Məhəmməd Əsədullazadə: “Davosda bu kimi çıxış dünyaya bir mesajdır və ölkənin müstəqil siyasətinin dönməzliyini göstərir”
Məlum olduğu kimi, Davosda keçirilən növbəti Dünya İqtisadi Forumunda Azərbaycan Prezidenti İlham Əliyev xeyli sayda görüşlər keçirib və bir sıra panellərdə iştirak edib. Forum çərçivəsində keçirilən “Strateji baxış: Avrasiya” mövzusundakı interaktiv paneldə dövlət başçısı bir sıra suallara cavab verib. Həmçinin, bir sıra məsələlərə aydınlıq gətirib.
Prezident bildirib ki, Azərbaycanı müəyyən ölkələr əleyhinə kampaniyalara sürükləmək cəhdləri olub: “Biz hər zaman bitərəf qalmışıq. Biz heç kəsə qarşı oyun aparmırıq və heç bir risqli və milli maraqlarımıza uyğun olmayan kampaniyanın tərkib hissəsi deyilik. Yəni hücumların səbəblərindən biri bəzilərinin Azərbaycanı kiçik dövlət üçün artıq dərəcədə müstəqil hesab etməsidir. Bəzi QHT-lərin belə reytinqləri ölkəmizi gözdən salmaq, nüfuzumuza xələl gətirmək və Azərbaycanı qeyri-demokratik dövlət kimi təqdim etmək məqsədi daşıyır. Bu isə qətiyyən belə deyil. Bu gün biz həm siyasi, həm iqtisadi inkişafdan bəhs edirik. Bunlar ayrılmazdır. Azərbaycan iqtisadiyyatı rəqabətlilik qabiliyyətinə görə Dünya İqtisadi Forumu tərəfindən 35-ci yerə layiq görülürsə, bu, ölkədə azadlıqların təmin olunmasının yaxşı göstəricisidir. Davos Forumu bu yaxınlarda siyasətçilərə inamla bağlı yeni bir hesabat yaymışdır və Azərbaycan orada 20-ci yerdədir. İnkişaf etməkdə olan dövlətlərdə hərtərəfli inkişafa dair digər bir hesabatda Azərbaycan 3-cü yerdədir. Yəni bəzi QHT-lərin təqdim etməyə çalışdıqları məlumatlar doğru olsaydı, biz bu uğurlara nail ola bilməzdik. Biz məsələnin mahiyyətinə və real vəziyyətə baxmalı, Azərbaycanla bağlı müəyyən gözləntiləri və siyasi motivləri reallıqdan ayrı tutmalıyıq”.
“Azərbaycanı müəyyən ölkələr əleyhinə kampaniyalara sürükləmək cəhdləri olub” fikri ətrafında ekspert sorğusu keçirdik.
Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna bir neçə rakursdan yanaşdı: “Dövlət başçısının belə bir açıqlama ilə çıxış etməsi Azərbaycanın nə qədər mürəkkəb geosiyasi məkanda olduğunun göstəricisidir. Cənubi Qafqazın aparıcı və əhəmiyyətli ölkəsi olan Azərbaycan daim müəyyən güclərin maraq dairəsindədir. Burada Qərblə Rusiyanın maraqlarının toqquşması nəticəsində ölkəmizin manevr siyasəti, balanslaşdırılmış mövqeyi böyük güclərin toqquşmasından yan keçməyə imkan verir. Azərbaycanın balanslaşdırılmış siyasəti və bloklara qoşulmama siyasəti, görünür, bəzi dairələri çox ciddi şəkildə narahat edir. Həmin güc dairələri ölkəmizi İrana və Rusiyaya qarşı qoymaqla öz siyasi maraqlarından çıxış edirlər. Təbii ki, Azərbaycanın qonşularının əleyhinə hər hansı bir siyasətə qoşulmaması bəzi ölkələrin qərəzi ilə qarşılaşmağımıza səbəb olur. Prezidentin tezislərindən məlum olur ki, Azərbaycanı istəmədiyi şəkildə siyasətə qoşmaq cəhdləri uğursuz olsa da, digər spektrlərdə Azərbaycana təzyiqlər var. Davosda bu kimi çıxış dünyaya mesajdır və Azərbaycanın müstəqil siyasətinin dönməzliyini göstərir. Bu kimi tribunalarda çıxışlar beynəlxalq miqyasda ciddi şəkildə qəbul edilir və ölkəmizin bir daha prinsipiallığını göstərir. Azərbaycan hazırda regionda öz enerji daşıyıcıları ilə Avropanın enerji təhlükəsizliyinin təmin olunmasında əhəmiyyətli ölkədir. Enerji sahəsində müəyyən edilmiş siyasət bizə imkan verir ki, Avropanın aparıcı ölkələri və müttəfiqləri ölkəmizin ərazi bütövlüyü məsələsində, həll edilməmiş, regionun ən ağrılı problemi olan Qarabağ münaqişəsinin nizamlanmasında Azərbaycanın ədalətli mövqeyini dəstəkləsinlər. Azərbaycanın bu ciddi problemlərinə rəğmən, hər hansı geosiyasi maraqlar naminə digər ölkələrin siyasətinə uyğun siyasət aparılması qəbuledilməzdir”.
Vidadi ORDAHALLI
