Rəsul Cahangirli: “Bəzi xarici dairələr belə rəy yaratmağa çalışırlar ki, guya...”
Xəbər verildiyi kimi, yanvarın 23-də Davosda Dünya İqtisadi Forumunun “Strateji baxış: Avrasiya” adlı interaktiv iclası keçirilib. Azərbaycan Respublikasının Prezidenti İlham Əliyev iclasda iştirak edib. Həmçinin, Prezident ona ünvanlanan bütün sualları tutarlı arqumentlərlə cavablandırıb. Sualların bir necəsi ölkədə sahibkarlığın inkişafı ilə bağlı olub.
Prezident İlham Əliyev qeyd edib ki, ölkədə sahibkarlığın inkişafı üçün hər cür şərait yaradılıb. Onun fikrincə, Azərbaycanda sahibkarlığın dəstəklənməsi üçün xüsusi fond fəaliyyət göstərir: “Son on il ərzində həmin fond vasitəsilə özəl sektora təqribən 2 milyard dollar həcmində vəsait verilmişdir. Bu da olduqca sərfəli şərtlərlə, aşağı faizli kreditlərin verilməsi yolu ilə həyata keçirilmişdir. Burada özəl sektora həm də müvafiq tövsiyələr verilir və dövlət dəstəyi göstərilir. Biz regional inkişafa xüsusi diqqət ayırırıq. Biz bu gün regionların inkişafı ilə bağlı 3-cü dövlət proqramını icra edirik ki, bu da kiçik sahibkarlara bizneslə məşğul olmağa imkan yaratmışdır”.
Dövlət başçısı onu da qeyd edib ki, son 15 il ərzində ölkə iqtisadiyyatına 230 milyard dollar həcmində sərmayə cəlb edilib: “Bütün bunlar özəl sektora inkişaf üçün şərait yaratmışdır. Eyni zamanda, qonşular ilə çox yaxşı münasibətlərimiz onların bazarlarına çıxış təmin edir ki, bu da bizim qeyri-neft məhsullarımız üçün əsas bazarlardır. Beləliklə, özəl sektorun dəstəklənməsi siyasəti davam edəcəkdir. Kiçik sahibkarlığın ümumdaxili məhsulumuzdakı payı hələ də çox aşağıdır. Gələcək illərdə bizim əsas hədəfimiz onlar üçün əlavə imkanlar yaratmaqdır ki, onlar yeni iş yerləri açsınlar və daha çox gəlir əldə etsinlər”.
Maraqlıdır, xaricilər Azərbaycandakı sahibkarlığın vəziyyəti ilə niyə bu qədər çox maraqlanırlar?
Məsələyə münasibət bildirən ekspert Rəsul Cahangirli bunu bir sıra amillərlə əlaqələndirdi: “Bəzi xarici dairələr belə rəy yaratmağa çalışırlar ki, guya Azərbaycan ancaq neft ölkəsidir. Ölkə iqtisadiyyatı yalnız enerji resurslarından asılıdır. Bu da müəyyən qrup insanları çaşdırır. Elə bilirlər ki, Azərbaycanda sahibkarlıq zəif inkişaf edir. O üzdən, onlar Azərbaycanda kiçik və orta sahibkarlığın vəziyyəti ilə daha çox maraqlanırlar. Ancaq mövcud reallıq ondan ibarətdir ki, bütövlükdə, Azərbaycanda sahibkarlığın bütün sahələri inkişaf edir. Son illər bu istiqamətdə görülən işlər, Azərbaycanda aparılan uğurlu iqtisadi islahatlar öz nəticələrini qısa zamanda verib. Bunun nəticəsidir ki, 2017-ci ildə qeyri-neft ixracı nəzərəçarpacaq dərəcədə artıb. Makroiqtisadi sabitlik təmin olunub. Kənd təsərrüfatında artım qeydə alınıb və bu il daha çox artımın olacağı gözlənir. Sahibkarlığın inkişafı üçün hüquqi mexanizmlərin işlək və əlverişli olması, onlara yaradılan iqtisadi imkanlar bu sahənin daha da inkişaf etməsinə stimul verir. Ölkədə sahibkarlığın formalaşması və fəaliyyəti üzrə ali qanun olan Konstitusiya, ona uyğun qəbul edilmiş sahibkarlıq fəaliyyətinə dair xüsusi qanun və digər kompleks normativ-hüquqi aktlar mövcuddur. Hesab edirəm ki, bütün bunlar çox əhəmiyyətli məsələlərdir. Bununla yanaşı, dövlət tərəfindən qəbul olunan proqramlar bu sahənin daha da inkişaf etməsinə öz müsbət təsirini göstərir”.
Vidadi ORDAHALLI
