Aydın Hüseynov: “Düşünürəm ki, bu yöndə əməkdaşlıq yaxşı perspektiv vəd edir”
Yaxın vaxtlarda Azərbaycanda “Saudi Aramco” şirkətinin nümayəndəliyi fəaliyyətə başlayacaq. Xəbər verildiyi kimi, bu barədə Azərbaycanın energetika naziri Pərviz Şahbazovun Səudiyyə Ərəbistanının energetika, sənaye və təbii sərvətlər naziri Xalid Əbdüləziz Al Falih ilə görüşündə bildirilib.
Enerji əməkdaşlığının inkişaf etdirilməsi məqsədilə iki ölkənin müvafiq nazirlikləri arasında işçi qrupunun yaradılması ilə bağlı Səudiyyə Ərəbistanının Energetika, Sənaye və Təbii Sərvətlər Nazirliyinin irəli sürdüyü təklif Azərbaycan tərəfindən müsbət qarşılanaraq qəbul edilib. Qeyd edilib ki, gələcəkdə enerji sahəsində layihələrin müzakirəsi və reallaşdırılması ilə bağlı məsələlərin həllində belə bir işçi qrupun fəaliyyəti mühüm rol oynayacaq. Səudiyyəli nazir enerji sahəsində birgə fəaliyyətin gücləndirilməsini təmin edəcək daha bir yenilik barəsində məlumat verib. Onun sözlərinə görə, yaxın vaxtlarda Azərbaycanda “Saudi Aramco” şirkətinin nümayəndəliyi fəaliyyətə başlayacaq.
“Saudi Aramco” şirkətinin baş icraçı direktoru Amin Əl Nasser ilə görüşdə SOCAR-la enerji sektorunda əməkdaşlığın dərinləşdirilməsi, hər iki şirkətin iştirakı ilə bir sıra ölkələrdə birgə layihələrin həyata keçirilməsi perspektivləri ətrafında fikir mübadiləsi aparılıb.
Ümumilikdə, “Saudi Aramco” şirkətinin Azərbaycanda fəaliyyətə başlaması ölkənin neft sənayesinin inkişafı üçün nə vəd edir?
Məsələyə münasibət bildirən millət vəkili Aydın Hüseynovun sözlərinə görə, bu, ölkənin neft sənayesinin inkişafına müsbət təsir göstərəcək. O bunu bir sıra arqumentlərlə əsaslandırdı: “Azərbaycanın neft-qaz sektoruna xarici şirkətlərin marağı artır. Çox böyük maliyyə qaynaqları olan şirkətlərin Azərbaycana maraq göstərməsi ölkədəki investisiya mühitinin cəlbedici olmasından xəbər verir. Bu həm də Azərbaycanda işgüzar mühitin normal olmasının növbəti göstəricisidir. Nəzərə almaq lazımdır ki, Səudiyyə Ərəbistanı dünyada çox böyük neft ehtiyatlarına malik olan ölkələrdən biridir. Eyni zamanda, ən böyük neft ixrac edən ölkələrdən hesab olunur. Neft hasilatı ilə əlaqədər Səudiyyə Ərəbistanının ixtisaslaşmış şirkətləri var. Hansı ki, həmin şirkətlərin bu sahədə böyük təcrübəsi mövcuddur. Bu cür şirkətlərdən biri də “Saudi Aramco”dur. Adıçəkilən şirkət böyük olmaqla yanaşı, bu sahədə ciddi təcrübəyə malikdir. “Saudi Aramco”nun Azərbaycanda nümayəndəlik açmaq niyyətini, SOCAR-la enerji sektorunda əməkdaşlıq etmək istəməsini müsbət dəyərləndirirəm. Hesab edirəm ki, bu kimi şirkətlərin Azərbaycana cəlb olunması, neft sektoruna sərmayə qoymaları enerji sektorunun inkişafına əlavə təkan verəcək. O cümlədən, neft sənayesinin inkişafına müsbət təsir göstərəcək. Bununla yanaşı, bu həm də Azərbaycanın beynəlxalq nüfuzunun yüksəlməsi deməkdir. Başqa bir tərəfdən, bu, Azərbaycanın neft sənayesinin inkişafına görə dünyada aparıcı ölkələrdən birinə çevrilməsinə gətirib çıxaracaq. Deməyim odur ki, belə əməkdaşlıqların genişləndirilməsinin çoxsaylı faydaları var. Bu baxımdan sözügedən istiqamətdə qurulan əlaqələrə, əməkdaşlığın dərinləşdirilməsinə müsbət yanaşıram. Düşünürəm ki, bu yöndə əməkdaşlıq yaxşı perspektiv vəd edir”.
Vidadi ORDAHALLI
