərin mənzil şəraiti yaxşılaşdırılacaq. Onlar yeni məzillə təmin olunacaq.
Sözügedən məsələni dəyərləndirən millət vəkili Elman Məmmədovun fikrincə, qaçqın və məcburi köçkünlərin sosial vəziyyətinin yaxşılaşdırılması hər zaman diqqətdə saxlanır: “Dövlət başçısı, həmişə olduğu kimi, bu il də onların problemlərinin diqqətdə saxlanacağını vurğulayıb. Bu çox əhəmiyyətlidir. Azərbaycanda qaçqın və məcburi köçkünlər dövlətin nəzarəti altındadır. Dövlətimiz onların qayğısına qalır və yaşayış səviyyəsini yüksəltmək üçün tədbirlər görür. Prezident İlham Əliyev rəhbərliyə başladığı ilk günlərdən çadır şəhərciklərinin ləğvi, qaçqınlar üçün yeni mənzillərin tikilməsi və işlə təminatı məsələlərinə şəxsən özü nəzarət edib. Ötən il məcburi köçkünlər üçün iki böyük qəsəbə salınıb. Görülən işlər nəticəsində çadır şəhərcikləri tamamilə ləğv edilib və qaçqın və məcburi köçkünlər üçün yeni mənzillər inşa edilib. Onların işlə təmin olunması üçün hər bir şərait yaradılır. 2017-ci ildə məcburi köçkünlər üçün iki böyük qəsəbə salınıb. Həmçinin, görülən bir sıra işlərin nəticəsi olaraq Cocuq Mərcanlı və Ağdərədən olan qaçqın və məcburi köçkünlərimiz öz torpaqlarına qayıtdılar. Bundan başqa, ötən il Bakı və Sumqayıt ətrafındakı ərazilərdə məcburi köçkünlər üçün minlərlə yeni ev tikildi. Yəni ümumilikdə götürdükdə, 2017-ci il qaçqın və məcburi köçkünlərin sosial vəziyyətinin yaxşılaşdırılması istiqamətində xeyli işlər həyata keçirilib. Ölkə başçısı bu haqda dəfələrlə qeyd edib ki, qaçqın və məcburi köçkün problemi hər zaman dövlətimizin diqqətindədir və torpaqlarımız işğaldan azad olunana və onlar öz yurd-yuvalarına qayıdana qədər bu belə də davam edəcək. Təsadüfi deyil ki, 2018-ci ilin dövlət büdcəsindən qaçqın və məcburi köçkünlərin mənzil şəraitinin yaxşılaşdırılması üçün 50 milyon manatdan artıq vəsait nəzərdə tutulub. Lazım gələrsə, hətta bu məbləğin artırılması üçün də müvafiq addımlar atılacaq. Bütün bunlar isə bir daha onu sübut edir ki, ölkəmizdə bu təbəqənin problemləri daim diqqət mərkəzində saxlanır”.
Vidadi ORDAHALLI
