Rəsul Cahangirli: “Regionda Azərbaycanın rəyi, mövqeyi nəzərə alınmadan iqtisadi layihələr reallaşdırılmır”
Məlum olduğu kimi, Azərbaycan dünyada əhalinin dövləti idarə edən siyasətçilərə ən çox etimad göstərdiyi 20 ölkə sırasına daxil edilib. Dünya İqtisadi Forumunun “2017-2018 Qlobal Rəqabətlilik Hesabatı”nda “Siyasətçilərə ictimai etimad” kateqoriyası üzrə Azərbaycan 137 ölkə arasında 20-ci pillədə yer alıb. Bununla da Azərbaycan “Böyük İyirmilik” ölkələrinin hər 4-dən 3-nü geridə qoyub.
Azərbaycan “Qlobal Rəqabətlilik Hesabatında” daha bir kateqoriya – “Dövlət tənzimlənməsinin yükü” göstəricisinə görə dünyada 15-ci yerdə qərarlaşıb. Bununla da Azərbaycan dünyada dövlətə ən çox etimad göstərilən və dövlətin əhaliyə və biznesə ən az yük olduğu ölkələrin sırasına daxil edilib. Dünya İqtisadi Forumu dünyada siyasi və iqtisadi vəziyyəti nümayiş etdirən ən şəffaf qurum hesab edilir. Görünən odur ki, reytinqin nəticələri qarşıdakı illərdə Azərbaycan iqtisadiyyatına çox müsbət təsir edəcək və investisiya yatırımlarının həcmini artıracaq. Eyni zamanda, Azərbaycanın dünya arenasında iqtisadi imicini möhkəmləndirəcək və ölkəyə xarici ölkələrin marağını artıracaq.
Maraqlıdır, bəs ekspertlərin bu amilin oynayacağı rola münasibəti necədir? Məsələyə münasibət bildirən ekspert Rəsul Cahangirlinin sözlərinə görə, Azərbaycan Dünya İqtisadi Forumunun reytinqində ən yüksək sıralarda yer tutmaqla dünya arenasında öz mövqeyini daha da məhkəmləndirmiş olub: “Azərbaycanda aparılan islahatlar öz nəticəsini verir. Belə ki, “Dövlət tənzimlənməsinin yükü” kateqoriyası üzrə Azərbaycan 137 ölkə arasında 15-ci yerə sahib olub. Aparılan islahatlar nəticəsində lisenziya tələb edən sahibkarlıq fəaliyyət növlərinin sayının 59-dan 37-yə, icazələrin sayının 330-dan 86-ya endirilməsi, həmçinin, sahibkarlıq sahəsində aparılan yoxlamaların sayının 1000 dəfə azaldılması Azərbaycana belə yüksək yer tutmağa imkan yaradıb. Azərbaycan beynəlxalq səviyyədə, miqyasda özünün iqtisadi göstəricilərinə, daxili siyasi stabilliyinə, iqtisadi inkişafın meylliliyinə görə dünya ölkələri arasında çox böyük etimad qazanmaqdadır. Təbii ki, həm daxili sərmayədarların, həm beynəlxalq investorların Azərbaycana cəlb olunması baxımından bu olduqca yaxşı göstəricidir. Nəzərə almaq lazımdır ki, Azərbaycana cəlb olunmuş investisiyaların həcmi təxminən 30 milyard dollara yaxındır. Bu da Azərbaycanda ümumdaxili məhsulun təxminən 80 faizini təşkil edir. Azərbaycan Dünya İqtisadi Forumunun reytinqində ən yüksək yer tutmaqla dünyanın siyasi arenasında öz mövqeyini daha da möhkəmləndirib. Artıq bir sıra məsələlərin həllində Azərbaycanın mövqeyi daha diqqətlə nəzərə alınacaq. Zatən, regionda reallaşdırılan bir sıra iqtisadi layihələrdə Azərbaycanın mövqeyi həlledici əhəmiyyətə malikdir. Azərbaycanın rəyi, mövqeyi nəzərə alınmadan iqtisadi layihələr reallaşdırılmır. Bu baxımdan hesab edirəm ki, bundan sonra sözügedən amil xüsusi nəzərə alınacaq”.
Vidadi ORDAHALLI
