Ruslan Atakişiyev: “Bu fəaliyyətin genişlənməsi və bütün sahibkarlıq subyektləri arasında daha da yayılması son nəticədə...”
“Bəlkə böyük biznes şirkətləri ilə bir görüş keçirsinlər və onları ailə biznesinə dəstək üçün bu proqrama cəlb etsinlər”. Bunu Prezident İlham Əliyev “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının dördüncü ilinin yekunlarına həsr olunan konfransda yekun nitqində deyib.
Onun fikrincə, dövlət iş adamlarına bir sıra şərait yaradır. Bunun müqabilində iri biznes qurumları öz sosial məsuliyyətini dərk etməlidirlər: “Dövlət həm siyasi dəstək, həm də maliyyə dəstəyi göstərir, iki milyard manatdan çox güzəştli kreditlər verilib. Fermerlərə bu qədər güzəştlər edilir, yanacaq, gübrə, subsidiyalar, texnika dövlət tərəfindən verilir. Fermerlər vergilərdən azaddırlar, təkcə torpaq vergisindən başqa. Ölkəmizdə biznes mühitinin yaxşılaşdırılması, islahatların aparılması istiqamətində bu qədər işlər görülür və beynəlxalq qurumlar da bunu qeyd edirlər. Bunun müqabilində iri biznes qurumları gərək öz sosial məsuliyyətini dərk etsinlər. Sosial məsuliyyət təkcə hansısa xeyriyyəçiliklə məşğul olmaq deyil. Sosial məsuliyyət, eyni zamanda, kiçik biznesə, ailə biznesinə dəstək göstərməkdir. Ona görə mən Prezident Administrasiyasına, müvafiq nazirliklərə, İqtisadiyyat Nazirliyinə, Kənd Təsərrüfatı Nazirliyinə, digər aidiyyəti qurumlara tapşırıram ki, bu məsələ ilə bağlı təkliflər hazırlasınlar. Bəlkə böyük biznes şirkətləri ilə bir görüş keçirsinlər və onları ailə biznesinə dəstək üçün bu proqrama cəlb etsinlər. Bu ədalətli olar. Böyük şirkətlər, xüsusilə dövlətdən, dövlət siyasətindən yararlanıb böyük vəsait əldə edən şirkətlər kiçik sahibkarlara dəstək verməlidirlər”.
O baxımdan iri biznes adamlarında sosial məsuliyyət hissini formalaşdırmaq üçün onlarla xüsusi bir müşavirənin nəticələrinə ekspertlər necə yanaşırlar? Məsələyə münasibət bildirən İqtisadi Resursların Öyrənilməsi Mərkəzinin direktoru Ruslan Atakişiyevin sözlərinə görə, Prezidentin bu təklifi tamamilə doğru yanaşmadır: “Sözügedən məsələnin bu şəkildə ölkə başçısı tərəfindən qabardılması tam yerinə düşür. Məsələ ondadır ki, inkişaf etmiş ölkələrdə artıq sahibkarlığın yeni bir dönəmi gəlir. O da sosial sahibkarlıqdır. Yəni sahibkarlıq subyektləri təkcə gəlir əldə etməklə deyil, sosial məsuliyyət çərçivəsində də öz fəaliyyətlərini həyata keçirməlidirlər. Ümumiyyətlə, bu həm də korporativ məsuliyyət deməkdir. Korporotiv sosial məsuliyyət firmanın xarici və daxili mühitinə düşən bütün tərəfdaşlarla birgə şirkətin əməkdaşlığı, onlara qarşı məsuliyyətli olması deməkdir. Şirkət hər hansı bir yerdə fəaliyyət göstərirsə, ətraf mühiti qorumalı, ekoloji təmiz avadanlıqların istifadəsini genişləndirməlidir. Eyni zamanda, öz sahəsinə uyğun gələn sferalarda bir sıra xeyriyyə tədbirləri həyata keçirməlidir. Məsələn, şirkət oyuncaq istehsal edirsə, uşaq bağçaları ilə işləməlidir. O cümlədən, dövlətə vergiləri vaxtında ödəməlidir. Sosial öhdəlikləri vaxtında yerinə yetirməlidir. Sosial məsuliyyətdən biri də KİV-lərlə yaxından əməkdaşlıq etmək və onlarla birgə işləməkdir. Ona görə də bununla bağlı ölkədə böyük biznes şirkətləri ilə xüsusi bir tədbirin keçirilməsinə ehtiyac var. Bu fəaliyyətin genişlənməsi və bütün sahibkarlıq subyektləri arasında daha da yayılması yolu ilə son nəticədə cəmiyyətdə özəl sektorun məsuliyyətinin artırılmasına nail olarıq. O üzdən, bununla bağlı təşəbbüsü alqışlayıram və hesab edirəm ki, bunun faydası olacaq”.
Vidadi ORDAHALLI
