Ruslan Atakişiyev: “İqtisadiyyatda müşahidə olunan müsbət meyllər idxalın artmasına müəyyən təsir göstərib”
2017-ci ildə Azərbaycana avtomobil idxalı 2016-cı illə müqayisədə 7 352 ədəd və yaxud 127,95 faiz (2,3 dəfə) artıb. Bununla bağlı Dövlət Gömrük Komitəsindən (DGK) verilən məlumata görə, 2016-cı ildə xaricdən Azərbaycana 5 746 ədəd avtomobil gətirildiyi halda, 2017-ci ildə 13 098 ədəd avtomobil idxal olunub.
Məlumata görə, ölkəyə gətirilən avtomobillərin 187 ədədi, yaxud 1,43 faizi sürücü daxil olmaqla 10 nəfər və ya daha çox adam daşımaq üçün nəzərdə tutulmuş motorlu nəqliyyat vasitələri, 11 610 ədədi, yaxud 88,64 faizi əsasən adamların daşınması üçün nəzərdə tutulmuş minik avtomobilləri və digər motorlu nəqliyyat vasitələri, 1 227 ədədi və ya 9,37 faizi yük daşımaq üçün motorlu nəqliyyat vasitələri, 74 ədədi, yaxud 0,57 faizi isə xüsusi təyinatlı motorlu nəqliyyat vasitələridir.
Əvvəlki ilə nisbətən sürücü daxil olmaqla, 10 nəfər və ya daha çox adam daşımaq üçün nəzərdə tutulmuş motorlu nəqliyyat vasitələrinin sayı 91 ədəd, yaxud 94,79 faiz artıb. Əsasən adamların daşınması üçün nəzərdə tutulmuş minik avtomobilləri və digər motorlu nəqliyyat vasitələrinin sayı 2,3 dəfə, yaxud 6 619 ədəd artıb. Yük daşımaq üçün motorlu nəqliyyat vasitələrinin sayı 656 ədəd, yaxud 2,15 dəfə artıb. Xüsusi təyinatlı motorlu nəqliyyat vasitələrinin idxalı isə 14 ədəd, yaxud 15,91 faiz azalıb.
Müşahidələr göstərir ki, avtomobil idxalının 2 dəfədən çox artması ölkədəki iqtisadi inkişafla bağlıdır. Ötən il iqtisadiyyatda müşahidə olunan canlanma, öz növbəsində, idxal olunan avtomobillərin sayının artmasına da təsirsiz ötüşməyib.
Maraqlıdır, sözügedən amillər arasında əlaqəyə ekspertlər necə yanaşırlar? Məsələyə münasibət bildirən İqtisadi Resursların Öyrənilməsi Mərkəzinin direktoru Ruslan Atakişiyevin sözlərinə görə, ölkəyə avtomobil idxalının artması ilə iqtisadi inkişaf arasında əlaqə var: “Ölkə iqtisadiyyatında müsbət tendensiyalar olmasaydı, avtomobil idxalı artmazdı. Düzdür, əvvəlki illərə baxanda ölkəyə gətirilən avtomobillərin sayı elə də çox deyil. Ancaq bunun da bir sıra obyektiv və subyektiv səbəbləri var. Məsələ ondadır ki, 2014-cü ilin sonlarına doğru neftin dünya bazarındaki qiymətinin kəskin ucuzlaşması, bir sıra bankların bağlanması avtomobil idxalına da öz təsirini göstərdi. Kredit almaq imkanlarının çətinləşməsi avtomobil alanların sayının azalmasına gətirib çıxardı. Bütün bunlarla yanaşı, hesab edirəm ki, ötən il avtomobil alan alıcıların tərkibinin araşdırılmasına və seqmentləşdirilməsinə ehtiyac var. Elə alıcılar var ki, daha qənaətcil avtomobillərə üstünlük verirlər. Bütün hallarda, 2016-cı illə müqayisədə ötən il avtomobil idxalının artmasının ölkə iqtisadiyyatının mövcud vəziyyəti ilə əlaqəsi var. Nəzərə almaq lazımdır ki, ötən il ölkə iqtisadiyyatında azalma prosesi dayanıb. İqtisadiyyatın bir sıra sahələrində artım qeydə alınıb. Bütün bunlar, əlbəttə ki, bir-birilə sıx bağlıdır. İqtisadiyyatda müşahidə olunan müsbət meyllər avtomobil idxalının artmasına da müəyyən təsir göstərib. Hesab edirəm ki, qarşıdakı dövrdə avtomobil idxalının həcmi daha da artacaq. İqtisadi inkişaf nə qədər böyük olsa, bu bir o qədər sözügedən sahəyə öz müsbət təsirini göstərəcək”.
Vidadi ORDAHALLI
