Azər Allahverənov: “İlkin mərhələdə yük maşınları üçün şin istehsalını həyata keçirmək lazımdır”
Məlum olduğu kimi, Nazirlər Kabinetinin 17 noyabr 2017-ci il tarixli Qərarına əsasən, 2018-ci ilin yanvar ayının 1-dən etibarən ölkəyə gətirilən bərpa edilmiş şinlərə (işlənmiş təkər) yeni gömrük rüsumları tətbiq edilib.
Bu sahədə fəaliyyət göstərən, bərpa edilmiş şinləri xaricdən gətirərək ölkə daxilində onların satışını həyata keçirən bir qrup şəxs bir sıra dövlət qurumlarının, o cümlədən Dövlət Gömrük Komitəsinin inzibati binasının qarşısına toplanaraq qanunvericiliyə edilən dəyişikliklə razılaşmadıqlarını bildirərək, təkidlə idxal gömrük rüsumlarının əvvəlki qaydada hesablanmasını tələb ediblər.
Onu da bildirək ki, Azərbaycan bu ildən işlənmiş avtomobil təkərlərinin idxalı üzrə gömrük rüsumunu 3 ABŞ dollarından 10 dollara qaldırıb.
Qeyd edək ki, Dövlət Gömrük Komitəsinin səlahiyyətli nümayəndələri, şəxsən DGK sədri, gömrük xidməti general-polkovniki Aydın Əliyev, DGK sədrinin birinci müavini, gömrük xidməti general-leytenantı Səfər Mehdiyev və digər məsul vəzifəli şəxslər yeni qərarla razılaşmayan sahibkarlarla dəfələrlə görüşüblər, onlara qanunvericiliyin tələbləri barədə müvafiq izahatlar verilib.
Xaricdən təzə və işlənmiş halda gələn təkərlərə gömrük rüsumunun tətbiq olunması bu sahədə qiymət artımına səbəb olur. Belə vəziyyətdə təklif edilir ki, yerli təkər istehsalına başlanmalıdır. Azərbaycanda avtomobil şinlərini istehsalının təşkil olunması vacib hesab olunur.
Əmlak Ekspert Mərkəzinin direktoru Ramil Osmanlı media nümayəndələrinə açıqlamasında qeyd edib ki, hazırda Azərbaycanda şin istehsalı zavodu mövcuddur, amma bu müəssisə keçmiş SSRİ dağılandan fəaliyyət göstərmir: “Azərbaycanda bu cür istehsalatın yaradılmasına zərurət var, çünki şinlər avtomobilin vacib hissəsidir və avtomobilin qiymətinin formalaşmasında müəyyən rol oynayır. İstifadə olunmuş şinlərin idxalına rüsumun artırılması daxili istehsalın həvəsləndirilməsi üçün həyata keçirilib. Bu qərar daxili istehsalın dəstəklənməsində vacib rol oynayır, amma ilk növbədə daxili istehsalı yaratmaq və inkişaf etdirmək lazımdır. Yalnız istehsalat təşkil olunduqdan sonra tariflərin artırılmasından danışmaq olar”.
Avtomobil məsələləri üzrə ekspert Azər Allahverənov də qeyd etdi ki, ilk olaraq yük avtomobilləri üçün təkər istehsalına başlamaq olar: “Məlum olduğu kimi, keçən əsrin 60-cı illərinin əvvəllərində Azərbaycanda şin zavodunun fəaliyyətə başlaması ilə bu sahədə kifayət qədər uğurlu fəaliyyət təşkil olunub. Bəllidir ki, son 25 il ərzində isə Azərbaycana şinlər əsasən idxal olunur. Bu fonda, istər-istəməz, yerli təkər istehsalına başlamaq yenidən aktuallaşa bilər. Ən azından, köhnə təcrübəyə əsaslanaraq, ilkin mərhələdə yük maşınları üçün şin istehsalını həyata keçirmək lazımdır. Bu da, təbii ki, yük maşınları üçün lazım olan təkərlərin ölkəmizə idxalını birbaşa azaldacaq. Çünki rəqabətin güclənməsi və yerli təkər istehsalının keyfiyyətinə görə geri qalmaması son nəticədə müsbət mənada yerli istehsala təsir göstərəcək. Belə vəziyyət təkərin qiymətinin də düşməsinə gətirib çıxaracaq.
Bu prosesə başlamaq əlavə iş yerləri və əlavə gəlirlər baxımından da mühüm addım olar. Ona görə də yerli təkər istehsalı çox maraqlı bir fəaliyyət növü ola bilər. Amma prosesdə olduqca vacib məqam xammal məsələsidir”.
Günel CƏLİLOVA
