Aydın Hüseynov: “Xüsusən də qeyri-neft sektoruna yönəldilən sərmayələrin həcmində ciddi artım olacaq”
Prezident İlham Əliyev investisiya fəaliyyətinin təşviq edilməsi və xarici investorların hüquqlarının qorunması ilə bağlı bir sıra tədbirlər haqqında sərəncam imzalayıb. Sərəncamda bildirilir ki, ölkə Prezidentinin 6 dekabr 2016-cı il tarixli fərmanı ilə təsdiq edilmiş “Milli iqtisadiyyat perspektivi üzrə Strateji Yol Xəritəsi”nə əsasən, investisiya axınını cəlb etmək üçün Azərbaycanda əlverişli biznes mühitinin təmin edilməsi əsas prioritetlərdən biri kimi müəyyən edilib.
İqtisadiyyata qoyulan investisiyanın həcminin artırılması məqsədilə bu sahədə islahatlar genişləndirilməli, xüsusilə özəl təşəbbüskarlığın dəstəklənməsi istiqamətində biznes-investisiya mühiti, həmçinin, investisiyaların qorunması sahəsində qanunvericilik daha da təkmilləşdirilməlidir. Aparılmış təhlillər onu göstərir ki, xarici investorlar tərəfdaşlıq zəminində ölkədə əlverişli investisiya qorunma sisteminin mövcudluğuna xüsusi diqqət ayırırlar. Bu baxımdan investisiya imkanlarının genişlənməsinə imkan verən çərçivənin qurulması mühüm əhəmiyyət kəsb edir.
2025-ci ilədək qarşıya qoyulmuş məqsədlərdən biri də məhz xarici investorların dünya standartlarına uyğun fəaliyyət göstərməsinə şərait yaradacaq biznes mühitinin təmin edilməsidir. Bu sahədə aparılacaq islahatlar iqtisadiyyatda özəl investisiyaların payının artmasına təkan vermiş olacaq.
Qeyd olunanlar nəzərə alınmaqla, əlverişli investisiya mühitinin formalaşdırılması məqsədilə, həmçinin, beynəlxalq təcrübə nəzərə alınmaqla, yeni “İnvestisiya fəaliyyəti haqqında” qanun layihəsinin hazırlanıb dövlət başçısına təqdim edilməsi tapşırılıb.
Ümumilikdə, sözügedən sərəncamdan irəli gələn məsələlərin həll olunması ölkə iqtisadiyyatına daha çox investisiyanın cəlb olunmasında nə kimi rol oynayacaq?
Məsələyə münasibət bildirən millət vəkili Aydın Hüseynovun sözlərinə görə, hazırlanacaq yeni qanun ölkə iqtisadiyyatına qoyulan investisiyaların artmasına təkan verəcək: “Nəzərə almaq lazımdır ki, Azərbaycana xarici investorların marağı get-gedə daha da artır. Bu da Prezident İlham Əliyevin yeritdiyi uğurlu iqtisadi siyasətin nəticəsidir. Ölkədə investisiya mühitinin daha da əlverişli olması üçün sistemli tədbirlər görülür. O cümlədən, Azərbaycanda investisiya üçün mövcud olan vəziyyətin daha da təkmilləşdirilməsi istiqamətində işlər görülür. Yəni əlverişli vəziyyət istər daxili, istərsə də xarici investorları daha da təşviq edir. Bütün bunlarla yanaşı, müasir çağrışlara uyğun olaraq, dünya praktikasını özündə ehtiva edən qanunlar da lazımdır. Bu minvalla bir sıra investorların maraqları qorunsun və onlar davamlı olaraq iqtisadiyyata sərmayə qoysunlar. Yəni investorların maraqları qorunsun və sərmayədar tam əmin olsun ki, onun qoyduğu sərmayə qanun səviyyəsində qorunur. Onsuz da Azərbaycanda mütərəqqi qanunlar var. O cümlədən, investisiya fəaliyyəti ilə bağlı bir sıra qanunlar qəbul olunub. Hesab edirəm ki, sözügedən qanunlar daha da mükəmməlləşsə və dövrün tələblərinə uyğun olaraq investorların maraqlandıran sualları özündə ehtiva etsə, bu, ölkəyə sərmayə axınına ciddi təkan verəcək. Yəni ölkəyə investisiya qoyuluşunu daha da sürətləndirəcək. Bütün bunların nəticəsində ölkə iqtisadiyyatında xarici investisiyanın həcmi artacaq. Xüsusən də qeyri-neft sektoruna yönəldilən sərmayələrin həcmində ciddi artım olacaq”.
Vidadi ORDAHALLI
