Rəsul Cahangirli: “Bu il bir sıra MDB ölkələrində belə evlərin açılacağı gözlənir”
Ölkənin davamlı inkişafı üçün hərtərəfli islahatların mühüm istiqamətlərindən biri də qeyri-neft məhsulları ixracının artırılması, yeni bazarlara çıxışının təmin olunmasıdır. Prezident İlham Əliyev dəfələrlə bildirib ki, bu gün qarşıda duran əsas məqsədlərdən biri “Made in Azerbaijan” brendini dünyada tanıtmaq, Azərbaycan məhsullarının xarici bazarlara çıxışını təmin etmək və ölkənin ixrac potensialını artırmaqdır.
İxracın genişləndirilməsi, rəqabətədavamlı və ixrac potensiallı məhsullar bazasının zənginləşdirilməsi istiqamətində dövlət başçısının “Made in Azerbaijan” brendinin xarici bazarlarda genişmiqyaslı təşviqinə dair 5 oktyabr 2016-cı il tarixli Fərmanı mühüm əhəmiyyət kəsb edir. Fərmana uyğun olaraq, potensial ixrac ölkələrinə ixrac missiyaları təşkil edilir, ölkəmizin beynəlxalq əhəmiyyətli sərgilərdə “Made in Azerbaijan” vahid ölkə stendi ilə iştirakı təmin olunur, Azərbaycan məhsulları xarici KİV-də reklam edilir, ixrac təşviqinin geri ödənilməsi mexanizmi tətbiq edilir. Bu istiqamətdə atılan addımlardan biri də xaricdə ticarət evlərinin yaradılmasıdır. Ötən ilin fevralında ölkə başçısının bununla bağlı qərarından sonra bu istiqamətdə bir sıra işlər görülür. Artıq dünyada şöhrət qazanan “Made in Azerbaijan” brendinin xarici bazarlarda təşviqinin daha da gücləndirilməsi üçün praktik addımlar atılır. Azərbaycan xarici ölkələrdə ticarət evləri yaradır. Hazırda Belarusda belə bir ticarət evi açılıb, Rusiya və Ukraynada, Qazaxıstanda ticarət evlərinin açılması ilə bağlı işlər aparılır. Körfəz, o cümlədən Avropa ölkələrində də belə evlərin yaradılması nəzərdə tutulub.
Ümumən xarici ölkələrdə ticarət evlərinin yaradılması prosesi necə gedir?
Məsələyə münasibət bildirən ekspert Rəsul Cahangirlinin sözlərinə görə, indiyə qədər hələlik Belarusda ticarət evi yaradılıb: “Ancaq belə evlərin digər ölkələrdə də yaradılması istiqamətində proses gedir. Bununla bağlı danışıqlar aparılır. Xüsusən də digər postsovet ölkələrində belə evlərin yaradılması istiqamətində ciddi işlər aparılır. Bu il bir sıra MDB ölkələrində belə evlərin açılacağı gözlənir. Bununla yanaşı, Körfəz ölkələrində bunun təşkili ilə bağlı müəyyən işlər həyata keçirilir. Nəzərə almaq lazımdır ki, indi əsas məqsədlərdən biri Azərbaycan məhsullarının xarici ölkələrin bazarlarına daha geniş çıxarılmasıdır. Məsələ ondadır ki, bazarlar olmasa, məhsul yetişdirməyin də elə böyük əhəmiyyəti yoxdur. Dövlət başçısının müvafiq qurumlara, xüsusilə də İqtisadiyyat Nazirliynə bazarın tapılması ilə bağlı göstərişi olub. Dünyanın müxtəlif ölkələrində Azərbaycan ticarət evlərinin yaradılmasına başlanıb və məhsullarımızın dünya bazarlarına çıxması üçün lazımi tədbirlər görülür. Şübhəsiz ki, bu istiqamətdə görülən işlər zamanla öz nəticəsini verəcək. Ticarət evləri daha çox məhsulun dünya bazarlarına çıxarılmasına şərait yaradacaq. Bütün bunların sayəsində Azərbaycanın ixracdan əldə etdiyi valyuta gəlirləri artacaq. Burada söhbət qeyri-neft məhsullarının ixracından gedir. Belə ki, Azərbaycan hakimiyyətinin yeritdiyi məqsədyönlü siyasətin kökündə məhz bu amil dayanır. Yəni ölkə iqtisadiyyatında qeyri-neft sektorunun payını əhəmiyyətli dərəcədə artırmağa nail olmaq. Düşünürəm ki, ticarət evləri bu məsələdə müsbət rol oynayacaq”.
Vidadi ORDAHALLI
