Vüqar Bayramov: “Ölkəyə nə qədər çox valyuta gəliri daxil olsa, bu bir o qədər...”
“Keçən il Azərbaycan iqtisadiyyatına 14,6 milyard dollar sərmayə qoyulub. Bu, çox gözəl göstəricidir. Bu onu göstərir ki, həm yerli və həm də xarici investorlar ölkəmizə vəsait qoymaqda maraqlıdırlar. Bu, eyni zamanda, sabitliyin təzahürüdür. Çünki indiki dünyada mövcud olan maliyyə və iqtisadi vəziyyətdə xarici ölkələrə vəsait qoymaq bir çox investorlar tərəfindən o qədər də məqbul sayılmır. Ancaq sabit olan ölkələrə və gözəl gələcəyi olan ölkələrə xaricdən investisiyalar qoyulur”.
Məlum olduğu kimi, bu fikirləri Prezident İlham Əliyev Nazirlər Kabinetinin 2017-ci ilin sosial-iqtisadi inkişafının yekunlarına və qarşıda duran vəzifələrə həsr olunan iclasında deyib. Dövlət başçısı vurğulayıb ki, bu il sərmayə qoyuluşu əvvəlki ilin səviyyəsində olacaq: “Biz hesablamalar aparmışıq və təxminən 15 milyard dollar səviyyəsində sərmayə qoyuluşu gözlənir. Bu rəqəm arta da bilər və biz çalışmalıyıq ki, bu artsın. Çünki Azərbaycan bu gün dünya miqyasında sərmayə qoyuluşu üçün çox cəlbedici ölkəyə çevrilib. Həm iqtisadi sabitlik, valyuta ehtiyatlarımız, siyasi sabitlik və Azərbaycanda həyata keçirilən önəmli layihələrin kommersiya cəlbediciliyi xarici sərmayənin cəlb edilməsində bizə kömək göstərəcək”.
Görünən odur ki, iqtisadiyyatda müşahidə olunan müsbət tendensiyalar Azərbaycana sərmayə qoyuluşunu stimullaşdırır. Bir sıra iqtisadi çətinliklərə rəğmən, ötən il ölkə iqtisadiyyatına 14,6 milyard dollar sərmayə qoyulubsa, bu il nə qədər sərmayə qoyulacağı gözlənir?
Məsələyə münasibət bildirən iqtisadçı-ekspert Vüqar Bayramovun sözlərinə görə, bu il Azərbaycan iqtisadiyyatına qoyulan sərmayənin həcmi əvvəlki ildən çox olacaq: “Bunu şərtləndirən bir sıra faktorlar var. Nəzərə almaq lazımdır ki, neftin ucuzlaşmasından sonra 2015-2016-cı illərdə iqtisadiyyatda yaranan bəzi çətinliklər artıq geridə qalıb. 2017-ci il məhz bu kontekstdən ölkəmiz üçün vacib idi. Azərbaycan 2017-ci ildə hədəflənən iqtisadi stabilliyi əldə etməli idi ki, növbəti dövrlərdə iqtisadi artıma nail ola bilsin. Əvvəlki illə müqayisədə rəqəmlər, eləcə də milli valyutanın sabit qalması göstərdi ki, ölkəmiz ötən il makroiqtisadi stabilliyə nail oldu. Bu həm də 2018-ci ildəki iqtisadi göstəricilər üçün vacib idi. Builki iqtisadiyyatla bağlı yalnız Azərbaycan hökumətinin deyil, eləcə də beynəlxalq maliyyə qurumlarının proqnozları müsbətdir. Həmin qurumlar 2018-ci ildə Azərbaycan iqtisadiyyatında artımın olacağını proqnozlaşdırırlar. Bu həm də o deməkdir ki, iqtisadiyyata qoyulan sərmayənin həcmi daha böyük olacaq. Nəticədə iqtisadi aktivliyin bir az da artacağı, ÜDM-də də artımın olacağı gözlənir. Bir tərəfdən neftin mövcud qiymətlərinin proqnozları da müsbət tendensiya ilə nəticələnir. Bu da ölkəyə daha çox valyutanın daxil olmasına imkan verəcək. Müşahidələr göstərir ki, neft və qeyri-neft gəlirlərimiz pozitiv tendensiya üzrə dəyişir. 2018-ci ildə Azərbaycan TANAP kəmərini istifadəyə verməyi planlaşdırır. Bu da Türkiyə bazarına 6 milyard kubmetr əlavə mavi qazın nəql edilməsinə imkan yaradacaq. Təbii ki, bunlar da ölkəyə daxil olan valyutanın həcminə təsir göstərəcək. Ölkəyə nə qədər çox valyuta gəliri daxil olsa, bu bir o qədər iqtisadiyyata qoyulan investisiyaların həcminin artmasına öz təsirini göstərəcək. Qlobal şoklar baş verməzsə, 2018-ci il ötən illə müqayisədə daha uğurlu olacaq. Qlobal şok deyəndə burada neftin dünya bazar qiymətinin kəskin şəkildə aşağı düşməsi nəzərdə tutulur. İstər rəsmi, istər beynəlxalq proqnozlar pozitivdir. Neftin dünya bazar qiymətinin artması fonunda da Azərbaycan hökuməti qeyri-neft sektorunun inkişafını davam etdirməlidir. Bu çox vacibdir. Çünki neftin qiyməti proqnozlaşdırılan deyil. Neft bazarında qiymətlərdə istənilən vaxt dəyişmə ehtimalı var”.
Vidadi ORDAHALLI
