Rəşad Həsənov: “Hazırda daha çox yüngül və yeyinti sənayesi, eyni zamanda kənd təsərrüfatı daha prioritet istiqamətlərdir”
Sahibkarlığa Kömək Milli Fondu 2018-ci ildə sahibkarlara güzəştli şərtlərlə 170 milyon manat kredit verəcək. Bu il aqroparkların yaradılmasına da maliyyə vəsaiti ayrılıb.
Sahibkarlığa Kömək Milli Fondunun icraçı direktoru Şirzad Abdullayev bildirib ki, fondun tarixində ilk dəfə olaraq ötən il dövlət büdcəsindən vəsait ayrılmadan investisiya layihələri maliyyələşdirilib: “2017-ci ildə fond tərəfindən 1953 sahibkara geri qaytarılan vəsaitlər hesabına 146 mln. manat güzəştli kredit verilib. Bu kreditlərdən istifadə etməklə investisiya layihələrinin reallaşdırılması 6600-ə yaxın yeni iş yerinin yaradılmasına imkan yaradır. Verilmiş kreditlərin 65%-i respublikanın regionlarının, 35%-i isə Bakı şəhərinin qəsəbələrinin payına düşür. Güzəştli kreditlərin 67,6%-i aqrar sektorun, 32,4%-i müxtəlif sənaye məhsullarının istehsalı və emalı sahələrinin inkişafına yönəldilib. Dövlətin güzəştli kreditləri hesabına maliyyələşdirilən 61 istehsal, emal və infrastruktur müəssisəsi 2017-ci ildə fəaliyyətə başlayıb. 2018-ci ildə daha 40 layihənin başa çatdırılması nəzərdə tutulur”.
Ş.Abdullayev bildirib ki, sahibkarların maarifləndirilməsi, nümunəvi investisiya layihələrinin təqdim olunması, güzəştli kreditlərin verilməsi ilə bağlı 2017-ci ildə 3800 sahibkarın iştirakı ilə 40 işgüzar forum keçirilib. Ümumilikdə, indiyədək layihələrinin ümumi dəyəri 4 mlrd. manatdan çox olan 34600 sahibkara 2,1 mlrd. manat güzəştli kredit verilib. O da məlum olub ki, 2018-ci ildə 15 aqropark istifadəyə veriləcək.
Bu il sahibkarlara veriləcək güzəştli kreditlərin həcminin artırılmasına ekspertlər necə yanaşırlar? Sahibkarların bu imkandan necə istifadə etmələri məqsədəuyğun sayılır?
Sözügedən məsələni dəyərləndirən iqtisadçı-ekspert Rəşad Həsənov sahibkarlara veriləcək güzəştli kreditlərin artırılmasına müsbət yanaşır. Onun fikrincə, qaydalara riayət edən sahibkarlar bu imkandan yararlana biləcəklər: “Güzəştli kreditlərin artırılması müsbət haldır. Biznes planı olmayan hər hansı sahibkar krediti ala bilmir. İlkin olaraq fəaliyyətin isitiqamətləri haqqında biznes planı hazırlanmalıdır. Buna uyğun olaraq, Sahibkarlara Kömək Milli Fondu tərəfindən güzəştli kreditlərdən istifadə imkanı yaranır. Hazırda Kredit Zəmanət Fondu yaradılıb. Kredit Zəmanət Fondu həm kreditlərə zəmanətin verilməsi, eyni zamanda mexanizmin təşviqində kredit faizlərinin müəyyən bir hissəsinin subsidiyalaşdırılması yolu ilə güzəştli kreditlərin verilməsinə kömək edəcək. Yəni bu qurumlar növbəti dövrlərdə kredit xərclərinin müəyyən qədər azaldılmasını və güzəştli kreditin əlçatanlığının artırılmasını təmin edəcəklər. Sahibkarların əldə etdikləri güzəştli kreditləri bir sıra sahələrə sərf etmələri məsləhətdir. Hazırda daha çox yüngül və yeyinti sənayesi, eyni zamanda kənd təsərrüfatı daha prioritet istiqamətlərdir. Xüsusilə də kənd təsərrüfatı daha çox ixrac potensiallıdır. Burada ilkin dövrlərdə məhsulun istehsalat prosesi, eyni zamanda onun ixracı, bazarların tapılması imkanları daha genişdir. Düşünürəm ki, bu istiqamətdə sahibkarlar müəyyən fəaliyyətlər həyata keçirə bilərlər. Eyni zamanda, turizm sektoruna sərmayə qoyulmalıdır. Prezident çıxışında bildirdi ki, 2016-cı illə müqayisədə 2017-ci ildə ölkəyə 500 mindən artıq turist gəlib. Bu, kifayət qədər ciddi bir rəqəmdir. Belə bir şəraitdə turizm sektorunda yeni çağırış və imkanlar formalaşır. Sahibkarlar daha keyfiyyətli və çevik xidmətlər təklif etməklə turizm bazarında öz fəaliyyət imkanlarını artıra bilərlər. Bu istiqamətlər hazırda daha çox prioritetdir. Digər tərəfdən, ağır sənaye sferasında fəaliyyət göstərən iri sahibkarlar da qeyd edilən imkanlardan istifadə edə bilərlər. Azərbaycanda hazırda ən çox boşluq olan sahələrdən biri də dərman istehsalı ilə bağlıdır. Bu sənaye çox zəif inkişaf edib. İstehlak olunan məhsulların 95 faizdən artığı idxal təyinatlı məhsullardır, xarici ölkələrdən gətirilir. Azərbaycan bazarında hazırda bu növdə yerli istehsal olan məhsullar yox səviyyəsindədir. Bu isə yeni imkanlar ortaya qoyur. Bu sahədə rəqabət qabiliyyətli, keyfiyyətli və standartlara uyğun məhsul istehsalı təmin edilərsə, bu fəaliyyətlə məşğul olan sahibkarlar da ciddi uğurlar əldə edəcəklər”.
Vidadi ORDAHALLI
