Ruslan Atakişiyev: “İstehsalın həcminin, məşğulluğun artması, yeni iş yerlərinin açılması əhalinin gəlirlərinə təsir göstərir”
2017-ci ilin yanvar-noyabr aylarında ölkə iqtisadiyyatında muzdla çalışan işçilərin orta aylıq nominal əməkhaqqı 2016-cı ilin müvafiq dövrünə nisbətən 6,2 faiz artaraq 525 manat təşkil edib. Dövlət Statistika Komitəsinin yaydığı məlumata görə, əməkhaqqı neft sektorunda 3062,3 manat, qeyri-neft sektorunda 465,4 manat olub. Dövlət müəssisələrində çalışan işçilərin əməkhaqları 392,7 manat, özəl müəssisələrdə isə 709,4 manat təşkil edib.
Mədənçıxarma sənayesində, maliyyə və sığorta fəaliyyəti, peşə, elmi-texniki fəaliyyət, informasiya və rabitə, eləcə də tikinti sahələrində orta aylıq nominal əməkhaqqı ölkə üzrə orta göstəricidən yüksək olub.
Ötən il ölkədə orta aylıq əməkhaqqının 6,2 faiz artmasına münasibət bildirən iqtisadçı-ekspert Ruslan Atakişiyev bizimlə söhbətində qeyd etdi ki, bu artım gözlənilən idi: “Artım bir neçə sahədə baş verib. Kənd yerlərində və maliyyə sektorunda çalışanların əməkhaqqı bir məxrəcin hesabında müəyyənləşir. Bu səbəbdən də orta aylıq əməkhaqqı ortaq məbləğ gösticisidir”.
Həmsöhbətimizin sözlərinə görə, özəl sektorda daxili qərar əsasında əməkhaqqında artım yaşanır. İl ərzində baş verən inflyasiyalar, qiymət artımları özəl sektorda qiymət artımına səbəb olur: “İşçi qüvvəsinin bilik və bacarıqları artdıqca, əməkhaqqında dəyişiklik baş verir. Biznes sektorunda peşəkar işçiyə təklif yüksək olan halda da bu, əməkhaqqına təsir edir. Daha peşəkar işçi uğrunda rəqabət nəticədə əməkhaqqının yüksəlməsinə səbəb olur”.
İqtisadçı onu da vurğuladı ki, dövlət sektorunda çalışanların əməkhaqqında da artım qeydə alınır. Əvvəlki illərə nisbətən minimum əməkhaqqı artıb: “Həmçinin, əmək müqaviləsi bağlayanların sayının artması statistikaya öz təsirini göstərir. Onu da deyim ki, işçilərin öz əməkhaqlarının şəffaf şəkildə göstərilməsində maraqlı olması faktları son zamanlar artıb”
R.Atakişiyev bildirdi ki, istehsalın həcminin, məşğulluğun artması, yeni iş yerlərinin açılması əhalinin gəlirlərinə təsir göstərir: “Qeyri-neft sektoruna yatırılan maliyyə kapitalı kənd təsərrüfatının tam gücü ilə inkişafına səbəb olur. Onu da vurğulamaq lazımdır ki, aqrar sahənin inkişafı əhalinin gəlirlərinə də təsir göstərir”.
Günel CƏLİLOVA
