Zakir Əhmədov: “Bütün bunların nəticəsində həm Azərbaycan, həm də Səudiyyə Ərəbistanı qazanacaq”
Məlum olduğu kimi, Azərbaycanın energetika naziri Pərviz Şahbazov Səudiyyə Ərəbistanında bir sıra görüşlər keçirib. P.Şahbazov Səudiyyə Ərəbistanının energetika, sənaye və təbii sərvətlər naziri Xalid Əbdüləziz Al Falih ilə də görüşüb. Enerji əməkdaşlığının inkişaf etdirilməsi məqsədilə iki ölkənin müvafiq nazirlikləri arasında işçi qrupunun yaradılması ilə bağlı Səudiyyə Ərəbistanının Energetika, Sənaye və Təbii Sərvətlər Nazirliyinin irəli sürdüyü təklif Azərbaycan tərəfindən müsbət qarşılanaraq qəbul edilib.
Xalid Al Falih enerji sahəsində birgə fəaliyyətin gücləndirilməsini təmin edəcək daha bir yenilik barəsində məlumat verib. Onun sözlərinə görə, yaxın vaxtlarda Azərbaycanda “Saudi Aramco” şirkətinin nümayəndəliyi fəaliyyətə başlayacaq.
Görüşdə, həmçinin, neft qiymətlərinin sabitləşməsi prosesində birgə mövqedən çıxış edilməsi və ölkəmizin öhdəliyinə sadiqliyi mühüm məqamlar kimi vurğulanıb. Bildirilib ki, neft bazarının sabitliyinin davamlılığı hasilatın tənzimlənməsinin uzunmüddətli olmasını tələb edir.
Nümayəndə heyətinin səfər proqramına şirkətin baş icraçı direktoru Amin Al Nasser ilə görüş də daxil olub. Görüşdə SOCAR-la enerji sektorunda əməkdaşlığın dərinləşdirilməsi, hər iki şirkətin iştirakı ilə bir sıra ölkələrdə birgə layihələrin həyata keçirilməsi perspektivləri ətrafında fikir mübadiləsi aparılıb.
Ümumilikdə, SOCAR-la “Saudi Aramco”nun üçüncü ölkələrdə iş aparmaq perspektivinə ekspertlər necə yanaşırlar? Məsələyə münasibət bildirən ekspert Zakir Əhmədovun sözlərinə görə, bunun üçün çox yaxşı perspektiv var: “Çünki hər iki şirkət bu sahədə boyük potensiala və zəngin təcrübəyə malikdirlər. Belə olan halda, üçüncü ölkələrdə birgə layihələrin həyata keçirilməsində heç bir çətinlik olmayacaq. Nəzərə almaq lazımdır ki, SOCAR son illər bir sıra ciddi uğurlar əldə edib. Dünyanın bir sıra ölkələrində böyük enerji layihələrini həyata keçirir. Bir sıra ölkələr bununla bağlı SOCAR-la çox uğurlu tərəfdaşlıq qurublar. SOCAR-ın qardaş Türkiyədə həyata keçirdiyi layihələr miqyasına görə çox böyükdür. O baxımdan hesab edirəm ki, SOCAR-la “Saudi Aramco” şirkəti bir sıra Asiya, Afrika ölkələrində birgə enerji layihələrini reallaşdıra bilər. Neft hasilatı ilə bağlı Azərbaycanın çox zəngin ənənələri var. Bu potensialdan üçüncü ölkələr də istifadə edə bilər. Çünki bir sıra ölkələrin buna ehtiyacı var. Bütün bunların nəticəsində həm Azərbaycan, həm də Səudiyyə Ərəbistanı qazanacaq. Hər iki ölkənin iqtisadiyyatı bundan ciddi dividendlər əldə edəcək. O üzdən, bu istiqamətdə birgə əməkdaşlığı məqsədəuyğun hesab edirəm”.
Vidadi ORDAHALLI
