Fikrət Yusifov: “Sumqayıtda müəssisələrin açılması bu məqsədləri güdür”
Bu il Sumqayıt Kimya Sənaye Parkında 6 müəssisə fəaliyyətə başlayacaq. Bu barədə İqtisadiyyat Nazirliyində keçirilən geniş Kollegiya iclasında nazir Şahin Mustafayev məlumat verib.
Onun sözlərinə görə, 2017-ci ildə Prezident İlham Əliyevin iştirakı ilə Sumqayıt Kimya Sənaye Parkında 4 müəssisə - “Aqrokimya Azərbaycan” MMC-nin pestisidlər istehsalı zavodu, “MST Engineering Services” MMC-nin təzyiqə davamlı xortum və fitinq birləşmələrinin istehsalı zavodu, “Alco Lubricant” MMC-nin sürtkü yağları istehsalı zavodu və “STDC” MMC-nin Data Mərkəzi açılıb, “AzerFloat” QSC-nin şüşə istehsalı zavodunun, “Azərxalça” ASC-nin yunəyrici-boyaq və “Tabaterra” QSC-nin tütün məmulatları istehsalı fabrikinin təməli qoyulub: “Beləliklə, Sumqayıt Kimya Sənaye Parkında hazırda fəaliyyətdə olan müəssisələrin sayı 6-ya çatıb. Sumqayıt Kimya Sənaye Parkında daha 6 müəssisə 2018-ci ildə fəaliyyətə başlayacaq. Ümumilikdə, Sumqayıt Kimya Sənaye Parkının 15 rezidenti var.
Sumqayıt Kimya Sənaye Parkının rezidentlərinin layihələrinin investisiya dəyəri 2,7 milyard ABŞ dollarıdır. Artıq layihələrə 1,9 milyard ABŞ dolları investisiya yatırılıb”.
Ş.Mustafayev onu da əlavə edib ki, hazırda Sənaye Parkında istehsalat və tikintidə 8400 işçi çalışır. Nazir qeyd edib ki, Sumqayıt Kimya Sənaye Parkına yeni rezidentlərin cəlb edilməsi istiqamətində işlər davam etdirilir.
Xatırladaq ki, 6 müəssisə qeyri-neft sənayemizin mühüm hissələri olacaq və Prezident İlham Əliyev Davos Forumunda qeyri-neft sənayesi üzrə ölkəmizdə inkişafın ötən il 4 faiz təşkil etdiyini, qeyri-neft sektoru üzrə inkişaf təmayülünün gələcəkdə də davam etdiriləcəyini bildirib.
Sumqayıtda fəaliyyətə başlayacaq kimya müəssisələri ölkə iqtisadiyyatında qeyri-neft sektorunun inkişafında necə rol oynayacaq? Sözügedən məsələni dəyərləndirən “Ekonomiks” Beynəlxalq İqtisadi Araşdırmalar Birliyinin sədri, professor Fikrət Yusifovun fikrincə, Sumqayıtda sənaye müəssisələrinin yaradılması iqtisadiyyatın neftdən asılılığının azaldılması istiqamətində aparılan işlərin bir parçasıdır: “Real sektorun inkişafı istiqamətində hökumətin proqram hədəfləri var. Bu müəssisələrin açılması da hədəflərin reallaşdırılması istiqamətində görülən işlərdir. İndiyə qədər nefti xam şəkildə satırdıqsa, artıq neftdən hazırlanan məhsulların həm daxili, həm də xarici bazarlara çıxarılması hədəflənib. Sumqayıtda müəssisələrin açılması da bu məqsədləri güdür. Yerlərdə sənaye zonalarının yaradılması, yeni müəssisələrin qurulması, nəticə etibarilə, iqtisadiyyatın neftdən asılılığının optimal həddə endirilməsini hədəfləyir. Son iki il ərzində iqtisadiyyatın inkişafında böyük yol xəritələri hazırlanıb. 2017-ci ildə qeyri-neft sektorunda ixracın həcmi 2016-cı illə müqayisədə təxminən 25 faizə qədər artıb. Bu rəqəm artıq onu deməyə əsas verir ki, real sektorun inkişafı istiqamətində görülən tədbirlər tədricən öz nəticələrini verməyə başlayır. Bütün bu görülən işlərin hamısının hədəfi ölkə iqtisadiyyatının neftdən asılılığını minimuma endirməkdir. İqtisadiyyat neftdən asılı olduğu vəziyyətdə ölkənin maliyyə vəziyyəti də bilavasitə neftdən asılı olur. Biz bunun çətinliklərini 2015-ci ildə manatın iki dəfə kəskin ucuzlaşması fonunda gördük. Ona görə də hökumət də bu vəziyyətə təkrar düşməmək üçün addımları hədəfləyib. Yaxın bir neçə il ərzində qeyri-neft sektorunda ixracın həcmini bir neçə dəfə artırmalıyıq ki, ölkənin maliyyə durumunun neftdən asılılığını aşağı sala bilək”.
Vidadi ORDAHALLI
